កីឡាករ4រូបចាញ់មិនបាននៅថ្ងៃសៅរ៍ស្អែក
រាជធានីភ្នំពេញ ៖ ទោះជាគ្មានអ្នកណាមកប្រកួតឱ្យត្រូវប្រឹង ក៏កីឡាករដែលមានឈ្មោះបោះសំឡេង៤រូប រួមមានកីឡាករមាស ច័ន្ទមាន កីឡាករលាស់ យីន កីឡាករថុល មករា និងកីឡាករផន
រាជធានីភ្នំពេញ ៖ ទោះជាគ្មានអ្នកណាមកប្រកួតឱ្យត្រូវប្រឹង ក៏កីឡាករដែលមានឈ្មោះបោះសំឡេង៤រូប រួមមានកីឡាករមាស ច័ន្ទមាន កីឡាករលាស់ យីន កីឡាករថុល មករា និងកីឡាករផន ប៊ុនម៉ៅ សុទ្ធតែត្រូវគេមើលឃើញថា ត្រូវការឈ្នះដាច់ខាតសម្រាប់ការប្រកួតនៅល្ងាចថ្ងៃសៅរ៍ ទី២៣ ឧសភានេះ ។ អ្នកទាំង៤ នឹងដើរលើផ្លូវដ៏តានតឹងបំផុត ដោយសារតែបើភ្លាត់ចាញ់ គឺសុទ្ធតែមានលទ្ធផលអាក្រក់រកលេខដាក់គ្មានដូចគ្នា ។
ភាពតានតឹងនេះកើតឡើងខ្លាំងជាងគេសម្រាប់កីឡាករ៣រូបដំបូង ដោយសារពួកគេស្ថិតនៅក្នុងការប្រកួតវិលជុំសន្សំពិន្ទុឈានទៅដណ្តើមខ្សែក្រវាត់ K-Cement នៅស្ថានីយទូរទស្សន៍អាស៊ីអាគ្នេយ៍ដែលចូលដល់ជុំត្រូវទម្លាក់ចោល២នាក់ដោយស្វ័យប្រវត្តិ។ កីឡាករមាស ច័ន្ទមាន ដែលអ្នកណាក៏ស្គាល់ថាធ្លាប់ល្បីនឹងឈ្មោះ សារឹម ង៉ា កីឡាករលាស់ យីន និង ថុល មករា សុទ្ធតែខ្វះភាពនឹងនរ បើភ្លាត់ឱ្យចាញ់សម្រាប់ការប្រកួតថ្ងៃស្អែកនេះ ។ អ្នកទាំង៣ បើបានប្រកួតឈ្នះនឹងមានវាសនាគេចរួចពីធ្លាក់ ប៉ុន្តែបើចាញ់ គឺបាយៗហើយនៅក្នុងព្រឹត្តិការណ៍ដណ្ដើមប្រាក់លាន និងខ្សែក្រវាត់ដែលពោរពេញដោយការប្រកួតប្រជែងយ៉ាងស្វិតស្វាញនេះ ។ រវាងកីឡាករមាស ច័ន្ទមាន និងថុល មករា បើទោះឈ្នះលើកនេះ ក៏នៅមិនទាន់ប្រាកដ១០០% ថា ឡើងទៅវគ្គពាក់កណ្ដាលផ្ដាច់ព្រ័ត្រនៅឡើយទេ ប៉ុន្តែគឺជាជំហានដែលជួយឱ្យក្ដីសង្ឃឹមមានខ្ពស់បំផុត ។ កីឡាករមាស ច័ន្ទមាន ឡើងប្រកួត៣លើកកន្លងមក ទើបតែមាន៣ពិន្ទុប៉ុណ្ណោះស្ថិតនៅបាតតារាង ហើយបើចាញ់សម្រាប់ថ្ងៃសៅរ៍នេះ គឺស្មើនឹងធ្លាក់ដោយស្វ័យប្រវត្តិតែម្ដង ។ គេត្រូវការឈ្នះមិនអាចចាញ់បានទេក្នុងជំនួបដែលត្រូវប៉ះជាមួយសិស្សប្អូន ថុល មករា ក្នុងជុំទី៤នេះ ដ្បិតក្នុងជុំចុងក្រោយ មាស ច័ន្ទមាន ពិតជាឈ្នះ ឱម សំរេច