រាជធានីភ្នំពេញ ៖ រថយន្តម៉ាកឡិចស៊ីស RX 300 ពណ៌សមួយគ្រឿងដែលបើកធ្លាក់ក្នុងប្រឡាយទឹកនោះ ត្រូវបានស្ទូចឡើងផុតពីទឹកនៅវេលាម៉ោង៥ល្ងាចថ្ងៃទី២៣ មីនា ក្រោមក្រសែភ្នែកមនុស្សម្នាចោមរោមតាមដានហេតុការណ៍នេះរាប់សិបនាក់ រួមជាមួយកម្លាំងសមត្ថកិច្ច ។ ការស្ទូចរថយន្តធ្លាក់ទឹកប្រឡាយនេះ ក៏បានរកឃើញសពស្ត្រីអ្នកបើកបរម្នាក់ផងដែរ ។
ទាក់ទិននឹងហេតុការណ៍ខាងលើនេះ ក្រុមគ្រួសារស្ត្រីរងគ្រោះឱ្យដឹងថា នាងនិងរថយន្តបានបាត់ដានតាំងពីយប់ថ្ងៃទី២១ មីនា មកម្ល៉េះ មិនដឹងថា ទៅទីណានោះទេ ហើយក៏បានតាមរករហូតមកដល់ថ្ងៃទី២៣ មីនា ទើបដឹងថានាងបើករថយន្តធ្លាក់ទឹកប្រឡាយដែលមានជម្រៅជ្រៅលិចរថយន្តបាត់ទៅក្នុងបាតប្រឡាយ ។
លោក ឯម ប៊ុនធឿន អាយុ៤៨ឆ្នាំ ត្រូវជាឪពុកស្ត្រីរងគ្រោះ មានប្រសាសន៍ថា កូនស្រីដែលរងគ្រោះនេះឈ្មោះ ឯម ស្រីហ៊ាង អាយុ២៤ឆ្នាំ ជាស្ត្រីមេម៉ាយទាំងវ័យក្មេង បន្ទាប់ពីប្តីរបស់នាងធ្វើកងរាជអាវុធហត្ថបានស្លាប់ដោយគ្រោះថ្នាក់ចរាចរណ៍នៅខេត្តមណ្ឌលគិរីមុននេះជាង១ឆ្នាំ ។ លោកបន្តថា នាងមានស្រុកកំណើតនៅឃុំក្រាំងតាយ៉ង ស្រុកពាមរ ខេត្តព្រៃវែង មានមុខរបរលក់គ្រឿងសម្អាង និងកាហ្វេនៅផ្ទះជួលម្តុំសំណង់១២ ក្នុងសង្កាត់ទឹកល្អក់៣ ខណ្ឌទួលគោក ។
ជុំវិញហេតុការណ៍ដែលបណ្តាលឱ្យមានគ្រោះថ្នាក់បែបនេះកើតឡើង ត្រូវបានប្រភពព័ត៌មានរៀបរាប់ឱ្យដឹងថា កាលពីថ្ងៃទី២១ មីនា នាងនិងក្រុមគ្រួសារបានទៅចូលរួមពិធីជប់លៀងនៅហាងមួយទល់មុខទីបញ្ជាការត្រែទ័ព។ លុះចេញពីកម្មវិធី នាងនិងប្អូនស្រីម្នាក់បានជិះរថយន្តឡិចស៊ីស RX ៣០០ ពណ៌ស របស់នាងចេញមកក្នុងអាការស្រវឹង ។ តាំងពីពេលនោះមក ស្រាប់តែបាត់នាងរហូតមក មិនដឹងថា នាងទៅណានោះទេ ។ តែអ្វីដែលឈានដល់ការស្វែងរកឃើញរថយន្តឡិចស៊ីសក្នុងប្រឡាយទឹក គឺបានទទួលព័ត៌មានពីបងប្អូនស្រីម្នាក់ ដែលជិះរថយន្តមកជាមួយនិយាយថា ពេលនោះស្រីហ៊ាង មានសភាពស្រវឹង បានជិះរថយន្តតាមផ្លូវលេខ២០០១ រួចបត់ចូលផ្លូវលំមួយ ក៏ធ្លាក់ក្រឡុកធ្វើឱ្យនាងបោកក្បាលរបួស ។ ដោយសារមានការភ័យខ្លាច នាងបានសុំចុះពីរថយន្ត ហើយស្រីហ៊ាង ក៏បន្តបើករថយន្តទៅមុខទៀតក្នុងល្បឿនលឿន ។ ការតាមរកនៅចំណុចផ្លូវដែលអ្នកជិះជាមួយសុំចុះ ហើយបានឈរមើលឃើញនាង ឯម ស្រីហ៊ាង បើករថយន្តចេញទៅយ៉ាងលឿន ។
