រាជធានីភ្នំពេញ ៖ ប្រភពព័ត៌មានពីមេធាវីការពារក្តីឱ្យជនត្រូវចោទថោង ចំរើន និងអ្នកស្រី កែវ សារី ជាឪពុកម្តាយឧកញ៉ា ថោង សារ៉ាត់ ដែលកំពុងគេចខ្លួនបានប្រាប់ឱ្យដឹងថា អាចនៅថ្ងៃទី៥ ឬទី៦ដើមខែមេសាខាងមុខ
រាជធានីភ្នំពេញ ៖ ប្រភពព័ត៌មានពីមេធាវីការពារក្តីឱ្យជនត្រូវចោទថោង ចំរើន និងអ្នកស្រី កែវ សារី ជាឪពុកម្តាយឧកញ៉ា ថោង សារ៉ាត់ ដែលកំពុងគេចខ្លួនបានប្រាប់ឱ្យដឹងថា អាចនៅថ្ងៃទី៥ ឬទី៦ដើមខែមេសាខាងមុខ សាលាដំបូងរាជធានីគ្រោងនិងបើកសវនាការលើសំណុំរឿងកូនក្តីរបស់លោកពាក់ព័ន្ធបទល្មើសរក្សាទុក និងកាន់កាប់អាវុធដោយគ្មានការអនុញ្ញាត ។
ជនត្រូវចោទឈ្មោះ ថោង ចំរើន និងប្រពន្ធឈ្មោះ កែវ សារី ត្រូវបានសមត្ថកិច្ចនគរបាលរាជធានីភ្នំពេញឃាត់ខ្លួនកាលពីអំទ្បុងចុងឆ្នាំ២០១៤ នៅភូមិគ្រឹះរបស់ពួកគាត់ ដែលពេលនោះសមត្ថកិច្ចបានចុះទៅឆែកឆេររកចាប់ខ្លួនឧកញ៉ា ថោង សារ៉ាត់ ជាកូនដែលពាក់ព័ន្ធថា ជាអ្នកនៅពីក្រោយខ្នងលើឃាតកម្មបាញ់សម្លាប់លោកឧកញ៉ា អឹុង ម៉េងជឺ យ៉ាងសាហាវព្រៃផ្សៃ និងដ៏រន្ធត់នៅមុខហាងលក់ផ្លែឈើមួយកន្លែងក្បែរអាងទឹកពហុកីទ្បដ្ឋានជាតិអូទ្បាំពិក ស្ថិតតាមបណ្តោយមហាវិថីព្រះមុនីរ៉េត សង្កាត់ទួលស្វាយព្រៃទី២ ខណ្ឌចំការមន កាលពីវេលាម៉ោងជាង៧យប់ ថ្ងៃទី២២ វិច្ឆិកា ឆ្នាំ២០១៤ ។
មានការកត់សម្គាល់ថា ក្រោយកើតមានអំពើឃាតកម្មបាញ់សម្លាប់លោកឧកញ៉ា អ៊ឹង ម៉េងជឺ ជាង១សប្តាហ៍ ពោលគឺថ្ងៃទី១ ធ្នូ ឆ្នាំ២០១៤ នគរបាលព្រហ្មទណ្ឌកម្រិតធ្ងន់រាជធានីភ្នំពេញ សហការជាមួយនាយកដ្ឋាននគរបាលព្រហ្មទណ្ឌក្រសួងមហាផ្ទៃ វែកមុខក្រុមឃាតករឈានទៅដល់ការឃាត់ខ្លួនជនសង្ស័យបានចំនួន៥នាក់ និងបានបញ្ជូនទៅកាន់សាលាដំបូងរាជធានីភ្នំពេញ ហើយពួកគេត្រូវបានឃុំខ្លួនដាក់ពន្ធនាគារជាបណ្តោះអាសន្នរួចហើយដែរ ។ ការស្រាវជ្រាវឈានទៅដល់ការឃាត់ខ្លួនជនសង្ស័យដំបូង បានចំនួន៤នាក់ក្នុងនោះ៣នាក់ជាអង្គរក្សនិងម្នាក់ទៀតគឺឧកញ៉ាថោង សារ៉ាត់ ដែលកំពុងជិះរថយន្តឆ្លងកាត់ស្ពាន ក្នុងភូមិចំរើនផល សង្កាត់បឹងទំពុន ខណ្ឌមានជ័យ ។ ក្រោយពេលឃាត់ខ្លួនក៏បាននាំទៅកាន់ស្នងការដ្ឋាននគរបាលរាជធានីភ្នំពេញ ។ ពេលទៅដល់ស្នងការដ្ឋាននគរបាលមិនបាន១ដង្ហើមចង្រិតផង ស្រាប់តែមានការដោះលែងឧកញ៉ា ថោង សារ៉ាត់ ឱ្យទៅផ្ទះវិញ លុះពេលរសៀលថ្ងៃដដែល