ដែលមានពិន្ទុនៅបាតតារាងដោយមិនបាច់ប្រឹង ។ បើទោះជាការប្រកួតក្នុងជុំចុងក្រោយ កីឡាករថុល មករា ត្រូវបាន ឃីម បូរ៉ា បន្ធូរដៃឲ្យឈ្នះ ក៏ មាស ច័ន្ទមាន នឹងបានឡើងនោះដែរ ដោយសារតែកីឡាកររូបនេះមានក្រេឌីតល្អជាងក្នុងការប្រកួតកន្លងមក ។ លើកលែងតែឃីម បូរ៉ា បើកដៃឱ្យ ថុល មករា វាយខ្លួនឱ្យសន្លប់ក្នុងទឹកណាមួយនៅជុំចុងក្រោយប៉ុណ្ណោះដែលធ្វើឱ្យ មាស ច័ន្ទមាន ដែលមានពិន្ទុតែ៩តាមការប៉ាន់ស្មាននឹងធ្លាក់ទៅតាម ឱម សំរេច ។ ស្រួលមិនស្រួល កីឡាករមាស ច័ន្ទមាន នឹងត្រូវប្រឹងប្រកួតយកឈ្នះដោយការផ្តួលកីឡាករថុល មករា ឱ្យសន្លប់ក្នុងទឹកណាមួយនោះផងដើម្បីការពារខ្លាចកីឡាករឃីម បូរ៉ា ប្រើល្បិចធ្វើជាសន្លប់ក្នុងទឹកណាមួយ ដើម្បីបើកដៃឱ្យ ថុល មករា បានឡើងហើយទម្លាក់ខ្លួនចោល ។ ទោះបីយ៉ាងណា កីឡាករថុល មករា ដែលការប្រកួតកន្លងមកបានឈ្នះមួយលើករួចហើយ និងមានពិន្ទុខ្ពស់ជាង មាស ច័ន្ទមាន មិនអាចបណ្ដោយឱ្យកីឡាកររូបនេះយកឈ្នះដោយស្រួលនោះទេ គឺពិតជាប្រឹងប្រកួតយកឈ្នះដូចគ្នា ។ បើ ថុល មករា ឈ្នះនៅថ្ងៃសៅរ៍នេះមានន័យថា គេបានឡើងទៅវគ្គបន្តហើយ មាស ច័ន្ទមាន ធ្លាក់ ប៉ុន្តែបើមាស ច័ន្ទមានឈ្នះមានន័យថា ថុល មករា ត្រូវចាំអ៊ុតមើល ឃីម បូរ៉ា បើកដៃឱ្យឈ្នះក្នុងទឹកទីប៉ុន្មានសិនទើបអាចដឹង ។ អ្នកតាមដានគ្រប់គ្នាសុទ្ធតែមើលឃើញថា កីឡាករមាស ច័ន្ទមាន និងថុល មករា មិនអាចបន្ធួរដៃឱ្យគ្នាដាច់ខាតដែលមានន័យថា អ្នកឈ្នះសម្រាប់គូនេះពិតជាត្រូវប្ដូរដោយសាច់ស្រស់ ឈាមស្រស់ មិនខុសនោះទេ ។ ថុល មករា មិនអាចបណ្ដោយឱ្យ មាស ច័ន្ទមាន ឈ្នះទេ ព្រោះដឹងថានៅជុំចុងក្រោយកីឡាករ ឱម សំរេច ដែលឈរនៅបាតតារាង ក៏បណ្ដោយឱ្យកីឡាកររូបនេះវាយខ្លួនសន្លប់ក្នុងទឹកណាមួយ បើទោះជា ឃីម បូរ៉ា អាចនឹងបន្ធូរដៃជួយឱ្យ ថុល មករា ទទួលបានឱកាសឡើងក្តី ។ ទោះជាការប្រកួតក្នុងជុំចុងក្រោយកីឡាករឃីម បូរ៉ា ប្រឹងបន្ធូរដៃឱ្យ ថុល មករា ប៉ុន្តែវាក៏មិនងាយនោះដែរ ដែលកីឡាករជើងខ្លាំងឃីម បូរ៉ា ហ៊ានរហូតដល់ថ្នាក់ជួយឱ្យកីឡាករថុល មករា