រាជធានីភ្នំពេញ ៖ ជនរងគ្រោះម្នាក់បានស្លាប់ភ្លាមៗនៅកន្លែងកើតហេតុដោយសារត្រូវរថយន្ត១គ្រឿងម៉ាក Tundra បើកមកបុកម៉ូតូរបស់ខ្លួនកាលពីវេលាម៉ោង៣ និង៤០នាទីរសៀលថ្ងៃទី៣១ កក្កដា ២០១៥ នៅតាមបណ្តោយផ្លូវជាតិលេខ៦អា ត្រង់ចំណុចកែងផ្លូវលីយ៉ុងផាត់ ស្ថិតក្នុងភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ ។
ប្រភពពីសមត្ថកិច្ចបានឱ្យដឹងថា ជនរងគ្រោះឈ្មោះ សុខ ប៊ុនថាន អាយុ២៨ឆ្នាំ មានទីលំនៅភូមិត្រពាំងត្រល់ ឃុំត្រឡា ស្រុកកំពង់សៀម ខេត្តកំពង់ចាម ។ រីឯអ្នកបើករថយន្តមានឈ្មោះ ឡាង ស៊ីណាត ភេទប្រុស អាយុ២៣ឆ្នាំ មានទីលំនៅនៅសង្កាត់ព្រែកលៀប ។
ប្រភពបានឱ្យដឹងទៀតថា មុនពេលកើតហេតុគេឃើញរថយន្ត១គ្រឿងម៉ាក Tundra ពណ៌ស ពាក់ស្លាកលេខ ភ្នំពេញ 2Y-9839 ធ្វើដំណើរចូលទីក្រុងភ្នំពេញ ស្រាប់តែមកដល់កន្លែងកើតហេតុបានបុកម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ កំពង់ចាម 1K-2879 បើកបរក្នុងទិសដៅបញ្ច្រាសទិសគ្នាដែលបានបត់ឆ្វេងទៅខាងស្រុកមុខកំពូល បណ្តាលឱ្យម៉ូតូអូសពីក្រោមឡាន រីឯអ្នកបើកបរម៉ូតូប៉ើងផ្លោងប្រហែល៣០ម៉ែត្រស្លាប់ភ្លាមៗតែម្តង ។
ក្រោយពេលកើតហេតុ អ្នកបើកបររថយន្តត្រូវបានឃាត់ខ្លួន និងដកហូតបានកាំភ្លើងអាកា១ដើមនៅក្នុងរថយន្តទៀតផង ។
ព័ត៌មានលម្អិតនឹងផ្សាយនៅលើទំព័រកាសែតកោះសន្តិភាព
ចែករំលែកព័តមាននេះ