ខេត្តពោធិ៍សាត់៖ កាលពីពេលថ្មីៗកន្លងទៅនេះនៅស្រុកបាកានសមត្ថកិច្ចធ្លាប់ឃាត់ខ្លួនអ្នកលេងល្បែងស៊ីសង(អាប៉ោង)ចំនួន០៣នាក់យកមកកាន់អធិការដ្ឋាននគរបាលរួចហើយបានដាក់ឲ្យលេងកណ្ដាលថ្ងៃអង្គុយលើស័ង្កសីម្ដងរួចទៅ
ខេត្តពោធិ៍សាត់៖ កាលពីពេលថ្មីៗកន្លងទៅនេះនៅស្រុកបាកានសមត្ថកិច្ចធ្លាប់ឃាត់ខ្លួនអ្នកលេងល្បែងស៊ីសង(អាប៉ោង)ចំនួន០៣នាក់យកមកកាន់អធិការដ្ឋាននគរបាលរួចហើយបានដាក់ឲ្យលេងកណ្ដាលថ្ងៃអង្គុយលើស័ង្កសីម្ដងរួចទៅហើយដោយសារតែពុំមានការរាងចាល។ ឥឡូវនេះនៅស្រុកក្រគរបានឃាត់ខ្លួនអ្នកលេងល្បែងស៊ីសង(បៀរ)ចំនួន០៧នាក់ទៀត ហើយក៏បានដាក់ឲ្យលេងកណ្ដាលថ្ងៃអង្គុយលើស័ង្កសីដូចស្រុកបាកានអ៊ីចឹងដែរ។
លោកវរសេនីយ៍ត្រីឯម រុន អធិការនគរបាលស្រុកក្រគរបានឲ្យដឹងថា អ្នកលេងល្បែងស៊ីសងទាំង០៧នាក់នេះឃាត់ខ្លួនកាលពីវេលាម៉ោង៤រសៀល ថ្ងៃទី២៣ មេសា ២០១៥ នៅភូមិសាន្តស ឃុំអន្សារចំបក់ ស្រុកក្រគរ។ លោកឯម រុន ឲ្យដឹងថា នៅរសៀលថ្ងៃនោះ បន្ទាប់ពីប្រជាពលរដ្ឋរាយការណ៍មកភ្លាមលោកបានចាត់ឲ្យលោកអនុសេនីយ៍ឯកម៉ោល សុទ្ធ អធិការរងទទួលបន្ទុកយុត្តិធម៌ដឹកនាំកម្លាំងនគរបាលស្រុក ប៉ុស្តិ៍ក្បាលត្រាច និងប៉ុស្តិអន្សារចំបក់រួមជាមួយកម្លាំងប្រជាការពារចុះទៅធ្វើការបង្ក្រាបជាបន្ទាន់។
ក្រៅពីឃាត់អ្នកលេងល្បែងស៊ីសងទាំង០៧នាក់នេះសមត្ថកិច្ចក៏បានរឹបអូសវត្ថុតាងមួយចំនួនមានបៀរ កម្រាល និងម៉ូតូចំនួន០៨គ្រឿងផងដែរ ខណៈដែលប៉ុន្មាននាក់ទៀតរត់គេចខ្លួនអស់។ លោកអធិការបន្តទៀតថា ក្រុមអ្នកលេងបៀរទាំងប៉ុន្មាននាក់នេះសមត្ថកិច្ចបានហាមប្រាម និងអប់រំណែនាំប៉ុន្មានលើកប៉ុន្មានសារមកហើយ តែនៅតែមិនរាងចាលទាល់តែសោះ។
មកដល់លើកនេះអនុវត្តន៍តាមបទបញ្ជាររបស់លោកស្នងការនគរបាល និងលោកអភិបាលខេត្ត គឺតម្រូវឲ្យអ្នកលេងបៀរទាំងអស់អង្គុយលេងលើស័ង្កសីកណ្ដាលថ្ងៃរហូតទ្រាំលែងបានទើបឲ្យឈប់ រួចហើយឲ្យធ្វើកិច្ចសន្យាជាលើកចុងក្រោយបញ្ឈប់ការលេងល្បែងស៊ីសងចាប់ពីពេលនេះទៅ បើពុំមានការរាងចាលទេ លើកក្រោយនឹងអនុវត្តន៍តាមច្បាប់ដោយគ្មានការលើកលែងឡើយ។
គួររំលឹកថានេះជាលើកទី២ហើយនៅខេត្តពោធិ៍សាត់ដែលសមត្ថកិច្ចចាប់បានអ្នកលេងល្បែងស៊ីសង(បៀរអាប៉ោង)យកមកឲ្យអង្គុយលេងលើស័ង្កសីកណ្ដាលថ្ងៃដើម្បីឲ្យរាងចាលដែលលើកទីមួយនៅស្រុកបាកាន។ ការធ្វើបែបនេះមានការរិះគន់ពីមហាជនថាជាការធ្វើទារុណកម្មទៅលើមនុស្សជាតិទៅវិញ ព្រោះថាទោសកំហុសនីមួយៗសុទ្ធតែមានច្បាប់កំណត់ត្រឹមត្រូវ ដូច្នេះត្រូវអនុវត្តន៍ទៅតាមច្បាប់ មិនគួរធ្វើបែបនេះទេ៕
ចែករំលែកព័តមាននេះ