រាជធានីភ្នំពេញ ៖ ការប្រកួតបាល់ទាត់ដណ្តើមពានរង្វាន់ខ្មែររៀលអុីស្ទេតប្រចាំឆ្នាំលើកទី៤ ជុំទី១ បានចាប់ផ្តើមដំណើរការជាផ្លូវការហើយកាលពីថ្ងៃអាទិត្យ ទី២៩ ខែមីនា កន្លងមកនេះ ដោយមានក្រុមបាល់ទាត់ចំនួន២០
រាជធានីភ្នំពេញ ៖ ការប្រកួតបាល់ទាត់ដណ្តើមពានរង្វាន់ខ្មែររៀលអុីស្ទេតប្រចាំឆ្នាំលើកទី៤ ជុំទី១ បានចាប់ផ្តើមដំណើរការជាផ្លូវការហើយកាលពីថ្ងៃអាទិត្យ ទី២៩ ខែមីនា កន្លងមកនេះ ដោយមានក្រុមបាល់ទាត់ចំនួន២០ បានចុះឈ្មោះចូលរួមប្រកួត ។
លោកគីម ហ៊ាង អ្នករៀបចំការប្រកួតបាល់ទាត់ខ្មែររៀលអុីស្ទេត បានឱ្យដឹងថា នេះជាឆ្នាំទី៤ ហើយដែលក្រុមហ៊ុនខ្មែររៀលអុីស្ទេតបានរៀបចំឱ្យមានព្រឹត្តិការណ៍នៃការប្រកួតប្រចាំឆ្នាំនេះឡើងដែលមានកីឡាករចំនួន២០ក្រុមចូលរួម ក្នុងនោះ១០ក្រុមប្រកួតនៅលើទីលានដំរីស ស្ថិតនៅក្នុងសាលាគរុកោសល្យរាជធានីភ្នំពេញ និង១០ក្រុមទៀតប្រកួតនៅលើទីលាន Myteam។ លោកបន្តថា គោលបំណងដែលលោករៀបចំឱ្យមានព្រឹត្តិការណ៍នៃការប្រកួតបាល់ទាត់នេះឡើង គឺដើម្បីផ្សារភ្ជាប់នូវទំនាក់ទំនងរវាងអ្នករកស៊ីដូចគ្នា ក៏ដូចជាការបង្កើតនូវភាពស្និទ្ធស្នាលជាមួយគ្នាឱ្យបានច្រើន និងដើម្បីសុខភាពតែបុ៉ណ្ណោះ ។
ការប្រកួតនេះមិនដើម្បីផលចំណេញបុ៉ណ្ណោះនោះទេ គឺថែមទាំងបានចំណាយថវិកាផ្ទាល់ខ្លួនរបស់លោកយ៉ាងច្រើនទៀតផង ហើយអ្វីដែលចំណេញនោះគឺសុខភាពយើងទាំងអស់គ្នា។ ដោយឡែកការប្រកួតឆ្នាំនេះ គឺខុសពីឆ្នាំមុនៗ ដោយប្រាក់រង្វាន់មានចាប់ពីលេខ១ ដល់លេខ៤ មានប្រាក់រង្វាន់សម្រាប់ក្រុមដែលលេងគោរពវិន័យ និងរង្វាន់លើកទឹកចិត្តដល់កីឡាករដែលបានទាត់បាល់បញ្ចូលទីច្រើនជាងគេ ។ សម្រាប់ការប្រកួតថ្ងៃបើកឆាកដំបូងនេះមានតែ៥ប្រកួតបុ៉ណ្ណោះ ដែលធ្វើនៅទីលាន Myteam ។ ប្រកួតបើកឆាកម៉ោង៧ព្រឹក មាន៣ប្រកួត ជាលទ្ធផលក្រុម Canteen FC ប្រកួតឈ្នះក្រុម TyGi FC ក្នុងលទ្ធផល២-១ ។ ការប្រកួតនៅម៉ោង៩ព្រឹក ក្រុម HPL FC បានលត់ក្រុម Union FC យ៉ាងចាស់ដៃក្នុងលទ្ធផល៨-២ និងនៅម៉ោងបន្ទាប់ក្រុម Basak FC បានយកឈ្នះលើក្រុម Ambru ក្នុងលទ្ធផល៥-២ ។
ការប្រកួតនៅម៉ោង២រសៀលមាន២ប្រកួតទៀត ជាលទ្ធផលក្រុម Preysala FC យកឈ្នះលើក្រុម Khmer United FC ក្នុងលទ្ធផល២-១ និងក្រុមខណ្ឌពោធិសែនជ័យបានយកឈ្នះលើក្រុម Christinair tour ក្នុងលទ្ធផល២-១ ៕
ចែករំលែកព័តមាននេះ