រាជធានីភ្នំពេញ ៖ នួន ភិរក្ស អ្នកប្រដាល់ចាស់វស្សាមកពីក្លិបតាព្រហ្មមានជ័យ ដែលបានបាត់មុខពីលើសង្វៀនជាច្រើនខែមកហើយនោះ ពេលនេះត្រូវគេផ្គូផ្គងឱ្យជួបប្រកួតជាមួយអ្នកប្រដាល់ជើងថ្មី ពេជ្រ ម៉ាប់ មកពីក្លិបសាលវ័ន្តកីឡានៅលើសង្វៀនទូរទស្សន៍ស៊ីធីអិននាថ្ងៃអាទិត្យ ទី២៦ មេសា ខាងមុខនេះ ។
នួន ភិរក្ស ធ្លាប់ឡើងសង្វៀនប្រកួតរាប់រយដងមកហើយ ដូច្នេះបទពិសោធន៍និងថ្វីដៃប្រកួតក៏ខ្លាំងមិនធម្មតាកាលពី២-៣ឆ្នាំមុន តែពេលនេះដោយសារបាត់មុខយូរពេកមិនដឹងថា កីឡាកររូបនេះនៅខ្លាំងដូចមុនឬយ៉ាងណា ទើបបានជាអ្នករៀបចំកម្មវិធីផ្គូផ្គងឱ្យជួបប្រកួតជាមួយកីឡាករពេជ្រ ម៉ាប់ ដែលនៅខ្ចីបទពិសោធន៍ប្រកួតនៅឡើយ ។
តាមការសង្កេតការប្រកួតកន្លងមក នួន ភិរក្ស គឺជាអ្នកប្រដាល់ជើងខ្លាំងមួយរូបដែលមានជំនាញប្រើផ្លែកែង និងជង្គង់ផ្តួលគូប្រកួត។ ចំណែក ពេជ្រ ម៉ាប់ ថ្វីដ្បិតតែគេឈានជើងឡើងសង្វៀនប្រកួតមិនបានយូរដូច នួន ភិរក្ស បុ៉ន្តែកុំចង់មើលងាយឱ្យសោះព្រោះគេនៅក្មេង កម្លាំងក៏ខ្លាំង ថែមទាំងមានល្បិចប្រយុទ្ធមិនចាញ់អ្នកប្រដាល់ចាស់វស្សា នួន ភិរក្ស បុ៉ន្មានឡើយ។ ម្យ៉ាងវិញទៀតមួយរយៈមកនេះ ពេជ្រ ម៉ាប់ បានសាងកេរ្តិ៍ឈ្មោះនៅលើសង្វៀនបានលឿនគ្រាន់បើតាមរយៈការយកឈ្នះលើគូប្រកួតផ្ទួនៗគ្នា ដូច្នេះសម្រាប់ការជួបគ្នារវាងអ្នកទាំង២លើកនេះមិនដឹងថា អ្នកណាផ្តួលអ្នកណាទេ ។
ហែល វ៉ា មកពីក្លិបឃ្លាំងមឿងកីឡាខេត្តពោធិ៍សាត់ ជួបប្រកួតជាមួយ ចាន់ រតនៈ មកពីក្លិបខ្លារខិនមានរិទ្ធ ដែលជាគូសងសឹកនឹងគ្នា។ គូនេះធ្លាប់ជួបគ្នាចំនួន៤លើករួចមកហើយ ឯលទ្ធផលគឺចាញ់២ដង ឈ្នះ២ដងដូចគ្នាធ្វើឱ្យពួកគេទាំង២នាក់ហាក់មិនទាន់អស់ចិត្ត ក៏សុំឡើងសង្វៀនប្រកួតគ្នាម្តងទៀត ។ ចាំមើលលើកនេះនរណាមានសំណាងដណ្តើមបានជ័យជម្នះ ។
នៅលើសង្វៀនដដែលកីឡាករសួង សុវណ្ណថា មកពីសមាគមកីឡាប្រដាល់ក្រសួងការពារជាតិ ត្រូវគេផ្គូផ្គងឱ្យជួបប្រកួតជាមួយកីឡាករសេក គឹមរួន មកពីក្លិបតំបន់ប្រតិបត្តិការសឹករងខេត្តសៀមរាប ។ កីឡាករសោម ចន្ថា មកពីក្លិបគីសែមានរិទ្ធ ជួបប្រកួតជាមួយកីឡាករឡុង សុភា មកពីក្លិបសាលវ័ន្តកីឡា ។ កីឡាករព្រឿង សុជាតិ មកពីសមាគមកីឡាប្រដាល់ក្រសួងការពារជាតិ ជួបប្រកួតជាមួយកីឡាករសេក ចាន់រាជ មកពីក្លិបតំបន់ប្រតិបត្តិការសឹករងខេត្តសៀមរាប និងកីឡាករជ័យ រ៉ាវុធ មកពីក្លិបឃ្លាំងមឿងកីឡាខេត្តពោធិ៍សាត់ ប្រកួតជាមួយកីឡាករប្រាក់ សុជា មកពីក្លិបតាឯកមានរិទ្ធ ៕
ចែករំលែកព័តមាននេះ