ខេត្តស្ទឹងត្រែង ៖ គ្រឿងចក្រប៊ុលឌូហ៊្សែរខ្នាតធំ D80 ចំនួន២គ្រឿង ដែលធ្វើសកម្មភាពឈូសឆាយដីព្រៃរបស់រដ្ឋនៅចំណុចអូរបេងភូមិឈ្វាំង ឃុំសំអាង ស្រុកថាឡាបរិវ៉ាត់បានត្រូវមន្ត្រីផ្នែករដ្ឋបាលព្រៃឈើថាឡាបរិវ៉ាត់សហការជាមួយនឹងកម្លាំងកងរាជអាវុធហត្ថស្រុកថាឡាបរិវ៉ាត់ ចុះឃាត់មិនឱ្យធ្វើសកម្មភាពឈូសឆាយបន្តកាលពីវេលា
ខេត្តស្ទឹងត្រែង ៖ គ្រឿងចក្រប៊ុលឌូហ៊្សែរខ្នាតធំ D80 ចំនួន២គ្រឿង ដែលធ្វើសកម្មភាពឈូសឆាយដីព្រៃរបស់រដ្ឋនៅចំណុចអូរបេងភូមិឈ្វាំង ឃុំសំអាង ស្រុកថាឡាបរិវ៉ាត់បានត្រូវមន្ត្រីផ្នែករដ្ឋបាលព្រៃឈើថាឡាបរិវ៉ាត់សហការជាមួយនឹងកម្លាំងកងរាជអាវុធហត្ថស្រុកថាឡាបរិវ៉ាត់ ចុះឃាត់មិនឱ្យធ្វើសកម្មភាពឈូសឆាយបន្តកាលពីវេលាម៉ោង១០ព្រឹកថ្ងៃទី១ មិថុនា កន្លងមកនេះ ។
តាមលោកសុខ សេង អ្នកមើលការខុសត្រូវនៅកន្លែងឈូសឆាយនោះអះអាងថា ដីនេះគឺរបស់លោកប៉េង គង់ ទិញពីប្រជាពលរដ្ឋដោយមានចុះហត្ថលេខា និងបោះត្រាពីមេឃុំសំអាងផង ។ ចំណែកលោកញាន ផុន មេឃុំសំអាងក៏បានបញ្ជាក់តាមទូរស័ព្ទដែរថា ដីដែលកំពុង ឈូសឆាយនៅចំណុចអូរបេងនេះ ពិតជាដីរបស់លោកប៉េង គង់ ជានាយខុទ្ទកាល័យសាលាខេត្តដែលបានទិញពីប្រជាពលរដ្ឋយូរណាស់មកហើយ។
ប្រជាពលរដ្ឋនៅតំបន់នោះនិយាយថា បើពលរដ្ឋក្រីក្រហ៊ានកាប់ដីព្រៃលក់យ៉ាង ដូច្នេះគេចាប់វាយខ្នោះយកទៅដាក់ពន្ធនាគារបាត់ទៅហើយ ។ បញ្ហាចុះហត្ថលេខាលក់ដីព្រៃ និងកាប់ឈូសឆាយដីព្រៃរបស់រដ្ឋឡើងវាលអស់នៅតាមសងខាងផ្លូវនេះ មានតែអ្នកមានអំណាច ទេ ទើបធ្វើបានហើយអត់មានបញ្ហាអ្វីថែមទៀត ។ កន្លងមកនេះ ករណីកាប់ឈូសឆាយដីព្រៃនៅតំបន់នេះ គេឮតែសំឡេងរណារយន្ត និងគ្រឿងចក្រ រំពងពេញព្រៃហើយមិនដែលឃើញអាជ្ញាធរមានសមត្ថកិច្ចចេញមុខមកហាមឃាត់ទេ មានតែចេញមុខមកគំរាមប្រជាពលរដ្ឋក្រីក្រ រហូតដល់មានបញ្ហាកាន់កាំភ្លើងរត់ចូលក្នុងព្រៃថែមទៀតដោយសារតែអាជ្ញាធរគាបសង្កត់។
លោកសុផឹត នាយផ្នែករដ្ឋបាលព្រៃឈើថាឡាបរិវ៉ាត់បានបញ្ជាក់ថា ក្នុងប្រតិបត្តិការនេះ កម្លាំងសមត្ថកិច្ចបានឃាត់គ្រឿងចក្រខ្នាតធំពីរគ្រឿងមិនឱ្យធ្វើសកម្មភាពឈូសឆាយដីព្រៃបន្តទៀត ហើយរង់ចាំយោបល់ពីថ្នាក់លើសិន។ ចំពោះករណីនេះ លោកប៉េង គង់ បានបកស្រាយថា បើជំនាញរដ្ឋបាលព្រៃឈើឃាត់គ្រឿងចក្រនោះ លោកក៏មិនដឹងធ្វើម៉េចដែរ ហើយដីនៅតំបន់នោះមិនមែនមានដីតែរបស់លោកម្នាក់ឯងទេ ។ ចំពោះដីនេះគឺលោកបានទិញពីប្រជាពលរដ្ឋ កាលពី៤ឆ្នាំមុន ហើយការឈូសឆាយនេះគឺដើម្បីដាំដំណាំកសិកម្មប៉ុណ្ណោះ លើផ្ទៃដីទំហំ២០០ម៉ែត្រx២០០ម៉ែត្រ ។
គេមិនទាន់ដឹងថា តើរឿងរ៉ាវនេះនឹងប្រែក្លាយទៅជាយ៉ាងណានោះទេ ដោយក្រុមមន្ត្រីថ្នាក់ក្រោមរង់ចាំរដ្ឋមន្រ្តីក្រសួងកសិកម្ម និងប្រធានរដ្ឋបាលព្រៃឈើពិនិត្យលើករណីនេះដើម្បីឱ្យដឹងថា តើដីចំណុចអូរបេងជាដីព្រៃ ឬយ៉ាងណា ។ មានការកត់សម្គាល់ថា កាលពី៤ឆ្នាំមុន ដីព្រៃនេះមិនមាននរណាហ៊ានទៅកាប់ឆ្ការយកដីឡើយ លុះពេលមានផ្លូវ ស្រាប់តែដីព្រៃអមសងខាងផ្លូវក្លាយទៅជាដីកម្មសិទ្ធិរបស់អ្នកមានធនធាន និងអ្នកមានអំណាច ដែលអ្នកខ្លះមានដីរាប់រយហិកតាហើយជួលប្រជាពលរដ្ឋក្រីក្រឱ្យស៊ីឈ្នួលកាប់រាន និងចាំដីឱ្យទៀតផង៕
ចែករំលែកព័តមាននេះ