ប្រទេសវៀតណាម ៖ ទីក្រុងហូជីមិញ កំពុងតែពិចារណាធ្វើឱ្យអ្នកល្មើសច្បាប់ចរាចរណ៍បំពេញមុខងារសហគមន៍ រាប់ចាប់ពីការបោសសម្អាតផ្លូវថ្នល់ រហូតដល់ការជួយការងារសង្គមនៅទីកន្លែងសាធារណៈផ្សេងៗ រួមជាមួយនឹងការផាកពិន័យជាប្រាក់ផងដែរ ដែលនេះជាផ្នែកនៃកិច្ចខិតខំប្រឹងប្រែងក្នុងការលើកកម្ពស់សុវត្ថិភាពចរាចរណ៍។ សំណើនេះ ធ្វើឡើងតាមការណែនាំរបស់លោកឧបនាយករដ្ឋមន្ត្រី…
ប្រទេសវៀតណាម ៖ ទីក្រុងហូជីមិញ កំពុងតែពិចារណាធ្វើឱ្យអ្នកល្មើសច្បាប់ចរាចរណ៍បំពេញមុខងារសហគមន៍ រាប់ចាប់ពីការបោសសម្អាតផ្លូវថ្នល់ រហូតដល់ការជួយការងារសង្គមនៅទីកន្លែងសាធារណៈផ្សេងៗ រួមជាមួយនឹងការផាកពិន័យជាប្រាក់ផងដែរ ដែលនេះជាផ្នែកនៃកិច្ចខិតខំប្រឹងប្រែងក្នុងការលើកកម្ពស់សុវត្ថិភាពចរាចរណ៍។ សំណើនេះ ធ្វើឡើងតាមការណែនាំរបស់លោកឧបនាយករដ្ឋមន្ត្រី Tran Hong Ha បន្ទាប់ពីការត្រួតពិនិត្យរយៈពេលពាក់កណ្តាលឆ្នាំ ស្តីពីសុវត្ថិភាពចរាចរណ៍ឆ្នាំ២០២៥។ នេះបើយោងតាមប្រភពពីសារព័ត៌មាន Vietnam Express បានចេញផ្សាយនៅថ្ងៃទី១ ខែតុលា ឆ្នាំ២០២៥។
នគរបាលក្រុងបានទទួលភារកិច្ចសហការជាមួយនាយកដ្ឋានផ្សេងៗ ដើម្បីស្នើវិសោធនកម្មច្បាប់ឱ្យវិធានការថ្មីនេះ អាចអនុវត្តបានស្របច្បាប់ ខណៈដែលសេវាកម្មសហគមន៍មិនទាន់ត្រូវបានទទួលស្គាល់ក្រោមច្បាប់រដ្ឋបាលរបស់វៀតណាមនោះ ច្បាប់បែបនេះ ត្រូវបានប្រើប្រាស់ជាយូរមកហើយនៅក្នុងប្រទេសមួយចំនួន ទាំងជម្រើសសម្រាប់ការផាកពិន័យ ឬសកម្មភាពជួយសហគមន៍ និងផាកពិន័យរួមគ្នាតែម្តង។
ទីក្រុងហូជីមិញក៏នឹងបង្កើនការអនុវត្តច្បាប់លើអ្នកបំពានច្បាប់ចរាចរណ៍ ដែលបណ្តាលឱ្យមានគ្រោះថ្នាក់ រួមទាំងការបើកបរក្នុងស្ថានភាពស្រវឹង និងការបើកបរលើសល្បឿនកំណត់។ ជាមួយគ្នានេះ នាយកដ្ឋានសំណង់នឹងធ្វើសេចក្តីព្រាងផែនការ «ទីក្រុងសុវត្ថិភាពចរាចរណ៍» ក្នុងគោលបំណងជំរុញប្រជាពលរដ្ឋឆ្ពោះទៅរកការប្រើប្រាស់សេវាដឹកជញ្ជូនសាធារណៈ ក៏ដូចជាការកំណត់ស្តង់ដារការបំភាយឧស្ម័នទាប និងលើកកម្ពស់យានជំនិះបៃតង ឬយានជំនិះមិនប៉ះពាល់ដល់បរិស្ថាន។
ចាប់តាំងពីឆ្នាំ២០២០មក ការផាកពិន័យចំពោះបទល្មើសចរាចរណ៍នៅក្នុងប្រទេសវៀតណាម ត្រូវបានកែសម្រួលចំនួន ៣ លើក ដោយពិន័យកើនឡើងជាលំដាប់។ ជាក់ស្តែង ការផាកពិន័យសម្រាប់ការបើកបំពានភ្លើងក្រហមកើនឡើងពីចន្លោះ ១១៤ ទៅ ១៩០ដុល្លារអាមេរិក ទៅ ៦៨១ ទៅ ៧៥៧ដុល្លារ ចាប់តាំងពីឆ្នាំ២០២៥។
ទីក្រុងហូជីមិញ ដែលបច្ចុប្បន្នគ្រប់គ្រងយានយន្តជាង ១៣លានគ្រឿង បន្ទាប់ពីការរួមបញ្ចូលគ្នាជាមួយខេត្ត Binh Duong និងខេត្ត Ba Ria-Vung Tau នោះ បានកត់ត្រា គ្រោះថ្នាក់ចរាចរណ៍ចំនួន ១ ៣២៨ ករណី នៅក្នុងរយៈពេល៩ខែដំបូង នៃឆ្នាំនេះ ដែលបណ្តាលឱ្យមានមនុស្សស្លាប់ ៦៦៦ នាក់ និងរបួស ៧១ នាក់។ នោះបានកត់សម្គាល់ឃើញពីការធ្លាក់ចុះនៃករណីគ្រោះថ្នាក់ ៣១% និងការថយចុះចំនួន ៤១% នៃអ្នករងរបួស បើប្រៀបធៀបទៅនឹងរយៈពេលដូចគ្នា កាលពីឆ្នាំមុន៕
ចែករំលែកព័តមាននេះ