ឪពុកម្តាយឧកញ៉ាថោង សារ៉ាត់ បានធ្វើសន្និសីទកាសែតចង់បង្ហាញពីភាពស្អាតស្អំ រួមទាំងការបដិសេធថា កូនប្រុសពួកគាត់(ថោង សារ៉ាត់) មិនមានជាប់ពាក់ព័ន្ធក្នុងរឿងបាញ់សម្លាប់លោកឧកញ៉ា អ៊ឹង ម៉េងជឺនោះទេ ។ ជនត្រូវចោទឈ្មោះ ថោង ចំរើន អ្នកស្រី កែវ សារី ក៏បានចោទប្រកាន់ធ្ងន់ៗទៅលើសមត្ថកិច្ច ហើយត្រូវបានសារព័ត៌មានក្នុងស្រុកស្រង់សម្តីផ្សាយជាសាធារណៈ ធ្វើឱ្យមានការចាប់អារម្មណ៍ពីគ្រប់មជ្ឈដ្ឋានជាតិនិងអន្តរជាតិ តែមុននេះប្រមាណជា៣ទៅ៤ម៉ោងឧកញ៉ាថោង សារ៉ាត់ អាចបានផ្លោះរបងជិះទូកទៅកាន់ប្រទេសជិតខាងបាត់ទៅហើយដែរ។ ក្រោយពីធ្វើសន្និសីទសារព័ត៌មាននៅវេលាល្ងាចបន្តិច សមត្ថកិច្ចនគរបាលរាជធានីភ្នំពេញ និងនាយកដ្ឋាននគរបាលក្រសួងមហាផ្ទៃ បានបង្កើតគណៈកម្មការ១ចុះទៅឆែកឆេរបុរី៩៩៩ នៅសង្កាត់ចាក់អង្រែក្រោម ខណ្ឌមានជ័យ បានរកឃើញអាវុធខ្លីនិងវែងចំនួន៦ដើម និងសម្ភារយោធា១ចំនួនទៀត ទើបត្រូវបានសមត្ថកិច្ចឃាត់ខ្លួនឪពុកម្តាយឧកញ៉ា ថោង សារ៉ាត់ ពាក់ព័ន្ធករណីរក្សាទុកអាវុធដោយខុសច្បាប់ ក្រោយមកតុលាការបានសម្រេចឃុំខ្លួនប្តីប្រពន្ធ២នាក់នោះដាក់ពន្ធនាគារជាបណ្តោះអាសន្ន ។
ក្រោយពីមានការឃុំខ្លួនលោក ថោង ចំរើន និងអ្នកស្រី កែវ សារី ជាឪពុកម្តាយឧកញ៉ាថោង សារ៉ាត់ ម្ចាស់បុរី៩៩៩ និងជាថៅកែសាច់ប៉ាតេមានជ័យ បាននិងកំពុងលាក់ខ្លួនពួនអាត្មាមិនដឹងនៅទីណានោះ ស្រាប់តែលេចមុខឧកញ៉ា ថោង សារ៉ាត់ តាមសង្គមហ្វេសប៊ុកត្រូវបានគេបង្ហោះ និងចែកចាយសម្តីឧកញ៉ាថោង សារ៉ាត់ ចំនួន៣លើកមកហើយ ។ ក្នុងចន្លោះពេលជាង៤ខែក្រោយ ពីករណីឃាតកម្មបាញ់សម្លាប់លោកឧកញ៉ា អឹុង ម៉េងជឺ សកម្មភាពក្នុងសំណុំរឿងនេះ បានមានរូបភាពបែកការណ៍ជាបន្តបន្ទាប់ ដូចជាសុខៗចៅក្រមស៊ើបសួរសាលាដំបូងរាជធានីភ្នំពេញ ធ្វើការដោះលែងឪពុកម្តាយឧកញ៉ាថោង សារ៉ាត់ មិនប្រក្រតី ។ ការដោះលែងឪពុកម្តាយឧកញ៉ា ថោង សារ៉ាត់ បានធ្វើឱ្យមានប្រតិកម្មពីសំណាក់ប្រមុខរាជរដ្ឋាភិបាល ថ្លែងចំហរក្នុងពិធីចែកសញ្ញាបត្រដល់និស្សិត ដែលប្រតិកម្មនោះបានឈានដល់ការដកតំណែងលោក អាំង មាលតី អតីតប្រធានសាលាដំបូងរាជធានីភ្នំពេញ ព្រមទាំងមានការចាប់ខ្លួនលោកឧត្តមសេនីយ៍យោធាម្នាក់ជាគ្រូអូមអាម និងជាមនុស្សសិ្នទ្ធនិងលោកអាំង មាលតី ដែលបានស្នើសុំអង្គភាពយកជាប់តាមខ្លួនខុសពីការងារជំនាញ។ ដាក់ពន្ធនាគារពាក់ព័ន្ធពីបទជ្រាតជ្រែកការងារសាធារណៈ និងប្រើប្រាស់ស្លាកលេខរថយន្តខ.