ខេត្តឧត្តរមានជ័យ ៖ ផ្ទះអាជីវករលក់គ្រឿងទេស និងលក់ទូរស័ព្ទដៃមួយកន្លែងនៅក្នុងបរិវេណផ្សារទំនប់ដាច់ ស្ថិតក្នុងឃុំទំនប់ដាច់ ស្រុកត្រពាំងប្រាសាទ ត្រូវបានក្រុមចោរគាស់ជញ្ជាំងស័ង្កសីចូលភ្ជង់ប្លន់យកទ្រព្យសម្បត្តិ
ខេត្តឧត្តរមានជ័យ ៖ ផ្ទះអាជីវករលក់គ្រឿងទេស និងលក់ទូរស័ព្ទដៃមួយកន្លែងនៅក្នុងបរិវេណផ្សារទំនប់ដាច់ ស្ថិតក្នុងឃុំទំនប់ដាច់ ស្រុកត្រពាំងប្រាសាទ ត្រូវបានក្រុមចោរគាស់ជញ្ជាំងស័ង្កសីចូលភ្ជង់ប្លន់យកទ្រព្យសម្បត្តិអស់ជាច្រើនកាលពីវេលារំលងអាធ្រាត្រឈានចូលថ្ងៃទី៧ តុលា ២០១៥ ។
ម្ចាស់ផ្ទះរងគ្រោះមានឈ្មោះ អៀត វ៉ាន់ធី មានប្រពន្ធឈ្មោះ សុខ បញ្ញា បានរៀបរាប់ឲ្យដឹងថា មុនពេលកើតហេតុ នៅវេលាម៉ោង៦ល្ងាច ថ្ងៃទី៦ តុលា ២០១៥ ២នាក់ប្តីប្រពន្ធបាននាំគ្នារៀបចំគ្រឿងទេស និងសម្ភារផ្សេងៗដាក់ចូលទៅខាងក្នុងផ្ទះ រួចក៏នាំកូនចូលដេកលុងលក់បាត់ទៅ ។ ម្ចាស់ផ្ទះរងគ្រោះបានបញ្ចាក់ថា បន្ទាប់មកពួកគាត់បានឮសំឡេងគាស់ជញ្ជាំងផ្ទះ ក៏នាំប្តីប្រពន្ធក្រោកពីដំណេក ភ្លាមៗនោះស្រាប់តែក្រុមចោរដែលមានបក្ខពួក៤នាក់ ចូលមកដល់ក្នុងផ្ទះរួចដកកាំភ្លើងខ្លីមកភ្ជង់គំរាមឲ្យយកលុយ និងមាសមកឲ្យពួកគេ បើមិនព្រមយកឲ្យទេនឹងបាញ់សម្លាប់ចោល ចំណែករូបគាត់ទាំងពីនាក់ប្តីប្រពន្ធបានយកលុយ១០លានរៀល និងខ្សែដៃមាសទម្ងន់៥ជី ចិញ្ចៀន១វង់ទម្ងន់៣ជី ប្រគល់ទៅឲ្យក្រុមចោរ តែក្រុមចោរនៅតែមិនអស់ចិត្តនៅតែរើកកាយរកឃើញកាតទូរស័ព្ទដែលមានតម្លៃទឹកប្រាក់ស្មើ១ពាន់ដុល្លាអាមេរិកយកទៅទៀត រួចចេញទៅវិញដោយសុវត្ថិភាពដោយគ្មានរំខានដល់សមត្ថកិច្ចប៉ូលិសប៉ុស្តិ៍ឃុំទំនប់ដាច់ ដែលនៅជិតបង្កើយនោះឡើយ ។
ទាក់ទិនហេតុការណ៍គាត់ជញ្ជាំងផ្ទះចូលប្លន់នេះ សមត្ថកិច្ចប៉ូលិសបានឲ្យដឹងថា សមត្ថកិច្ចប៉ូលិសបានទៅដល់កន្លែងកើតហេតុឃើញជញ្ជាំងផ្ទះដែលបាំងស័ង្កសីមានស្នាមគាស់ពិតប្រាកដមែន ហើយផ្ទះដែលលក់គ្រឿងទេសនេះកន្លងមកតែងតែកើតមានចោរចូលលួចទ្រព្យសម្បត្តិ៣-៤ដងមកហើយដែរ ។ សមត្តកិច្ចបានបញ្ចាក់ថា ករណីនេះសមត្ថកិច្ចមិនបានទទួលព័ត៌មានរាយការណ៍ឲ្យដឹង ទើបក្រុមចោរបានធ្វើសកម្មភាពរួចហើយចាកចេញទៅវិញដោយសុវត្តិភាព តែទោះជាបែបណា សមត្ថកិច្ចបាននិងកំពុងយកចិត្តទុក្ខដាក់ធ្វើការស្រាវជ្រាវវែកមុខក្រុមចោរបន្តទៀតដើម្បីយកមកផ្តន្ទាទោស ៕
ចែករំលែកព័តមាននេះ