ខេត្តស្វាយរៀង ៖ មន្ត្រីពេទ្យស្រុកប្រតិបត្តិជីភូម្នាក់ ត្រូវសមត្ថកិច្ចនគរបាលស្រុកស្វាយទាបចាប់ខ្លួនពីបទចាក់ថ្នាំអ្នកជំងឺវ័យ៧១ឆ្នាំម្នាក់បណ្តាលឲ្យស្លា.ប់ កាលពីវលាម៉ោង១២និង៣០នាទីរសៀលថ្ងៃទី៩ កញ្ញា
ខេត្តស្វាយរៀង ៖ មន្ត្រីពេទ្យស្រុកប្រតិបត្តិជីភូម្នាក់ ត្រូវសមត្ថកិច្ចនគរបាលស្រុកស្វាយទាបចាប់ខ្លួនពីបទចាក់ថ្នាំអ្នកជំងឺវ័យ៧១ឆ្នាំម្នាក់បណ្តាលឲ្យស្លាប់ កាលពីវលាម៉ោង១២និង៣០នាទីរសៀលថ្ងៃទី៩ កញ្ញា ២០១៥ នៅភូមិដើមពោធិ៍ ឃុំកណ្តៀងរាយ ស្រុកស្វាយទាប ។
មន្ត្រីនគរបាលស្រុកស្វាយទាប បានឲ្យដឹងថា ជនរងគ្រោះ ឈ្មោះ ស៊ិន សារុន ភេទប្រុស អាយុ៧១ឆ្នាំ ជាប្រជាកសិករ មានប្រពន្ធ ឈ្មោះ ម៉ៅ យុក អាយុ៦១ឆ្នាំ និងមានកូន៩នាក់ (ស្រី៧នាក់) បានរៀបការអស់ហើយ មានទីលំនៅក្នុងភូមិកើតហេតុខាងលើ ។
ស្ត្រីជាប្រពន្ធ បានរៀបរាប់ថា មុនពេលកើតហេតុ នៅវេលាម៉ោង៨ព្រឹក ប្តីគាត់បានទៅកាត់ស្មៅឲ្យគោនៅវាលក្រោយផ្ទះរហូតដល់ម៉ោងប្រមាណជា១១និង៣០នាទីព្រឹកក៏វិលមុខរកដួលក៏ស្រែកហៅអ្នកភូមិឲ្យជួយ អ្នកភូមិបាននាំគ្នាចាប់រឹតប្រេងខ្យល់ធ្វើចលនាបេះដូងឲ្យមួយសន្ទុះបានធូរស្រាលក៏គ្រាហ៍គាត់ដើរទៅផ្ទះរហូតដល់ម៉ោង១២ថ្ងៃត្រង់ គាត់មានអការៈចុកដើមទ្រូងក៏ឲ្យកូនស្រីទូរស័ព្ទហៅគ្រូពេទ្យ ឈ្មោះ សារុំ ភក្តី ជាមន្ត្រីមន្ទីរពេទ្យបង្អែកស្រុកប្រតិបត្តិជីភូ ឲ្យមកពិនិត្យព្យាបាលដល់ផ្ទះ ។
ពេលគ្រូពេទ្យមកដល់ក៏ពិនិត្យជំងឺ រួចបានឲ្យគាត់លេបថ្នាំកន្លះគ្រាប់ បន្ទាប់មកក៏បូមថ្នាំ២សារាង ចាក់ត្រង់ត្រគាក២ម្ជុល រួចក៏ត្រឡប់ទៅវិញ បានប្រមាណ១៥នាទីស្រាប់តែគាត់មានអាការៈមិនស្រួល កូនស្រីបានទូរស័ព្ទហៅគ្រូពេទ្យឲ្យត្រឡប់មកវិញ ប៉ុន្ងែគ្រូពេទ្យឆ្លើយថា មិនអីទេ ចាំខ្ញុំឲ្យរថយន្តសាមុយពេទ្យជីភូមកដឹកយកទៅមន្ទីរពេទ្យដើម្បីសង្គ្រោះ បន្ទាប់មកគាត់ក៏ឡេសឡាស់ដូចជាប្រតិកម្មថ្នាំប្រកាច់សន្លប់បាត់បង់ស្មារតី ពេលរថយន្តសាមុយមកដល់បានធ្វើចលនាបេះដូងរួចលើកគាត់ដាក់លើរថយន្តដឹកទៅកាន់មន្ទីរពេទ្យ ពេលទៅដល់មន្ទីរពេទ្យគ្រូពេទ្យមកធ្វើចលនាបេះដូងមួយសន្ទុះប្រាប់ថា គាត់បានស្លាប់ហើយ ប្រហែលជាស្លាប់តាំងពីនៅផ្ទះម្ល៉េះ សង្ស័យបណ្តាលមកពីគាំងបេះដូង ៕
ព័ត៌មានលម្អិតមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