ក្រុមចម្រុះអារ៉ាប់នាំមុខដោយអារ៉ាប៊ី សាអ៊ូឌីត កាលពីថ្ងៃទី២៣ មេសា នៅតែបន្តការវាយប្រហារតាមអាកាសប្រឆាំងពួកឧទ្ទាមស៊ីអីុតហ៊ូធីនៅយេម៉ែន ខណៈដែល អ.ស.ប ប្រកាសពីការតែងតាំង
ក្រុមចម្រុះអារ៉ាប់នាំមុខដោយអារ៉ាប៊ី សាអ៊ូឌីត កាលពីថ្ងៃទី២៣ មេសា នៅតែបន្តការវាយប្រហារតាមអាកាសប្រឆាំងពួកឧទ្ទាមស៊ីអីុតហ៊ូធីនៅយេម៉ែន ខណៈដែល អ.ស.ប ប្រកាសពីការតែងតាំងអ្នកអាជ្ញាកណ្តាលថ្មីទទួលបន្ទុកបញ្ចប់ជម្លោះនៅប្រទេសនេះដែលបណ្តាលឱ្យមនុស្សស្លាប់ជាង១.០០០នាក់ហើយ ។
ជនជាតិម៉ូរីតានី លោក ISMAIL OULD CHEIKH AHMED នឹងត្រូវជំនួសលោក JAMAL BENOMAR ដែលសុំលាលែង ព្រោះតែពួកអ្នកគាំទ្រប្រធានាធិបតីយេម៉ែនរស់នៅនិរទេសលោកអាប់ដ៍ រ៉ាបូ ម៉ាន់សួរ ហាឌី និងបណ្តាសម្ព័ន្ធមិត្តនៅតំបន់ឈូងសមុទ្រពែរ្ស៍រិះគន់។ ការតែងតាំងថ្មីនេះនឹងចូលជាធរមាននាថ្ងៃទី២៧ មេសា ប្រសិនបើគ្មានប្រទេសណាមួយក្នុងក្រុមប្រឹក្សាសន្តិសុខ អ.ស.ប ជំទាស់ទេនោះ ។
ការចរចាឡើងវិញក្រោមការឧបត្ថម្ភរបស់ អ.ស.ប ដែលពួកឧទ្ទាមហ៊ូធីចង់បានអាចធ្វើ តែបន្ទាប់ពីការបញ្ឈប់ទាំងស្រុងការវាយប្រហារតាមអាកាសដូចការទាមទាររបស់ពួកនេះ តែ២ថ្ងៃហើយក្រោយប្រកាសពីការបញ្ឈប់យុទ្ធនាការវាយប្រហារតាមអាកាសចាប់ពីថ្ងៃទី២៦ មីនាមក ការទម្លាក់គ្រាប់បែកនៅតែបន្ត។ កាលពីយប់ថ្ងៃទី២២ មេសា និងនាថ្ងៃទី២៣ មេសា ការវាយប្រហារតាមអាកាសកើតមានក្នុងបណ្តាតំបន់មានវត្តមានពួកហ៊ូធីនៅជិតរដ្ឋធានីសាណានៅ HODEIDA ភាគខាងលិច និងនៅជិតទីក្រុងកំពង់ផែអាដេនភាគខាងត្បូងប្រទេស ដែលនៅទីនោះនៅតែមានការប៉ះទង្គិចគ្នាខ្លាំងក្លារវាងពួកឧទ្ទាម និងពួកយុទ្ធជនដែលស្មោះត្រង់នឹងលោកហាឌី ។
នៅក្រុងអាដេន មនុស្ស៦នាក់ស្លាប់ និង៥៦នាក់ទៀតត្រូវរបួសរយៈពេល២៤ម៉ោងចុងក្រោយនេះនៃការប្រយុទ្ធគ្នា ។ នៅក្រុង DHALEH ពួកឧទ្ទាមស៊ីអុីតយ៉ាងតិច២៣នាក់ស្លាប់កាលពីថ្ងៃទី២៣ មេសា ដោយសារការវាយប្រហាររបស់ក្រុមចម្រុះអារ៉ាប់ ។ ចំណែកនៅទីក្រុង TAEZ វិញ អ្នកទទួលខុសត្រូវខាងកាកបាទក្រហមម្នាក់គូសបញ្ជាក់ថា ក្រុមរបស់គេរកឃើញសាកសពទាហាន១០នាក់ក្រោយពីមានការវាយប្រហាររបស់ពួកឧទ្ទាមលើបន្ទាយយោធាសិ្នទ្ធលោកហាឌីមួយមក ។
អារ៉ាប៊ី សាអ៊ូឌីត រងការរិះគន់យ៉ាងខ្លាំងចំពោះការវាយប្រហារដែលសម្លាប់ជនស៊ីវិលយ៉ាងច្រើន ។ អង្គការសុខភាពពិភពលោករៀបរាប់រួចហើយពីតុល្យការមនុស្សស្លាប់១.០៨០នាក់ និងរបួស៤.៣៥២នាក់ ទាំងស៊ីវិលទាំងយោធាចាប់តាំងពីថ្ងៃទី១៩ មីនា មក ។
ដោយសារជម្លោះនៅយេម៉ែនចូលរួមដោយប្រទេសអ្នកនាំប្រេងចេញជាច្រើនញ៉ាំងឱ្យតម្លៃប្រេងកាតហាក់ឡើងខ្ពស់វិញ ពិសេសនៅទីផ្សារប្រេងក្រុងញូវយ៉កកាលពីថ្ងៃទី២៣ មេសា ៕
ចែករំលែកព័តមាននេះ