រាជធានីភ្នំពេញ ៖ ស្ដ្រីខារ៉ាអូខេ២ក្រុមដែលមានហាងជិតគ្នា ដោយសារការឌឺដងជាពាក្យសម្ដីទៅវិញទៅមក ចុងក្រោយបានឈានដល់ការផ្ទុះហិ.ង្សាវាយតប់គ្នាមួយប្រាវ បង្កការភ្ញាក់ផ្អើលតាមផ្លូវសាធារណៈ
រាជធានីភ្នំពេញ ៖ ស្ដ្រីខារ៉ាអូខេ២ក្រុមដែលមានហាងជិតគ្នា ដោយសារការឌឺដងជាពាក្យសម្ដីទៅវិញទៅមក ចុងក្រោយបានឈានដល់ការផ្ទុះហិង្សាវាយតប់គ្នាមួយប្រាវ បង្កការភ្ញាក់ផ្អើលតាមផ្លូវសាធារណៈ កាលពីវេលាម៉ោង១ និង១៥នាទីរំលងអធ្រាត្រ ឈានចូលថ្ងៃទី៤ តុលា ២០១៥ នៅផ្លូវលេខ២០០៤ ភូមិត្រពាំងល្វា សង្កាត់កាកាប ខណ្ឌពោធិសែនជ័យ ។
ប្រភពព័ត៌មានបានប្រាប់ថា មុនកើតហេតុគេឃើញនារីៗបម្រើការនៅហាងខារ៉ាអូខេញូវស្កាយ មានសម្ដីឌឺដងដាក់គ្នាជាមួយនារីៗនៅហាងខារ៉ាអូខេអង្គរខ្មែរ ដែលនៅជាប់គ្នា ។ លុះបន្តិចក្រោយមកស្រាប់តែឈានដល់ការវាយតប់ និងយកដុំថ្មដេញគប់គ្នាប្រសាចពេញផ្លូវ និងបានគប់ដុំថ្មចូលពេញក្នុងហាងប៊្លូថោន ដែលនៅម្ខាងផ្លូវ បណ្ដាលឱ្យមានអ្នករបួសស្រាលជាច្រើននាក់ និងបណ្ដាលឱ្យបែកកញ្ចក់ទ្វារហាងផង ។
បើតាមម្ចាស់ហាងញូវស្កាយ និយាយថា មូលហេតុដែលបណ្ដាលឱ្យមានការដេញវាយគ្នា គឺមកពីខាងហាងខារ៉ាអូខេអង្គរខ្មែរ និងខារ៉ាអូខេប៊្លូថោន នាំគ្នាមកវាយកូនចៅគាត់មុនបណ្ដាលឱ្យរងរបួស ទើបគាត់បកទៅរករឿងវិញ ។
ទោះបីជាបែបណា បើតាមម្ចាស់ហាងខារ៉ាអូខេប៊្លូថោន និយាយថា តាមពិតមុនកើតហេតុគាត់ឃើញម្ចាស់ហាងខារ៉ាអូខេញូវស្កាយ មានទំនាស់ជាមួយហាងខារ៉ាអូខេអង្គរខ្មែរ និងដេញវាយគ្នាមកដល់មុខហាងរបស់គាត់ ។ ជាមួយនេះ មានគប់ដុំថ្មដាក់គ្នាទៅវិញទៅមក បណ្ដាលឱ្យដុំថ្មទាំងនោះហោះចូលពេញក្នុងហាងរបស់គាត់ និងថែមទាំងបែកកញ្ចក់ទ្វារហាងរបស់គាត់ទៀតផង ។
ប្រភពពីបុរសម្នាក់សុំមិនបញ្ចេញឈ្មោះដែលប្រកបរបររត់ម៉ូតូឌុបនៅចំណុចខាងលើនិយាយថា មូលហេតុដែលម្ចាស់ហាងខារ៉ាអូខេឈ្លោះទាស់ទែងគ្នានេះ មិនមានអ្វីក្រៅពីដណ្ដើមម៉ូយគ្នាទៅវិញទៅមកនោះទេ ។ គេតែងតែឃើញស្ដ្រីដែលបម្រើការនៅតាមបណ្ដោយផ្លូវខាងលើ មានការឈ្លោះទាស់ទែងគ្នាសឹងតែរាល់យប់ទៅហើយ និងមានការដេញចាប់ម៉ូយរញ៉េរញ៉ៃពេញដងផ្លូវ ដូចនេះពួកគាត់សូមឱ្យអាជ្ញាធរមូលដ្ឋានជួយមើលសណ្ដាប់ធ្នាប់នៅចំណុចខាងលើផង ។
ក្នុងករណីវាយ និងគប់ដុំថ្មដាក់គ្នារវាងហាងខារ៉ាអូខេខាងលើ ក្រោយកើតហេតុ គេឃើញកងរាជអាវុធហត្ថខណ្ឌពោធិ៍សែនជ័យចុះទៅសម្របសម្រួលផងដែរ ។
ជាការពិតណាស់ អ្នកមានរបរដូចគ្នាហើយនៅជិតគ្នាបែបនេះ កម្រមានសន្តិភាពរវាងគ្នានឹងគ្នាណាស់ ៕
ចែករំលែកព័តមាននេះ