ខេត្តកណ្ដាល ៖ ពិតជារឿងគួរឱ្យហួសចិត្ត និងស្មានមិនដល់មួយបានកើតឡើង ដោយបុរសម្នាក់មិនដឹងថាមានបញ្ហាអ្វីទេ បានជិះម៉ូតូមកសុំផ្ទះគេសម្រាកមួយសន្ទុះនៅផ្ទះជួសជុលម៉ូតូមួយកន្លែង ។ ពេលនោះ ម្ចាស់ផ្ទះបានប្រាប់ឱ្យទៅសម្រាកនៅក្រោមដើមស្វាយក្បែរនោះទៅ តែមិនព្រមហើយចុះពីលើម៉ូតូទាញញញួរវាយសំពងក្បាលជនរងគ្រោះដែលកំពុងអង្គុយបែរខ្នងទាំងមិនដឹងខ្លួនចំនួន២ញញួរ…
ខេត្តកណ្ដាល ៖ ពិតជារឿងគួរឱ្យហួសចិត្ត និងស្មានមិនដល់មួយបានកើតឡើង ដោយបុរសម្នាក់មិនដឹងថាមានបញ្ហាអ្វីទេ បានជិះម៉ូតូមកសុំផ្ទះគេសម្រាកមួយសន្ទុះនៅផ្ទះជួសជុលម៉ូតូមួយកន្លែង ។
ពេលនោះ ម្ចាស់ផ្ទះបានប្រាប់ឱ្យទៅសម្រាកនៅក្រោមដើមស្វាយក្បែរនោះទៅ តែមិនព្រមហើយចុះពីលើម៉ូតូទាញញញួរវាយសំពងក្បាលជនរងគ្រោះដែលកំពុងអង្គុយបែរខ្នងទាំងមិនដឹងខ្លួនចំនួន២ញញួរ បណ្ដាលឲ្យរបួសធ្ងន់ ។ បន្ទាប់មក បុរសនេះបានយកញញួរនោះមកវាយក្បាលខ្លួនឯងជាច្រើនញញួរ បណ្ដាលឲ្យរងរបួសត្រូវបានគ្រូពេទ្យដេរ៥ថ្នេរ ហើយក៏បុរសម្នាក់រត់ចូលមកជួយ និងឃាត់ខ្លួនប្រគល់ឲ្យសមត្ថកិច្ច ។
ហេតុការណ៍នេះ បានកើតឡើងកាលពីវេលាម៉ោងប្រមាណ១និង២៥នាទីរសៀលថ្ងៃទី១ ខែធ្នូ ឆ្នាំ២០២៥កន្លងទៅ នៅតាមផ្លូវជាតិលេខ១ ភូមិជ័យឧត្តម២ ឃុំសំរោងធំ ស្រុកកៀនស្វាយ ។លោកវរសេនីយ៍ឯក ព្រំ សំណាង អធិការនគរបាលស្រុកកៀនស្វាយបានឲ្យដឹងថា ជនដែលត្រូវបានឃាត់ខ្លួននេះឈ្មោះ ស៊ុយ ចែត អាយុ២៨ឆ្នាំ មុខរបរជាងធ្វើពិតាន មានស្រុកកំណើតនៅឃុំបវេល ស្រុកបវេល ខេត្តបាត់ដំបង បច្ចុប្បន្នស្នាក់នៅផ្ទះជួល ក្នុងភូមិទួលពង្រ សង្កាត់ទួលពង្រ ខណ្ឌពោធិ៍សែនជ័យ រាជធានីភ្នំពេញ ។
ជននេះធ្លាប់ប្រើប្រាស់គ្រឿងញៀនរយៈពេល១ឆ្នាំ និងធ្វើតេស្តរកសារធាតុញៀនក្នុងទឹកនោមវិជ្ជមាន(+) ។ ជាមួយនឹងការឃាត់ខ្លួន សមត្ថកិច្ចក៏បានដកហូតញញួរ១ទម្ងន់១គីឡូក្រាម និងម៉ូតូ១គ្រឿងម៉ាកយ៉ាម៉ាហា ពណ៌ទឹកប៊ិក ស៊េរីឆ្នាំ២០១៨ ពាក់ផ្លាកលេខ ភ្នំពេញ ១KB-៩០៤៥។
ចំណែកជនរងគ្រោះឈ្មោះ ស៊ូ ពន្លឺ ភេទប្រុស អាយុ២៨ឆ្នាំ មុខរបរជាងជួសជុលម៉ូតូ មានទីលំនៅភូមិជ័យឧត្តម ឃុំសំរោងធំ ស្រុកកៀនស្វាយ បានរងរបួសក្បាលផ្នែកខាងក្រោយដេរ៣ថ្នេរ ។ ជនរងគ្រោះរៀបរាប់ថា មុនពេលកើតហេតុ គាត់កំពុងអង្គុយលាងម៉ូតូ១គ្រឿងនៅតូបជួសជុលម៉ូតូរបស់ឈ្មោះ រស់ សុខណា ភេទប្រុស អាយុ២៥ឆ្នាំ ក្នុងភូមិជ័យឧត្តម២ ឃុំសំរោងធំ ស្រុកកៀនស្វាយ ។
ពេលនោះជនដៃដល់រូបនេះ បានជិះម៉ូតូពីអ្នកលឿងទៅភ្នំពេញ លុះមកដល់ចំណុចខាងលើបានឈប់ម៉ូតូចូលសុំកន្លែងជួសជុលម៉ូតូដើម្បីសម្រាកមួយសន្ទុះ ហើយម្ចាស់ផ្ទះបានប្រាប់ឲ្យទៅសម្រាកនៅក្រោមដើមស្វាយ ក្បែរកន្លែងជួសជុលម៉ូតូ តែជនដៃដល់មិនព្រមទៅទេ ។
ភ្លាមនោះ ជនដៃដល់ខឹងក៏ចុះពីលើម៉ូតូដើរទៅយកញញួរមកវាយជនរងគ្រោះចំក្បាលខាងក្រោយផ្នែកខាងឆ្វេង២ញញួរ បណ្តាលឲ្យរបួស បន្ទាប់មកយកញញួរវាយក្បាលខ្លួនឯងជាច្រើនញញួរ ត្រូវចំពាក់កណ្តាលក្បាល ។ នៅពេលឃើញដូចនេះ បុរសឈ្មោះ រស់ សុខណា និងអ្នកជិតខាង បានជួយចាប់ឃាត់ជនដៃដល់ប្រគល់ឲ្យនគរបាលប៉ុស្តិ៍សំរោងធំ និងដាក់ពាក្យបណ្តឹង រីឯជនដៃដល់ក៏ត្រូវបាននាំទៅប៉ុស្តិ៍សាកសួរ ។
នៅចំពោះមុខនគរបាល ជននេះឆ្លើយថា ខ្លួនពិតជាបានយកញញួរវាយជនរងគ្រោះមែន ព្រោះតែខឹងឱ្យខ្លួនទៅដេកនៅក្រោមដើមស្វាយ ។ ក្រោយពីសាកសួររួច នគរបាលប៉ុស្ដិ៍សំរោងធំ ក៏បានបញ្ជូនជនដៃដល់ និងវត្ថុតាងទៅអធិការដ្ឋានស្រុកកៀនស្វាយ ដើម្បីកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