ខេត្តបន្ទាយមានជ័យ ៖ កាលពីវេលាម៉ោង១០ព្រឹកថ្ងៃទី២៩ មេសា មានការភ្ញាក់ផ្អើលមួយបានកើតឡើងព្រោះតែរថយន្តកាមរីមួយគ្រឿងបានបុករនាំងបង្កាន់ដៃស្ពានឈើព្រះពន្លា បណ្តាលឱ្យធ្លាក់ចូលស្ទឹងបះជើងឡើងលើ។ ហេតុការណ៍នេះបានកើតឡើងនៅភូមិព្រះពន្លា សង្កាត់ព្រះពន្លា ក្រុងសិរីសោភ័ណ
ខេត្តបន្ទាយមានជ័យ ៖ កាលពីវេលាម៉ោង១០ព្រឹកថ្ងៃទី២៩ មេសា មានការភ្ញាក់ផ្អើលមួយបានកើតឡើងព្រោះតែរថយន្តកាមរីមួយគ្រឿងបានបុករនាំងបង្កាន់ដៃស្ពានឈើព្រះពន្លា បណ្តាលឱ្យធ្លាក់ចូលស្ទឹងបះជើងឡើងលើ។ ហេតុការណ៍នេះបានកើតឡើងនៅភូមិព្រះពន្លា សង្កាត់ព្រះពន្លា ក្រុងសិរីសោភ័ណ។
បើតាមការឱ្យដឹងពីប្រភពព័ត៌មានជុំវិញកន្លែងកើតហេតុបានឱ្យដឹងថា អ្នកបើកបររថយន្តស្ទើរភ្លើងឈ្មោះសុង សាំង ភេទប្រុស អាយុ២២ឆ្នាំ នៅភូមិ៤ សង្កាត់ព្រះពន្លា ក្រុងសិរីសោភ័ណ ។ រីឯរថយន្តបុកបង្កាន់ដៃស្ពានហើយធ្លាក់ចូលក្នុងស្ទឹងនោះម៉ាកកាមរីពណ៌ខ្មៅ ស៊េរី ២០០១ ស្លាកលេខត្រូវបានម្ចាស់រថយន្តឈ្មោះផល ហោះ ភេទប្រុស អាយុ២៣ឆ្នាំ នៅភូមិព្រៃឫស្សី សង្កាត់ព្រះពន្លា ដោះលាក់ទុកមិនឱ្យសមត្ថកិច្ចដឹង ។ ករណីនេះត្រូវបានម្ចាស់រថយន្តនោះអះអាងថា បើព័ត៌មានផ្សាយឱ្យដឹងពីស្លាកលេខខ្លាចក្រែងមិនអាចលក់រថយន្តរបស់គេចេញបាន ។
ប្រភពព័ត៌មាននៅកន្លែងកើតហេតុបានឱ្យដឹងទៀតថា មុនពេលកើតហេតុគេបានឃើញរថយន្តនេះបើកក្នុងល្បឿនយ៉ាងលឿនឆ្លងកាត់ស្ពានពីកើតទៅលិច ពេលនោះកង់រថយន្តបានធ្លាក់ពីលើកំណល់ឈើបណ្តោយស្ពាន ហើយអ្នកបើកបរបានបួងចង្កូតដើម្បីឡើងលើកំណល់ឈើនោះវិញ ក៏ជ្រុលទៅបុករនាំងបង្កាន់ដៃស្ពានបណ្តាលឱ្យបាក់ចំនួន២ប្រឡោះធ្លាក់រថយន្តចូលស្ទឹងនៅកម្ពស់់ប្រហែល៧ម៉ែត្រ ហើយរថយន្តបានបះជើងឡើងលើ ។ អ្នកដែលបានឃើញហេតុការណ៍នោះផ្ទាល់ភ្នែកបាននិយាយថា នេះមិនខុសពីរឿងកុនហូលីវូដ ដែលសមត្ថកិច្ចដេញតាមចាប់ជនល្មើសនោះទេ ។ ពួកគាត់បាននិយាយថា នេះគឺសំណាងមួយក្នុងមួយពាន់គ្រោះថ្នាក់ ដោយរថយន្តធ្លាក់ប៉ះចំដីគោកហើយសើមបណ្តាលឱ្យអ្នកបើកបរគ្រាន់តែរងរបួសត្រូវបានគេជួយសង្គ្រោះយកទៅមន្ទីរពេទ្យ។ ប្រសិនជាធ្លាក់ចូលក្នុងទឹកស្ទឹងវិញ មិនដឹងជាវាសនាគេនឹងទៅជាយ៉ាងណានោះទេ ។
បើតាមសម្តីរបស់ឈ្មោះផល ហោះ ជាម្ចាស់រថយន្តបានឱ្យដឹងថា ឈ្មោះសុង សាំង បានខ្ចីរថយន្តរបស់គេបើកទៅយកស្បែកជើងដែលដេរនៅផ្សារសិរីសោភ័ណ ហើយក៏ជួបនូវឧប្បត្តិហេតុនេះតែម្តង ។ មន្ត្រីនគរបាលចរាចរបានឱ្យដឹងដែរថា រថយន្តត្រូវបានស្ទូចយកមកកាន់ការិយាល័យចរាចរណ៍ខេត្ត ដើម្បីឱ្យម្ចាស់មកដោះស្រាយសំណងឬជួសជុលបង្កាន់ដៃស្ពានដែលខូចខាតជូនរដ្ឋវិញ ៕
ចែករំលែកព័តមាននេះ