រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនស៊ីធីអិន កាលពីរសៀលថ្ងៃសៅរ៍ ទី២៣ ឧសភា កន្លងមកនេះ យ៉េន ឌីណា មកពីក្លិបអប្សរាគុនខ្មែរ បានប្រើស្នៀតកែងវាយផ្តួលកីឡាករថៃ Yorkphit Sorvichha ឱ្យសន្លប់នៅទឹកទី៣ ចំណែក សែន រ៉ាឌី មកពីក្លិបអប្សរាគុនខ្មែរដូចគ្នា ប្រើពេលមិនដល់មួយទឹកស្រួលបួលផងផ្តួលកីឡាករថៃ Dennorng Phlourngpor.Chhertchhai ឱ្យសន្លប់ក្រោកលែងរួចតាមរយៈការប្រើស្នៀតជង្គង់បុកចូលពោះទឹកផ្ទួនៗ ។
នៅមុនពេលប្រកួត Yorkphit Sorvichha បានប្រាប់លោកម៉ា សេរី អ្នករៀបចំកម្មវិធីប្រកួតប្រដាល់ប្រចាំស្ថានីយទូរទស្សន៍ស៊ីធីអិនថា កាលពីជាងមួយខែមុន យ៉េន ឌីណា មានឱកាសដណ្តើមបានខ្សែក្រវាត់ពីការប្រកួតនៅក្រុងឈៀង ម៉ៃ ប្រទេសថៃ ខណៈរូបគេមិននៅជាប់រវល់ទៅប្រកួតនៅក្រុងបាងកក បើសិនជាគេនៅវិញនោះ យ៉េន ឌីណា គ្មានឱកាសល្អបែបនេះទេ។ បុ៉ន្តែទីបំផុតភាពក្អេងក្អាងនេះមិនដូចការគិតឡើយ គេបែរជាត្រូវ យ៉េន ឌីណា ផ្តល់មេរៀនយ៉ាងជូរចត់បំផុត ។ ការប្រកួតនៅក្នុងទឹកទី១ និងទី២ យ៉េន ឌីណា ត្រូវ Yorkphit Sorvichha វាយសង្គ្រុបជាប់រហូត និងបង្ខំឱ្យដកថយអែបខ្សែរេញជាញឹកញាប់ទៀតផង។ ទោះបីជាយ៉ាងណា យ៉េន ឌីណា នៅមានឱកាសវាយតបតបានខ្លះៗដែរ ជាពិសេសនៅពាក់កណ្តាលទឹកទី២ តែម្តង គេបានបុកមួយជង្គង់ចូលពោះទឹកកីឡាករថៃយ៉ាងពេញណែន ធ្វើឱ្យអាជ្ញាកណ្តាលលោករៀម កុសល រាប់៨ម្តង ។ ចូលដល់ទឹកទី៣ Yorkphit Sorvichha លែងហ៊ានសម្រុកចូលកៀកផ្តេសផ្តាសដូចមុនទៀតហើយធ្វើឱ្យ យ៉េន ឌីណា មានឱកាសចូលវាយសម្រុកតាមអំពើចិត្ត ។ ឆ្លៀតពេលដែលគូប្រកូតស្ថិតនៅក្នុងស្ថានភាពមិនសូវល្អ យ៉េន ឌីណា ស្ទុះចូលវាយមួយជង្គង់ចូលពោះទឹកយ៉ាងពេញទំហឹងបណ្តាលឱ្យកីឡាករថៃរូបនេះដួលសន្លប់ក្រោកលែងរួចតែម្តង ។
ចំណែក សែន រ៉ាឌី វិញនោះចំណាយកម្លាំងមិនដល់មួយទឹកស្រួលបួលផង ក៏អាចផ្តួលកីឡាករថៃឱ្យសន្លប់ក្រោកលែងរួច ។ តាមពិត Denn Phlourngpor Chhertchhai គឺជាជើងខ្លាំងមួយរូបនៅប្រទេសថៃ ធ្លាប់យកឈ្នះ សៀវ ងុ៉យ ដោយពិន្ទុនៅលើសង្វៀនខេត្តសៀមរាប បុ៉ន្តែពេលមកជួប សែន រ៉ាឌី លើកនេះគេគ្មានសំណាងដូចមុនទៀតឡើយ ។ នៅទឹកទី១ កីឡាកថៃបានសម្រុកចូលវាយទៅលើ សែន រ៉ាឌី យ៉ាងសន្ធាប់ ខណៈ សែន រ៉ាឌី បានត្រឹមតែដកថយធ្វើការស្ទាបស្ទង់សិនបុ៉ណ្ណោះ ។ នៅពាក់កណ្តាលទឹកទី១ ដោយសារកីឡាករថៃដើរចូលវាយខ្វះការប្រុងប្រយ័ត្ន ក៏ត្រូវ សែន រ៉ាឌី បុកមួយជង្គង់ចូលពោះទឹកយ៉ាងពេញណែនបណ្តាលឱ្យចុករមួល បើទោះជាលោកអាជ្ញាកណ្តាល លោកផាន់ ផាណាត រាប់ដល់១០ ទៅហើយក្តី ក៏គេនៅតែមិនអាចក្រោករួចដែរ ។
ដោយឡែកលទ្ធផលគូផ្សេងកីឡាករស្រិល ទ្រី មកពីក្លិបគជសារកីឡា បានយកឈ្នះកីឡាករព្រំ វី មកពីក្លិបខ្លារខិនមានរិទ្ធដោយពិន្ទុ និងកីឡាករញ៉េ សិទ្ធ មកពីក្លិបអេភូថងកីឡា បានធ្វើឱ្យអ្នកប្រដាល់ចាស់វស្សា ផាន់ សារ៉ែម មកពីក្លិបគជសារកីឡាចាញ់ការប្រកួតដោយពិន្ទុទាំងមិនអស់ចិត្ត ៕
ចែករំលែកព័តមាននេះ