ឈ្នះខ្លួនក្នុងទឹកទី២ ឬទី៣ ដើម្បីទម្លាក់មាស ច័ន្ទមាន នោះ ។ បើការធ្វើចាញ់ហាក់មិនសមទំនង គឺពិតជាធ្វើឱ្យមានភាពមិនប្រក្រតីកើតឡើង ។ ដូច្នេះច្បាស់ណាស់ថា ដែល ថុល មករា ដាច់ខាតត្រូវតែប្រឹងស៊ី មាស ច័ន្ទមាន ហើយច្បាស់ដូចគ្នាថា មាស ច័ន្ទមាន ពិតជាប្រឹងស៊ីថុល មករា វិញដូចគ្នា។ រវាងអ្នកទាំងពីរកាលពីវគ្គ១ កីឡាករមាស ច័ន្ទមាន ល្អជាង ប៉ុន្តែសម្រាប់ជុំនេះ កីឡាករថុល មករា បានបង្កើនសមត្ថភាពល្អជាង
បន្ទាប់ពី មាស ច័ន្ទមាន ត្រូវគេឃើញរាងមើលស្រាលសិស្សប្អូន ហើយទម្លាក់ដៃបណ្ដោយឱ្យការប្រកួត៣លើកចាញ់ទាំង៣លើក ។ គូនេះអ្នកណាក៏ប៉ាន់ស្មានដូចគ្នាថា អ្នកឈ្នះ និងចាញ់ពិតជាត្រូវទ្រមខ្លួន ។ ស្រួលមិនស្រួលអាចបែករយះច្រើនកន្លែងម្ខាងៗផងដោយសារតែអ្នកណាក៏ត្រូវការឈ្នះដាច់ខាតដូចគ្នា ។
ងាកមកកាន់កីឡាករលាស់ យីន វិញ ថ្វីដ្បិតថាគេមានសំណាងឈ្នះ២ប្រកួតរួចទៅហើយ ប៉ុន្តែការប្រកួតនៅថ្ងៃសៅរ៍នេះ គឺជាសញ្ញាយ៉ាងសំខាន់សម្រាប់កំណត់ជោគវាសនារបស់គេដូចគ្នា ។ នៅ២ប្រកួតចុងក្រោយគេត្រូវប៉ះ ឱម សំរេច ដែលមានពិន្ទុនៅបាតតារាង និងប៉ះជាមួយកីឡាករសូត្រ ប៊ុនធី ដែលជាជើងខ្លាំងឈរនៅកំពូលតារាង ។ ផ្អែកតាមការវិភាគបើទោះជា សូត្រ ប៊ុនធី បានឡើងដោយស្វ័យប្រវត្តិ ក៏ពិតជាមិនបណ្ដោយឱ្យ លាស់ យីន ឈ្នះនៅជុំចុងក្រោយនោះដែរ ។ ដូច្នេះមានន័យថា បើគេមិនអាចស៊ី ឱម សំរេច នៅថ្ងៃសៅរ៍នេះបានទេ គឺស្មើនឹងប្រឈមធ្លាក់ដូចគ្នា ដោយសារតែកីឡាករមាស ច័ន្ទមាន និងកីឡាករថុល មករា ដែលដាច់ខាតត្រូវតែឈ្នះ២ប្រកួតម្នាក់ដែរនោះ នឹងមានពិន្ទុស្មើខ្លួន ហើយជម្រើសយកអ្នកមានក្រេឌីតល្អដើម្បីឡើងទៅបន្ត ។ ក្នុងករណីដែលមានពិន្ទុស្មើ មាស ច័ន្ទមាន និងថុល មករា កីឡាករលាស់ យីន អាចមិនមែនជាអ្នកបានឡើងនោះទេ ដោយសារតែកីឡាករដែលជាគូបដិបក្ខពិតជាប្រឹងដណ្ដើមយកក្រេឌីតសម្រាប់ប្រជែងឡើងទៅ ។ កីឡាករលាស់ យីន ត្រូវតែប្រឹងរលាស់ខ្លួនយកឈ្នះដាច់ខាតនៅថ្ងៃសៅរ៍នេះដើម្បីអាចច្បាស់១០០% បន្តទៅកាន់វគ្គពាក់កណ្ដាលផ្ដាច់ព្រ័ត្រ។ គាប់ជួនជាកីឡាករឱម