ខេត្តត្បូងឃ្មុំ ៖ ហេតុការណ៍ភ្ញាក់ផ្អើលមួយបានកើតឡើងដោយសារស្ត្រីវៀតណាម្នាក់បានខាំអណ្តាតខ្លួនឯងធ្វើអត្តឃាត ហើយត្រូវបានគេប្រទះឃើញដេកស្លាប់នៅក្នុងរថយន្តមួយគ្រឿង នៅលើផ្លូវជាតិ៧២ ម្តុំមុខវត្តត្រពាំងផ្លុង ស្ថិតក្នុងភូមិត្រពាំងផ្លុងទី១ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ កាលពីវេលាម៉ោងជាង៣រសៀល ថ្ងៃទី១ កញ្ញា ២០១៥ ។
លោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្តបានមានប្រសាសន៍ឲ្យដឹងថា សពស្ត្រីវៀតណាមនេះបានស្គាល់អត្តសញ្ញាណហើយ គឺឈ្មោះ ប៊ួយ គីមវ៉ា អាយុ៣៨ឆ្នាំ ហើយមានប្តីឈ្មោះ សុខ ចាយ អាយុ៤៣ឆ្នាំ ស្រុកកំណើតខេត្តតៃនិញ ប្រទេសវៀតណាម ។
ប្រភពពីសមត្ថកិច្ចបានប្រាប់ឲ្យដឹងថា ក្រោយពីបានប្រទះឃើញសពស្ត្រីវៀតណាមនោះ កម្លាំងប៉ុស្តិ៍មូលដ្ឋានបានរាយការណ៍ទៅលោកស្នងការនគរបាលខេត្ត ហើយត្រូវបានលោកស្នងការចាត់ឲ្យក្រុមនគរបាលបច្ចេកទេសខេត្តចុះទៅពិនិត្យ និងធ្វើកោសល្យវិច្ច័យសព ដោយមានលោកព្រះរាជអាជ្ញារងអមសាលាដំបូងខេត្តមួយចុះទៅពិនិត្យដែរ ។
ស្ថិតក្រោមដំណក់ទឹកភ្លៀង សមត្ថកិច្ចជាច្រើននាក់បានកំពុងតែយកចិត្តទុកដាក់ពិនិត្យមើលថា តើករណីនេះជាអំពើឃាតកម្ម ឬមួយយ៉ាងណា ។
ក្រោយពេលពិនិត្យសពយ៉ាងល្អិតល្អន់ លោកអធិការរងស្រុកពញាក្រែកមួយរូបបានព្រលយឱ្យដឹងថា ស្ត្រីរងគ្រោះរូបនេះបានស្លាប់ដោយធ្វើអត្តឃាតខាំអណ្តាតខ្លួនឯង ព្រោះតែខឹងប្តីរបស់ខ្លួនដែលជាជនជាតិវៀតណាមដូចគ្នា ។
ប្រភពបានឲ្យដឹងទៀតថា ស្ត្រីជនជាតិវៀតណាមម្នាក់ស្លៀកខោខ្លី បានដេកស្លាប់នៅក្នុងរថយន្ត១គ្រឿង ម៉ាកវីណា ពាក់ស្លាកលេខ ភ្នំពេញ 2AB-6415 ត្រូវបានគេទន្លាយឲ្យដឹងមាន មុខងារជាមេរូលីង បម្រើការងារនៅក្នុងកាស៊ីណូមួយកន្លែង នៅច្រកអន្តរជាតិត្រពាំងផ្លុង ស្រុកពញាក្រែក ។ រថយន្តនេះត្រូវបានគេប្រទះឃើញឈប់តាំងពីព្រឹកមកម្ល៉េះ តែមិនមានអ្នកណាចាប់អារម្មណ៍ ចេះតែជិះទៅហួសមកហួស ទើបតែភ្ញាក់ផ្អើលនៅវេលាម៉ោងជាង៣ រសៀលនេះ ។
ពេលនេះ សមត្ថកិច្ចកំពុងតែរៀបចំប្រគល់សពឲ្យទៅសាច់ញាតិ ដើម្បីយកទៅធ្វើបុណ្យតាមប្រពៃណីហើយដែរ ៕
ចែករំលែកព័តមាននេះ