វី ស្រីខួច បើកឆាកប្រកួតប្រដាល់សាកលអន្តរជាតិ
រាជធានីភ្នំពេញ ៖ ជាលើកទីមួយដែលកីឡាការិនីវ័យក្មេងនាង វី ស្រីខួច ត្រូវបានសហព័ន្ធកីឡាប្រដាល់កម្ពុជាជ្រើសឲ្យទៅចូលរួមប្រកួតប្រដាល់នៅក្នុងប្រទេសឥណ្ឌូណេស៊ីនៅសប្ដាហ៍នេះ ។
រាជធានីភ្នំពេញ ៖ ជាលើកទីមួយដែលកីឡាការិនីវ័យក្មេងនាង វី ស្រីខួច ត្រូវបានសហព័ន្ធកីឡាប្រដាល់កម្ពុជាជ្រើសឲ្យទៅចូលរួមប្រកួតប្រដាល់នៅក្នុងប្រទេសឥណ្ឌូណេស៊ីនៅសប្ដាហ៍នេះ ។
រាជធានីភ្នំពេញ ៖ ជាលើកទីមួយដែលកីឡាការិនីវ័យក្មេងនាង វី ស្រីខួច ត្រូវបានសហព័ន្ធកីឡាប្រដាល់កម្ពុជាជ្រើសឲ្យទៅចូលរួមប្រកួតប្រដាល់នៅក្នុងប្រទេសឥណ្ឌូណេស៊ីនៅសប្ដាហ៍នេះ ។ មកទល់នឹងថ្ងៃទី២២ មេសានេះ មិនមានសេចក្ដីរាយការណ៍ណាមួយបញ្ជាក់ថា នាងប៉ះប្រកួតជាមួយកីឡាការិនីបរទេសណាខ្លះ និងមានលទ្ធផលបែបណានៅឡើយទេ ប៉ុន្តែអ្វីដែលមានការចាប់អារម្មណ៍ គឺនាងបានឡើងប្រដាល់សាកលអន្តរជាតិលើកដំបូង បន្ថែមពីលើភាពល្បីល្បាញក្នុងការប្រកួតប្រដាល់ក្បាច់គុនបុរាណខ្មែរ ។
វី ស្រីខួច បានចេញទៅប្រកួតនៅក្នុងប្រទេសឥណ្ឌូណេស៊ីតាំងពីល្ងាចថ្ងៃសៅរ៍ ទី១៨ មេសាម្ល៉េះ ដោយការប្រកួតដែលនាងចូលរួមបានចាប់ផ្ដើមឡើងតាំងពីថ្ងៃទី២០ មេសា ម្សិលម្ង៉ៃ ។ ការប្រកួតនេះស្ថិតក្នុងព្រឹត្តិការណ៍ President Cup នៅប្រទេសឥណ្ឌូណេស៊ី ដែលជាព្រឹត្តិការណ៍ប្រកួតកម្តៅសាច់ដុំដល់កីឡាករ-កីឡាការិនីប្រដាល់សាកលទាំងអស់សម្រាប់ត្រៀមចូលរួមប្រកួតនៅក្នុងព្រឹត្តិការណ៍ស៊ីហ្គេមក្នុងពេលដ៏ខ្លី ។ យោងតាមការបញ្ជាក់របស់លោករាជ សុផែន សមាជិកគណៈកម្មាធិការប្រតិបត្តិសហព័ន្ធកីឡាប្រដាល់កម្ពុជាបានអះអាងថា ដំណើរចេញប្រកួតរបស់កីឡាការិនី វី ស្រីខួច បានអមដំណើរដោយកីឡាករចំនួន៥រូបរួមមាន កីឡាករសុខ ទូច ទៅប្រកួតក្នុងប្រភេទទម្ងន់៧៥គីឡូក្រាម ។ កីឡាករពេជ្រ តុលា ទៅប្រកួតក្នុងប្រភេទទម្ងន់៥៦គីឡូក្រាម កីឡាករពេជ្រ ម្ទេសខ្មាំង ទៅប្រកួតក្នុងប្រភេទទម្ងន់៥២គីឡូក្រាម កីឡាករវ៉ែន រដ្ឋា ទៅប្រកួតក្នុងប្រភេទទម្ងន់៦៤គីឡូក្រាម និងកីឡាករសាក់ ម៉ៃសួន ទៅប្រកួតក្នុងប្រភេទទម្ងន់៥៦គីឡូក្រាម ។
