ខេត្តកំពត ៖ រថយន្តម៉ាកសាំងយ៉ុងពណ៌សមួយគ្រឿងដឹកផ្លែចេកពីប្រទេសវៀតណាមបានផ្ទុះកង់ក្រោយផ្នែកខាងស្តាំ ហើយរេចង្កូតទៅបុកផ្ទះអ្នកភូមិបណ្តាលឱ្យរងការខូចខាតសំយាបខាងមុខ
ខេត្តកំពត ៖ រថយន្តម៉ាកសាំងយ៉ុងពណ៌សមួយគ្រឿងដឹកផ្លែចេកពីប្រទេសវៀតណាមបានផ្ទុះកង់ក្រោយផ្នែកខាងស្តាំ ហើយរេចង្កូតទៅបុកផ្ទះអ្នកភូមិបណ្តាលឱ្យរងការខូចខាតសំយាបខាងមុខ តែមិនបណ្តាលឱ្យគ្រោះថ្នាក់ដល់មនុស្សទេ។
ហេតុការណ៍នេះបានកើតឡើងកាលពីវេលាម៉ោង៤ និង៣០នាទីទៀបភ្លឺ ថ្ងៃទី១ កក្កដា ២០១៥ នៅលើកំណាត់ផ្លូវជាតិលេខ៣១ត្រង់ចំណុចភូមិត្រពាំងមន្ត្រី ឃុំសំរោងក្រោម ស្រុកបន្ទាយមាស។
ក្រោយកើតហេតុ នគរបាលចរាចរណ៍ស្រុកបន្ទាយមាសបានចុះទៅដល់កន្លែងកើតហេតុពិនិត្យឃើញថា រថយន្តដឹកចេកចេញពីប្រទេសវៀតណាមនោះបើកក្នុងទិសដៅពីត្បូងទៅជើង តែពេលមកដល់ចំណុចភូមិត្រពាំងមន្ត្រី រថយន្តក៏ផ្ទុះកង់ក្រោយធ្វើឱ្យរេចង្កូតទៅបុកផ្ទះអ្នកភូមិដែលមានម្ចាស់ផ្ទះឈ្មោះឃុន ប៊ូណា ហៅគោ ភេទប្រុស អាយុ៣៨ឆ្នាំ ។
នគរបាលបាននិយាយថា គ្រោះថ្នាក់ចរាចរណ៍នេះមិនបង្កឱ្យមនុស្សគ្រោះថ្នាក់ទេ ព្រោះរថយន្តបានបុកចូលត្រឹមតែសំយាបផ្ទះខាងមុខ ចំណែកម្ចាស់ផ្ទះដេកនៅខាងក្រោយ។ នគរបាលបន្តថា អ្នកបើកបររថយន្តបង្កឈ្មោះហេង ម៉េង ភេទប្រុស អាយុ៣២ឆ្នាំ មានទីលំនៅភូមិស្វាយប្រទាល ឃុំស្វាយប្រទាល ស្រុកស្អាង ខេត្តកណ្តាល បានអង្វរទៅម្ចាស់ផ្ទះដោយសុំជួយសងសំណងខូចខាតផ្ទះចំនួន៤០០ដុល្លារ តែម្ចាស់ផ្ទះទារ៦០០ដុល្លារ ត្រូវបានលោកអធិការរងសម្រួលគ្នាត្រឹម៤០០ដុល្លារបញ្ចប់រឿងនៅកន្លែងកើតហេតុ៕
ចែករំលែកព័តមាននេះ