សំរេច បើឈ្នះលើកនេះ និងឈ្នះលើកក្រោយ ក៏ជាកីឡាករដែលមានសង្ឃឹមម្នាក់ផងដែរ ទើបការប្រកួតរបស់លាស់ យីន គឺពិតមិនស្រួលប៉ុន្មានទេនៅថ្ងៃសៅរ៍នេះ ។ យ៉ាងណាក៏ដោយ កីឡាករឱម សំរេច ពិតជាមិនប្ដូរយកឈ្នះលាស់ យីន នោះទេ ដោយសារទី១ លាស់ យីន ល្អជាង ទី២ បើឈ្នះលើកនេះ ក៏ត្រូវប្រឹងឈ្នះកីឡាករមាស ច័ន្ទមាន នៅជុំចុងក្រោយមួយទៀតដែលពិតជាទៅមិនរួច ។
ដោយឡែកសម្រាប់កីឡាករផន ប៊ុនម៉ៅ វិញ គេមិនមែនជាគូប្រកួតដែលការត្រូវឈ្នះដើម្បីយកពិន្ទុឡើងទៅវគ្គបន្តក្នុងព្រឹត្តិការណ៍ K-Cement នេះទេ ប៉ុន្តែគេគឺជាកីឡាករល្បីឈ្មោះ និងជាជើងចាស់ដែលត្រូវការឈ្នះដើម្បីអាចបន្តទីផ្សារនៅលើសង្វៀន បន្ទាប់ពីសម្រេចចិត្តត្រឡប់មកកាន់ការប្រកួតវិញ ។ នៅថ្ងៃសៅរ៍នេះ គេប៉ះប្រកួតជាមួយកីឡាករម៉ូ រដ្ឋា ដែលជាជើងខ្លាំងម្នាក់ និងជាកីឡាករស៊េរីក្រោយ ។ អញ្ចឹងបើចាញ់ គឺមិនត្រឹមតែត្រូវអាម៉ាស់ប៉ុណ្ណោះទេ គឺថែមទាំងត្រូវបាត់ឈ្មោះ និងបាត់បង់ទីផ្សារឡើងប្រកួតនោះផងសម្រាប់ជំហានបន្តបន្ទាប់ ។ កីឡាករជើងចាស់ដែលវិលត្រឡប់ក្រោយត្រូវគេមើលឃើញថា មានការគាំទ្រតែក្នុងករណីឈ្នះប៉ុណ្ណោះ ប៉ុន្តែបើចាញ់អ្វីក៏រលាយអស់ដែរ ។ ត្រង់នេះហើយដែលកីឡាកររូបនេះត្រូវតែប្ដូរកណ្ដាប់ដៃដោយការស្ទុះស្ទាឱ្យបានដាច់ខាត ដើម្បីយកឈ្នះកីឡាករម៉ូ រដ្ឋា ក្នុងពេលដែល ម៉ូ រដ្ឋា ក៏ត្រូវការឈ្នះជើងចាស់រូបនេះដូចគ្នា ។ ផន ប៊ុនម៉ៅ ឡើងប្រកួតក្នុងនាមជាគូពិសេសទី៥ ឬហៅថាជាគូកិត្តិយស បន្ទាប់ពីគូស៊ីសាច់ហុតឈាមទាំង៣គូរបស់ K-Cement ត្រូវបញ្ចប់ ។
សរុបមកការប្រដាល់នៅថ្ងៃសៅរ៍នេះហាក់បានផ្ដល់សម្ពាធឱ្យកីឡាករទាំង៤ត្រូវបង្កើនកម្លាំងដៃប្រកួតលក្ខណៈស៊ីសាច់ហុតឈាមយ៉ាងខ្លាំង ដោយមិនចាំបាច់ភ័យរឿងអ្នកណា ប្រកួតមិនអស់ដៃ ឬត្រូវលក់ខ្លួននោះឡើយ។ ជាពិសេសគូប្រកួត មាស ច័ន្ទមាន និងថុល មករា គឺពិតជាបើកឆាកប្រយុទ្ធកាចសាហាវ ដោយសារតែអ្នកឈ្នះមានឱកាសឡើង ហើយអ្នកចាញ់ត្រូវធ្លាក់ដែលពិបាកនឹងចាំអ៊ុតមើលសំណាងក្នុងជុំចុងក្រោយ ៕
ចែករំលែកព័តមាននេះ