រាជធានីភ្នំពេញ ៖ អ្នកបើករ៉ឺម៉កកង់បីម្នាក់ដែលឈប់ចតនៅជាប់របងសណ្ឋាគារកាំបូឌីយ៉ាណាខាងស្ដាំដៃត្រូវរថយន្ដពណ៌ទឹកប្រាក់ពាក់ស្លាកលេខ2N 3963 បើកមកពីខាងក្រោយក្នុងទិសដៅពីត្បូងទៅជើងបុកពេញទំហឹង បណ្ដាលឱ្យរ៉ឺម៉កម៉ូតូបាក់ខ្ទេចអស់ រីឯម្ចាស់ខ្ទាតចេញបោកក្បាលស្លា.ប់នៅវេលាម៉ោង១១ និង៤៥នាទីយប់ថ្ងៃទី២៨ មេសា
រាជធានីភ្នំពេញ ៖ អ្នកបើករ៉ឺម៉កកង់បីម្នាក់ដែលឈប់ចតនៅជាប់របងសណ្ឋាគារកាំបូឌីយ៉ាណាខាងស្ដាំដៃត្រូវរថយន្ដពណ៌ទឹកប្រាក់ពាក់ស្លាកលេខ2N 3963 បើកមកពីខាងក្រោយក្នុងទិសដៅពីត្បូងទៅជើងបុកពេញទំហឹង បណ្ដាលឱ្យរ៉ឺម៉កម៉ូតូបាក់ខ្ទេចអស់ រីឯម្ចាស់ខ្ទាតចេញបោកក្បាលស្លាប់នៅវេលាម៉ោង១១ និង៤៥នាទីយប់ថ្ងៃទី២៨ មេសា ។
អ្នកបើករ៉ឺម៉កមូតូកង់បីនោះឈ្មោះកង ស៊ីណុច អាយុ៣៩ឆ្នាំ មានស្រុកកំណើតនៅភូមិទួលមាស ឃុំអរិយក្សត្រ ស្រុកល្វាឯម ខេត្ដកណ្ដាល ។ ចំណែករថយន្ដបង្កហេតុនោះពណ៌ទឹកប្រាក់ ពាក់ស្លាកលេខ2N 3963 បើកក្នុងទិសដៅពីត្បូងទៅទិសខាងជើង ហើយបានបុករ៉ឺម៉កមូតូកង់បីពីក្រោយខ្ទាតចម្ងាយប្រមាណ៧ម៉ែត្រ ធ្វើឱ្យអ្នកបើកបរខ្ទាតទៅបោកក្បាលផ្កាប់មុខលើខឿនចិញ្ចើមថ្នល់បាក់កស្លាប់នៅនឹងកន្លែង ។
តាមមិត្ដភក្ដិជាអ្នករត់រ៉ឺម៉កកង់បីឈ្មោះសៅ ថន អាយុ៣៩ឆ្នាំ មានស្រុកកំណើតនៅខេត្ដស្វាយរៀងរៀបរាប់ឱ្យដឹងថា នៅវេលាម៉ោងនោះ ខណៈរូបគេឈប់ម៉ូតូកង់បីនៅលើខឿនរបងសណ្ឋាគារកាំបូឌីយ៉ា ហើយដេកលក់ ស្រាប់តែជនរងគ្រោះដាស់ហៅទៅផឹកស៊ី។ ដោយរូបគេប្រាប់ថា យប់ហើយមិនទៅទេ ជនរងគ្រោះក៏ដើរត្រឡប់ទៅម៉ូតូរ៉ឺម៉កកង់បីរបស់ខ្លួនដែលឈប់ចតនៅចិញ្ចើមផ្លូវខាងត្បូងមាត់ច្រកចូលសណ្ឋាគារកាំបូឌីយ៉ាណាប្រមាណ៣០ម៉ែត្រវិញ ។ ពេលគេបញ្ឆេះម៉ូតូបំរុងបើកចេញ ស្រាប់តែត្រូវរថយន្ដមិនស្គាល់ម៉ាកពណ៌ទឹកប្រាក់បើកបរក្នុងល្បឿនលឿនជ្រុលទៅបុកតែម្តង ។ អ្នកបើករថយន្តនោះទំនងក្នុងសភាពស្រវឹងជោកងោកមិនដឹងខ្លួន ទើបបុករ៉ឺម៉កម៉ូតូពីក្រោយពេញទំហឹង និងបុករះបង្គោលច្រវាក់តាមរបងខឿនផងដែរ ។ បន្ទាប់មករថយន្ដនោះបើកគេចបាត់ តែបានជ្រុះស្លាកលេខ និងកាងនៅកន្លែងកើតហេតុ ។
ប្រភពព័ត៌មាននៅកន្លែងកើតហេតុអះអាងថា តាមមើលកាងដដែលជ្រុះ គឺបញ្ជាក់ថា ជារថយន្ដឡិចស៊ីស ឬរថយន្ដឡង់គ្រីស្ស័រ ប៉ុន្ដែតាមការអះអាងរបស់អ្នកជំនាញខាងរថយន្ដនិយាយថា ជាកាងរថយន្ដម៉ាករ៉េហ្វ័រ ។ សពជនរងគ្រោះត្រូវសាច់ញាតិយកទៅធ្វើបុណ្យនៅស្រុកកំណើតទាំងយប់ ។ ចំណែករ៉ឺម៉កម៉ូតូ ព្រមទាំងស្លាកលេខ និងកាងរថយន្ដបង្កហេតុត្រូវប៉ូលិសចរាចរជើងគោកយកទៅរក្សាទុកនៅស្នងការដ្ឋាននគរបាលរាជធានីភ្នំពេញ ដើម្បីស្រាវជ្រាវរកមុខម្ចាស់ឱ្យទទួលខុសត្រូវចំពោះគ្រោះថ្នាក់ដ៏ធ្ងន់ធ្ងរនេះ ៕
ចែករំលែកព័តមាននេះ