រាជធានីភ្នំពេញ ៖ ស្ត្រីចំណាស់ជាអ្នកកត់កន្ទុយលេខដុះស្លែម្នាក់ដែលជំនាញខាងដាក់តុអង្គុយទទួលកត់ឆ្នោតលើដងផ្លូវសាធារណៈមិនខ្វល់ពីនគរបាល ឬកម្លាំងអាជ្ញាធរនោះ កាលពីវេលាម៉ោង៣រសៀល ថ្ងៃទី២១ ខែកញ្ញា ឆ្នាំ២០១៥
រាជធានីភ្នំពេញ ៖ ស្ត្រីចំណាស់ជាអ្នកកត់កន្ទុយលេខដុះស្លែម្នាក់ដែលជំនាញខាងដាក់តុអង្គុយទទួលកត់ឆ្នោតលើដងផ្លូវសាធារណៈមិនខ្វល់ពីនគរបាល ឬកម្លាំងអាជ្ញាធរនោះ កាលពីវេលាម៉ោង៣រសៀល ថ្ងៃទី២១ ខែកញ្ញា ឆ្នាំ២០១៥ ត្រូវបានកម្លាំងចម្រុះខណ្ឌមានជ័យ ចុះធ្វើការបង្ក្រាបបានជាក់ស្តែងតែម្តង នៅចំណុចផ្លូវបេតុងតូចមួយកន្លែង ក្បែរផ្លូវជាតិលេខ២ ស្ថិតក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ ។
ស្ត្រីជាអ្នកកត់កន្ទុយលេខខាងលើមានឈ្មោះ ហេង សុធារី អាយុ៥២ឆ្នាំ មុខរបរកត់ឆ្នោតជាង២០មកហើយ បច្ចុប្បន្នស្នាក់នៅផ្ទះជួលកន្លែងចាប់ខ្លួន និងមានស្រុកកំណើតនៅភូមិក្រូចឆ្មារ ស្រុកក្រូចឆ្មារ ខេត្តកំពង់ចាម ។
លោក ឌី រ័ត្នខេមរុណ អភិបាលរងខណ្ឌមានជ័យ ដែលដឹកនាំកម្លាំងចុះបង្ក្រាបផ្ទាល់ បានមានប្រសាសន៍ឱ្យដឹងថា ដោយមានការស្រាវជ្រាវ ក៏ដូចជាមានការចង្អុលបង្ហាញផ្ទាល់ពីសំណាក់លោក ពេជ្រ កែវមុនី អភិបាល នៃគណៈអភិ បាលខណ្ឌមានជ័យ ពីទីតាំងល្បែងកន្ទុយលេខខុសច្បាប់ខាងលើ ទើបនៅវេលាម៉ោង៣រសៀលថ្ងៃកើតហេតុ ដោយមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញ លោក ខាំ សុផារី ផងនោះ កម្លាំងអាជ្ញាធរចម្រុះខណ្ឌមានជ័យបានចុះមកធ្វើការបង្ក្រាបបានជាក់ស្តែងតែម្តង ខណៈស្ត្រីអ្នកកត់កន្ទុយលេខកំពុងអង្គុយដាក់តុកត់យ៉ាងរំភើយ មិនខ្វាយខ្វល់ពីសមត្ថកិច្ចទាល់តែសោះ ។
ក្នុងការចុះបង្ក្រាបខាងលើ ស្ត្រីអ្នកកន្ទុយលេខបានឆ្លើយប្រាប់ថា រូបគាត់ប្រកបរបររកស៊ីកត់ឆ្នោតតាំងពីឆ្នាំ១៩៨០ជាងមកម្ល៉េះ មិនដែលអ្នកណាបង្ក្រាបគាត់ឡើយ ។ គាត់បន្តថា កន្លងមកក៏ធ្លាប់មាននគរបាលមូលដ្ឋានចុះមកអប់រំណែនាំផងដែរ ប៉ុន្តែបើគាត់ឈប់រកស៊ីរបរនេះ មិនដឹងថា គាត់ត្រូវទៅធ្វើអ្វីទៀតនោះទេ បើគាត់ចំណាស់នេះទៅហើយ ។ ស្ត្រីជាមេកន្ទុយលេខដដែលឱ្យដឹងទៀតថា គាត់កត់ឆ្នោតរាល់ថ្ងៃនេះ គឺកត់ឱ្យមេធំនៅពីលើនោះទេ ដោយក្នុងមួយថ្ងៃជាអតិបរិមា គាត់កត់បានជាង១លានរៀល ហើយក្នុងជាង១លាននោះ គាត់ទទួលបានជាង៦ម៉ឺន ទៅ៧ម៉ឺនរៀល ទុកគ្រាន់ចិញ្ចឹមឆ្នាំងបាយ ។
សូមបញ្ជាក់ថា ក្នុងការចុះបង្ក្រាបខាងលើនេះ អាជ្ញាធរបានធ្វើការដកហូតម៉ាស៊ីនគិតលេខ៣គ្រឿង, ទូរស័ព្ទដៃ២គ្រឿង, កៅស៊ូ១ស្បោងធំ, ក្រដាសដាន, ក្រដាសកត់ឆ្នោត រួមទាំងសម្ភារមួយចំនួនផងដែរ ។
ទោះជាយ៉ាងណា បច្ចុប្បន្នស្ត្រីអ្នកកត់ឆ្នោត និងវត្ថុតាងត្រូវបានបញ្ចូនទៅកាន់ទីបញ្ជាការដ្ឋានកងរាជអាវុធហត្ថខណ្ឌមានជ័យ ដើម្បីធ្វើការសាកសួរបន្ថែម និងត្រៀមកសាងសំណុំរឿងបញ្ចូនទៅតុលាការចាត់ការទៅតាមផ្លូវច្បាប់ ៕
ចែករំលែកព័តមាននេះ