ខេត្តកំពង់ឆ្នាំង ៖ រថយន្តធុនធំ២គ្រឿងដឹកអុសគ្មានច្បាប់ ត្រូវបានលោកនាយរងខណ្ឌរដ្ឋបាលព្រៃឈើកំពង់ឆ្នាំង ដឹកនាំកម្លាំងស្ទាក់ចាប់បាន ដើម្បីធ្វើការផាកពិន័យ ។ ការបង្ក្រាបបទល្មើសព្រៃឈើខាងលើនេះ បានធ្វើឡើងនៅម៉ោង៥ និង៤០នាទីល្ងាចថ្ងៃទី២៦
មីនា ២០១៥ ស្ថិតនៅមុខសាលាខេត្តកំពង់ឆ្នាំង ក្នុងសង្កាត់ប្អេរ ក្រុងកំពង់ឆ្នាំង។
លោកហោ ដារ៉ា នាយផ្នែករដ្ឋបាលព្រៃឈើកំពង់ឆ្នាំងបានឱ្យដឹងថា រថយន្តធុនធំទាំង២គ្រឿងនេះម៉ាកហ៊ីយ៉ាន់ដាយ១គ្រឿង ពាក់ស្លាកលេខស្វាយរៀង 3A-0952 ពណ៌ស្លែ អត់ស្លាកលេខ អ្នកបើកបរ ១-ឈ្មោះអឿន វណ្ណ អាយុ១៩ឆ្នាំ ២-ឈ្មោះអ៊ូ ម៉ុង អាយុ២០ឆ្នាំ ពួកគេរស់នៅភូមិស្ពានពោធ៍ ឃុំសេដ្ឋី ស្រុកសាមគ្គីមានជ័យ និងជាកម្មករបើកបររថយន្តអោយថៅកែអុស ។
អ្នកបើកបររថយន្តទាំង២នាក់នេះបានឱ្យដឹងថា ពួកគេបានដឹកអុសនេះមកពីចំណុចស្ពាន១០៤ ក្នុងភូមិដំណាក់អំពិល ឃុំក្រាំងស្គារ ស្រុកទឹកផុស ដឹកយកទៅលក់ឱ្យរោងចក្របោកគក់ និងអ៊ុតខោអាវ អេសអិល នៅទំនប់បឹងទំពន់ រាជធានីភ្នំពេញ ចំណែកថៅកែអុសនេះពួកគេមិនស្គាល់ឈ្មោះច្បាស់ទេ ។
សមត្ថកិច្ចរដ្ឋបាលព្រៃឈើកំពង់ឆ្នាំងបានឱ្យដឹងទៀតថា ឈើដែលគេកាប់លក់ធ្វើជាអុសដុតនេះជាប្រភេទឈើខ្លុងត្បែង ខ្លះតូចៗមិនទាន់គ្រប់អាយុ តែភាគច្រើនជាឈើដើមធំៗខ្លឹមក្រហមឆ្អៅ ដែលគេអាចយកទៅអារច្រៀកធ្វើជាគ្រឿងសង្ហារឹមបាន ។ ឈើទាំង២រថយន្តធំៗនេះ នឹងត្រូវធ្វើការផាកពិន័យជាប្រាក់អន្តរកាលតាមច្បាប់ស្តីពីព្រៃឈើដោយការដឹកជញ្ជូនគ្មានលិខិតអនុញ្ញាតពីរដ្ឋបាល ព្រៃឈើ ។
បទល្មើសព្រៃឈើដូចខាងលើនេះ នៅស្រុកទឹកផុស និងស្រុកបរិបូរណ៌ ត្រូវបានប្រជាពលរដ្ឋនាំគ្នាកាប់ព្រៃឈើតម្រៀបធ្វើជាអុសដាក់លក់តាមចិញ្ចើមផ្លូវតាមភូមិ-ឃុំមួយចំនួនរាប់រយរាប់ពាន់ម៉ែត្រគូបយ៉ាងអាណាធិបតេយ្យ ពុំមានសមត្ថកិច្ចណាបង្ក្រាបឡើយ។ ករណីនេះ ប្រជាពលរដ្ឋស្នើសុំលោកនាយខណ្ឌរដ្ឋបាលព្រៃឈើកំពង់ឆ្នាំង មេត្តាចុះបង្ក្រាប និងទប់ស្កាត់ឱ្យបានដល់មូលដ្ឋានផង ពុំនោះទេកូនខ្លុង កូនត្បែងមិនទាន់គ្រប់អាយុ និងត្រូវគេកាប់បំផ្លាញអស់គ្មានសល់ឡើយ ៕
ចែករំលែកព័តមាននេះ