ការផ្ទុះយ៉ាងខ្លាំង២លើកនៃភ្នំភ្លើងស៊ីលី CALBUCO កាលពីថ្ងៃទី២២និង២៣មេសា ក្រោយពីភ្នំភ្លើងនោះពុំមានសកម្មភាពសោះចាប់តាំងពីច្រើនទសវត្សមកហើយ នាំឱ្យមានការជម្លៀសមនុស្សចេញ៥០០០នាក់ ហើយគេបានចេញការប្រកាសអាសន្ននៅតំបន់ភាគខាងត្បូងស៊ីលីជាតំបន់ទេសចរណ៍និងនៅប្រទេសអាហ្សង់ទីនជិតខាងមកពីការបញ្ចេញផេះខ្លាំងបំផុត ។
មានកម្ពស់២០០៣ម៉ែត្រហើយស្ថិតនៅជាប់់មាត់មហាសមុទ្រប៉ាស៊ីហ្វិក ចម្ងាយ១៣០០គ.ម ខាងត្បូងរដ្ឋធានីសាន់ទីយ៉ាហ្គោ ភ្នំភ្លើងនោះរហូតមកដល់ថ្ងៃទី២៣ មេសា នៅតែបញ្ចេញផ្សែងនិងផេះខ្លាំងក្នុងកម្ពស់រហូតដល់១៥គ.ម ។ ទោះជាមានកំអែរភ្នំភ្លើងជះឡើងលើមេឃនាពេលយប់តែហាក់ពុំទាន់មានការហូរកំអែរមកលើចង្កេះភ្នំនៅឡើយនាថ្ងៃទី២៣ មេសា ។ ផ្ទុយទៅវិញ ស្រទាប់ផេះយ៉ាងក្រាស់បានគ្របដណ្តប់លើតំបន់ជុំវិញភ្នំភ្លើងរហូតដល់គេប្រើគ្រឿងចក្រដើម្បីឈូសផេះចេញពីតាមផ្លូវថ្នល់ទាំងឡាយ ។
រដ្ឋាភិបាលស៊ីលី ដែលពុំរៀបរាប់ពីអ្នករងគ្រោះនៅឡើយ បានចេញការប្រកាសអាសន្នពណ៌ក្រហមក្នុងតំបន់ទេសចរណ៍ដ៏សំខាន់នេះរបស់ប្រទេស ។
នៅភាគខាងត្បូងប្រទេសអាហ្សង់ទីនអាជ្ញាធរក្រុង BARILOCHE ជាទីក្រុងទេសចរណ៍មួយស្ថិតនៅចម្ងាយ១០០គ.មពីភ្នំភ្លើងក៏ចេញការប្រកាសអាសន្នដែរហើយស្នើដល់ប្រជាជនឱ្យនៅក្នុងផ្ទះកុំចេញក្រៅមកពីវត្តមាននៃផេះភ្នំភ្លើង ។
ប្រធានាធិបតីស៊ីលីលោកស្រី MICHELLE BACAELET មុនពេលមកកាន់តំបន់ភ្នំភ្លើងនារសៀលថ្ងៃទី២៣ មេសា ថ្លែងថា យើងពុំដឹងថា តើបែបនោះត្រូវវាយតម្លៃយ៉ាងណាឡើយ ។ វាជាររឿងដែលនឹកស្មានមិនដល់មួយ ។
ចំណែកលោក MAHMUD ALEY អនុរដ្ឋ មន្ត្រីមហាផ្ទៃស៊ីលីនិយាយថា ទោះបីយ៉ាងណា ក្នុងករណីមានការផ្ទុះខ្លាំងថ្មីទៀតយើងគិតថា វានឹងពុំមានឥទ្ធិពលហួសពីតំបន់ដែលយើងបានកំណត់ក្នុងរង្វង់២១គ.ម ជុំវិញភ្នំភ្លើងនោះឡើយ ។
លោកស្រីប្រធានាធិបតីព្យាករណ៍ថា អាចមានការហូរកំអែរភ្នំភ្លើងដែលអាចរំលាយព្រិលនាំឱ្យស្ទឹងទាំងឡាយមានទឹកជោរជន់ ។ ផេះអាចបំផ្លាញដំណាំដាំដុះធ្វើឱ្យស្ទះដល់ការងារ ទេសចរណ៍ ពិសេសនាំឱ្យមានបញ្ហាដល់សុខភាពប្រជាជន ។ លោកស្រីអំពាវនាវដល់ប្រជាជនឱ្យពាក់ម៉ាស់ការពារ ៕
ចែករំលែកព័តមាននេះ