កីឡាករ-កីឡាការិនីទាំងអស់ដែលបង្ហាញមុខនៅក្នុងព្រឹត្តិការណ៍នេះត្រូវប្រកួតជាលក្ខណៈប្រដាល់សាកលទាំងអស់ ខណៈដែលអ្នកទាំង៦តំណាងឲ្យកម្ពុជា គឺជាបេក្ខភាពត្រូវបញ្ជូនទៅកាន់ការប្រកួតស៊ីហ្គេមតែម្ដងនៅក្នុងប្រទេសសិង្ហបុរីខាងមុខ ។ លោកចាត់ទុកថា ដំណើរចេញប្រកួតនៅក្នុងប្រទេសឥណ្ឌូណេស៊ីលើកនេះជាការកម្តៅសាច់ដុំ ឆ្ពោះទៅកាន់វិថីអភិវឌ្ឍន៍បទពិសោធន៍របស់ខ្លួនកាន់តែប្រសើរនៅពេលបង្ហាញខ្លួនប្រកួតស៊ីហ្គេម ។ ព្រឹត្តិការណ៍ President Cup ដែលប្រទេសឥណ្ឌូណេស៊ីធ្វើជាម្ចាស់ផ្ទះនេះ លោកថាមិនច្បាស់ពីរឿងរៀបចំលើកទីប៉ុន្មាននោះទេ ដោយគ្រាន់តែបានដឹងថា ប្រទេសម្ចាស់ផ្ទះមានបំណងដកស្រង់យកបទពិសោធន៍ពីកីឡាករ-កីឡាការិនីផ្នែកប្រដាល់សាកលទាំងអស់ដើម្បីពង្រឹងវិស័យប្រដាល់នៅក្នុងប្រទេសឥណ្ឌូណេស៊ីទាំងមូលមុនឈានទៅដណ្ដើមមេដាយស៊ីហ្គេមនៅប្រទេសសិង្ហបុរី ដែលរៀបចំធ្វើក្នុងខែមិថុនាខាងមុខ ។
លោកថា ព្រឹត្តិការណ៍ President Cup មានការចូលរួមដោយប្រទេសទាំង១១នៅក្នុងតំបន់អាស៊ាន និងមានការប្រគល់មេដាយសម្រាប់តំណែងជើងឯក បើទោះមិនច្បាស់តើប្រទេសដែលបានចូលរួម គឺគ្រប់ទាំង១១ដូចការចង់បានឬយ៉ាងណា ។ លោករាជ សុផែន បន្តទៀតថា ការប្រកួតទាំងមូលត្រូវបញ្ចប់នៅថ្ងៃទី២៦ មេសា បន្ទាប់ពីអាចរកឃើញកីឡាករ-កីឡាការិនីដែលជាជើងឯកក្នុងប្រភេទទម្ងន់នីមួយៗនៅវគ្គចុងក្រោយ ។ អ្វីដែលលោកបានដឹងពីព្រឹត្តិការណ៍ President Cup គឺបណ្ដាប្រទេសដែលបានបញ្ជូនកីឡាករ-កីឡាការិនីឲ្យចូលប្រកួត គឺសុទ្ធតែបានត្រៀមទុកជើងខ្លាំងល្អៗនៅក្នុងប្រភេទប្រដាល់សាកលដែលសុទ្ធតែជាក្ដីសង្ឃឹមរបស់បណ្ដាប្រទេសនៅអាស៊ាន ។ ងាកមកកាន់កីឡាការិនីវី ស្រីខួច វិញ លោករាជ សុផែន ប្រាប់ថា កាលពីមុនសហព័ន្ធកីឡាប្រដាល់កម្ពុជាកំណត់យក វី ស្រីឆាយ នោះទេ ដោយសារតែមើលឃើញថា កណ្ដាប់ដៃរបស់នាងមានទម្ងន់ធ្ងន់ល្អសមជាអ្នកប្រដាល់ផ្នែកសាកល ។ ប៉ុន្តែមកពីគីឡូរបស់នាងហាក់នៅស្ទើរពេក ទើបខាងសហព័ន្ធសម្រេចប្ដូរដាក់ វី ស្រីខួច វិញ ដែលនាំឲ្យនាងបានក្លាយជាកីឡាការិនីតំណាងជាតិសម្រាប់ការប្រកួតអន្តរជាតិមួយនេះដោយមានមុខទៅប្រកួតនៅស៊ីហ្គេមក្នុងខែមិថុនានោះផង ។