តាមតម្រាយផ្លូវបានបង្ហាញថា ផ្លូវដែលនាងបើករថយន្តចេញទៅ គឺត្រូវតែបត់ឆ្វេង ឬបត់ស្តាំ ព្រោះនៅខាងមុខជាប្រឡាយទឹកពោធិសំពៅក្នុងភូមិសាស្ត្រភូមិសំរោង សង្កាត់ក្រាំងធ្នង់ ខណ្ឌសែនសុខ ។ ដោយសារតែមានមន្ទិលថា នាង ឯម ស្រីហ៊ាង ដែលបើករថយន្តហើយបាត់ខ្លួននោះអាចមានគ្រោះថ្នាក់ដោយប្រការណាមួយ ទើបនៅថ្ងៃទី២៣ មីនា ក៏សម្រេចចិត្តប្តឹងប៉ូលិស។ នៅម៉ោង១១ព្រឹកថ្ងៃដដែល ក្រោយពីទទួលបានបណ្តឹង ប៉ូលិសក៏បានតាមដានរកនៅចំណុចផ្លូវក្បែរប្រឡាយ ក៏ប្រទះឃើញស្នាមដានកង់រថយន្តធ្លាក់ចូលប្រឡាយ។ ក្រោយពីសន្មត់ថា រថយន្តអាចបើកធ្លាក់ទឹកប្រឡាយ ខាងប៉ូលិសក៏បានស្នើឱ្យក្រុមគ្រួសារសុំអន្តរាគមន៍ពីកងឆត្រយោង៩១១ ដើម្បីចុះរាវ។ ក្នុងរយៈពេល១០នាទី ក៏បានរកឃើញរថយន្តដែលលិចក្នុងទឹកប្រឡាយ ទើបហៅរថយន្តស្ទូចមកស្ទូចរថយន្តចេញពីក្នុងទឹក ដែលមានគេឈរមើលកកកុញ ។
ក្រោយពីស្ទូចរថយន្តឡើងមកដាក់លើមាត់ប្រឡាយ ទើបដឹងថា នាង ឯម ស្រីហ៊ាង បានស្លាប់ទៅហើយ ដោយរថយន្តបែកកញ្ចក់មុខដំបូលរថយន្តមានលក្ខណៈក្រពឹតបន្ដិច ឯស្លាកលេខរថយន្តពីមុខរបូតបាត់ ។ ទោះបីជាយ៉ាង ណា លក្ខខណ្ឌទូទៅថា នាងប្រហែលជាស្លាប់ដោយបើករថយន្តក្រឡាប់ធ្លាក់ប្រឡាយក្ដី ក៏មន្ត្រីប៉ូលិសនិយាយថា មិនទាន់អាចនិយាយបានថា ស្លាប់ដោយប្រការណាមួយនោះទេ ។ តាមការត្រួតពិនិត្យឃើញថា រថយន្តដាក់លេខអក្សរ D បង្ហាញថា កំពុងធ្វើដំណើរនិងភ្លើងហ្វានៅបើក ។
សពរបស់នាងត្រូវបានសមត្ថកិច្ចរក្សាទុកនៅវត្តទឹកថ្លា ដើម្បីធ្វើកោសល្យវិច័យ ។ សពរបស់នាងឯម ស្រីហ៊ាង មានធុំក្លិនទៅហើយដោយសារតែស្លាប់តាំងពីថ្ងៃទី២១ មីនា និងទើបតែរកឃើញនៅថ្ងៃទី២៣ មីនា ដែលមិនអាចនាំទៅធ្វើបុណ្យនៅឯស្រុកកំណើតបានទេ និងត្រូវបូជានៅវត្តទឹកថ្លា បន្ទាប់ពីសមត្ថកិច្ចធ្វើកោសល្យវិច័យរួចរាល់ ៕
ចែករំលែកព័តមាននេះ