ភ្នំភ្លើង Calbuco នៅភាគខាងត្បូងស៊ីលី កាលពីថ្ងៃទី៣០ មេសា បានផ្ទុះជាលើកទី៣ រយៈពេលតែមួយសប្តាហ៍ ដោយបញ្ចេញពពកផ្សែង និងផេះយ៉ាងខ្ពស់ ញ៉ាំងឱ្យអាជ្ញាធរនៅតែរក្សាទុកការប្រកាសអាសន្នកម្រិតខ្ពស់ពណ៌ក្រហម ។
ផ្នែកភូគព្ភសាស្ត្រ និងរ៉ែជាតិស៊ីលី និយាយថា ដូចការគ្រោងទុក ការផ្ទុះលើកទី៣នៃភ្នំភ្លើង Calbuco បានកើតមាន ។ ពួកអ្នកជំនាញការព្យាករណ៍ថា ដំណាក់កាលនៃការផ្ទុះរបស់ភ្នំភ្លើងនេះមានរយៈពេលច្រើនសប្តាហ៍ ។
នាពាក់កណ្តាលថ្ងៃទី៣០ មេសា ភ្នំភ្លើងមានកម្ពស់២.០០៣ម៉ែត្រនេះ បានចាប់បញ្ចេញផ្សែង និងផេះយ៉ាងខ្លាំង ហុយទៅទិសខាងត្បូង ។ តែការផ្ទុះលើកនេះ ហាក់ខ្សោយជាងការផ្ទុះពីរលើកមុន ដោយបាញ់ផ្សែងនិងផេះឡើងលើត្រឹមកម្ពស់៤គីឡូម៉ែត្រ ខណៈផ្ទុះលើកមុនបាញ់ផ្សែងនិងផេះដល់ទៅកម្ពស់១៧គីឡូម៉ែត្រ ពីលើភ្នំភ្លើង ។
អាជ្ញាធរបានបញ្ជាឱ្យជម្លៀសមនុស្សចេញក្នុងរង្វង់២០គីឡូម៉ែត្រជុំវិញភ្នំភ្លើង ចាប់តាំងពី១សប្តាហ៍មកហើយ ។ សរុបភ្នំភ្លើងនេះ បានបញ្ចេញផេះប្រមាណជា២១០លានម៉ែត្រគូប ក្នុងពេលផ្ទុះ២លើកដំបូង ។ រហូតមកដល់ពេលនេះពុំទាន់មានសេចក្តីរាយការណ៍ថាមានមនុស្សណាម្នាក់រងគ្រោះនៅឡើយ ៕
ចែករំលែកព័តមាននេះ