លោកមិនហ៊ានជឿថា សមត្ថភាពរបស់កីឡាករ-កីឡាការិនីកម្ពុជានឹងមានលទ្ធផលល្អប្រសើរនោះទេ ដោយសារតែការប្រកួតទាំងមូល គឺបានចែកពូលជាមួយនឹងជើងខ្លាំងមកពីប្រទេសផ្សេងទៀត ហើយធ្វើការប្រកួតគ្នាវិលជុំរហូតទាល់តែអាចរកឃើញអ្នកមានពិន្ទុនាំមុខធ្វើជាម្ចាស់ជើងឯករបស់ President Cup តាមប្រភេទទម្ងន់នីមួយៗ។ គាប់ជួនជាធនធានកីឡាកររបស់ប្រទេសឥណ្ឌូណេស៊ីជាម្ចាស់ផ្ទះ និងរបស់ប្រទេសថៃសុទ្ធតែល្អសម្រាប់ការប្រដាល់សាកលនោះផង ទើបក្ដីសង្ឃឹមសម្រាប់ការដណ្ដើមបានមេដាយមាស មិនមែនជារឿងងាយស្រួល ។ ទោះបីយ៉ាងណា លោករំពឹងថា កីឡាករពេជ្រ ម្ទេសខ្មាំង អាចនឹងមានសង្ឃឹមខ្ពស់ដោយសារតែល្អខាងផ្នែកប្រដាល់ក្បាច់គុនបុរាណខ្មែរ ក៏ល្អក្នុងការប្រើកណ្ដាប់សម្រាប់ការប្រដាល់សាកលផងដែរ។ ចំពោះ វី ស្រីខួច លោកក៏មានការរំពឹងច្រើនផងដែរ បើទោះជានាងត្រូវគេចមិនផុតពីការប្រឈមដ៏ខ្លាំងក្លាពីសំណាក់ដៃគូបរទេស ។
វី ស្រីខួច បានអះអាងថា ខ្លួនចូលហ្វឹកហាត់ច្រើនសប្ដាហ៍ ដោយមុនព្រឹត្តិការណ៍ President Cup ចាប់ផ្ដើមមួយថ្ងៃ នាងនិងមិត្តរួមក្រុមក៏បានហ្វឹកហាត់សមកម្លាំងនៅក្នុងប្រទេសឥណ្ឌូណេស៊ីនោះដែរ ។ មហាជនភាគច្រើនកំពុងទន្ទឹងរង់ចាំមើលលទ្ធផលរបស់តំណាងកម្ពុជាទាំង៦ រូបសម្រាប់ការប្រដាល់សាកលរបស់ប្រទេសឥណ្ឌូណេស៊ីដែលជាម្ចាស់ផ្ទះ ។ បើទោះជាមានការប៉ាន់ស្មានថា ម្ចាស់ផ្ទះនឹងទទួលបានមេដាយសម្រាប់ព្រឹត្តិការណ៍នេះនាំមុខ ក៏កីឡាករកម្ពុជា និងកីឡាករមកពីប្រទេសផ្សេងទៀត ក៏ទំនងជាអាចឆក់បានមេដាយមាសក្នុងប្រភេទទម្ងន់ណាមួយមិនចាញ់គ្នាដែរ ។ ចាំមើលតើកីឡាប្រដាល់សាកលកម្ពុជាមានវាសនាល្បីល្បាញ និងលេចធ្លោដូចកីឡាតេក្វាន់ដូ និងប៉េតង់ក្នុងព្រឹត្តិការណ៍អន្តរជាតិនេះដែរឬទេ ?
ចែករំលែកព័តមាននេះ