រាជធានីភ្នំពេញ ៖ ជនសង្ស័យម្នាក់បានដើរមកឆក់កាបូបលុយរបស់អាជីវករលក់ផ្លែឈើនៅផ្សារនាគមាស ខណៈកំពុងអង្គុយរាប់លុយ រួចរត់ឡើងជិះម៉ូតូបក្ខពួកគេចខ្លួនដោយសុវត្ថិភាព ដែលហេតុការណ៍នេះកើតឡើង
រាជធានីភ្នំពេញ ៖ ជនសង្ស័យម្នាក់បានដើរមកឆក់កាបូបលុយរបស់អាជីវករលក់ផ្លែឈើនៅផ្សារនាគមាស ខណៈកំពុងអង្គុយរាប់លុយ រួចរត់ឡើងជិះម៉ូតូបក្ខពួកគេចខ្លួនដោយសុវត្ថិភាព ដែលហេតុការណ៍នេះកើតឡើងកាលពីវេលាម៉ោង១០ និង៣៥នាទីយប់ ថ្ងៃទី០២ ខែកញ្ញា ឆ្នាំ២០១៥ នៅចំណុចមហាវិថីម៉ៅសេទុង កែងផ្លូវ២៣០ ស្ថិតក្នុងសង្កាត់ផ្សារដើមគរ ខណ្ឌទួលគោក ។
ស្ត្រីរងគ្រោះដែលត្រូវចោរឆក់កាបូបនេះមានឈ្មោះ មាស រដ្ឋា អាយុ៣១ឆ្នាំ មុខរបរលក់ផ្លែឈើបោះដុំនៅផ្សារនាគមាស មានទីលំនៅនៅក្រុងតាខ្មៅ ខេត្តកណ្តាល ។
ស្ត្រីរងគ្រោះបានឱ្យដឹងថា មុនពេលកើតហេតុ បន្ទាប់ពីលក់ដូរហើយ ស្ត្រីរងគ្រោះបានយកកាបូបលុយមកចាក់លុយដើម្បីរាប់ ខណៈពេលកំពុងចាក់លុយស្រាប់តែជនសង្ស័យ៤នាក់ជិះម៉ូតូ២គ្រឿង ១គ្រឿងម៉ាកនិច ពណ៌ស និង១គ្រឿងទៀតម៉ាកហុងដា ឌ្រី ស៊េរី២០១៥ ពណ៌ខ្មៅ បានជិះម៉ូតូមកឈប់ម៉ូតូក្បែរនោះ ហើយជនសង្ស័យម្នាក់បានចុះពីម៉ូតូដើរសំដៅមកគាត់ ហើយក៏ឆក់កាបូបលុយរបស់គាត់រត់ឡើងជិះម៉ូតូបក្ខពួកគេចខ្លួនបាត់ដោយសុវត្ថិភាព ។
ស្ត្រីរងគ្រោះបានឱ្យដឹងទៀតថា លុយនៅក្នុងកាបូបទាំងអស់មានប្រហែលជា៨០ម៉ឺនរៀល និងទូរស័ព្ទម៉ាកណូគា១គ្រឿង ប៉ុន្តែពេលឆក់ទៅលុយជ្រុះរាយប៉ាយ ពេលនេះកំពុងប្រមូលរាប់ ដោយមិនដឹងថានៅសល់ប៉ុន្មាន និងឆក់យកទៅអស់ប៉ុន្មាននៅឡើយទេ ។
សូមបញ្ជាក់ផងដែរថា ក្រោយពេលកើតហេតុ គេមិនឃើញមានសមត្ថកិច្ចណាមកសួរនាំ ឬតាមប្រមាញ់ជនសង្ស័យឡើយ គឺឃើញតែក្រុមអាជីវករលក់ដូរដូចគ្នាមកចោមរោមសួរនាំតែប៉ុណ្ណោះ ។
គួរកត់សម្គាល់ថា អំពើលួច ឆក់ ប្លន់ និងគ្រោះថ្នាក់ចរាចរណ៍កើតឡើងស្ទើរតែរាល់ថ្ងៃ-យប់នៅក្នុងររាជធានីភ្នំពេញ ហេតុដូច្នេះសូមបងប្អូនប្រជាពលរដ្ឋទាំងអស់មានការប្រុងប្រយ័ត្ន ៕
ចែករំលែកព័តមាននេះ