មក្លែងក្លាយ ។ នៅមានរឿងទៀតដូចជា ក្រោយពីចៅក្រមស៊ើបសួរដោះលែងជនត្រូវចោទថោង ចំរើន និងអ្នកស្រី កែវ សារី ពួកគាត់ត្រូវជាប់កាតព្វកិច្ច១០ចំណុច ដែលដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ។ សុខៗបែរជា២នាក់ប្តីប្រពន្ធនោះនាំគ្នាជួលរថយន្តសង្គ្រោះ១គ្រឿង ធ្វើជាដាក់សេរ៉ូមចេញទៅបំណងព្យាបាលនៅប្រទេសវៀតណាមទាំងយប់ ដែលទង្វើនេះជាប្រការខុសឆ្លងនិងច្បាប់ហាមឃាត់ដាក់ឱ្យស្ថិតនៅក្រៅឃុំ ក៏ត្រូវសមត្ថកិច្ចអនុវត្តតាមដីការបស់សាលាដំបូងរាជធានីភ្នំពេញ ឱ្យចាប់ខ្លួនទាំងយប់នៅជិតស្ពានស្ទឹងស្លូតត្រើយខាងកើតអ្នកលឿងក្នុងខេត្តព្រៃវែង ហើយក៏ត្រូវបាននាំទៅដាក់ពន្ធនាគារវិញ ។ បន្ទាប់មកទៀត ក្រោយពី២នាក់ប្តីប្រពន្ធជាប់ឃុំចៅក្រមស៊ើបអង្កេតបានអនុញ្ញាតឱ្យអនុរក្សពន្ធនាគារនាំជនត្រូវចោទទាំង២នាក់មកសាកសួរ ក្នុងនោះក៏មានវត្តមានអ្នកស្រី តាំង គឹមឆេង ភរិយាជនរងគ្រោះចូលបំភ្លឺជូនតុលាការដែរ ។
អ្នកស្រីជាភរិយាសពលោកឧកញ៉ា អ៊ឹង ម៉េងជឺ បានទាមទារដល់ស្ថាប័នតុលាការជួយរកយុត្តិធម៌ ផ្តល់ភាពកក់ក្តៅក្នុងនាមអ្នកស្រីជាជនរងគ្រោះ ។ ក្នុងនោះអ្នកស្រីបានទាមទារសំណងរដ្ឋប្បវេណីពីក្រុមឃាតករជាមេខ្លោង ក្នុងទឹកប្រាក់ចំនួន៥០លានដុល្លារអាមេរិក និងបក្សពួកជាជនដៃដល់ក្នុងម្នាក់ចំនួន១០លានដុល្លារអាមេរិក ។ មេខ្លោងសំដៅលើឧកញ៉ា ថោង សារ៉ាត់ និងបក្សពួកជាជនដៃដល់ ព្រមទាំងអ្នកសមគំនិតចំនួន៥នាក់ ដែលកំពុងជាប់ឃុំមាន ១-ឈ្មោះ សៀង វាសនា ភេទប្រុស អាយុ៤៤ឆ្នាំ ២-ឈ្មោះ មាស សម្បត្តិ ភេទប្រុស អាយុ៣៧ឆ្នាំ ៣-ឈ្មោះ កូយ ច័ន្ទថុល ភេទប្រុស អាយុ៣៩ឆ្នាំ ៤-ឈ្មោះ លី សៅ ហៅវី ភេទប្រុស អាយុ៤២ឆ្នាំ និងម្នាក់ទៀតជាអ្នកផ្តល់មធ្យោបាយម៉ូតូជិះធ្វើសកម្មភាព ។ ក្រុមឃាតករក្នុងសំណុំរឿងឃាតកម្មលើលោកឧកញ៉ា អ៊ឹង ម៉េងជឺ ចៅក្រមស៊ើបសួរសាលាដំបូងរាជធានីភ្នំពេញ នៅមិនទាន់បិទការស៊ើបអង្កេតនៅទ្បើយទេ និងនៅកំពុងបន្តតាមនីតិវិធី ។ ដោយទ្បែកតែសំណុំរឿងឪពុកម្តាយឧកញ៉ា ថោង សារ៉ាត់ ជិតដល់ថ្ងៃបើកសវនាការលើអង្គសេចក្តីហើយ ដែលគេនិយាយថា មិនទាក់ទិនដល់ការចោទជុំវិញករណីឃាតកម្មនេះទេ ៕
ចែករំលែកព័តមាននេះ