ខេត្តកណ្តាល ៖ ភ្ញៀវទំនើងម្នាក់ត្រូវបាននគរបាលស្រុកកោះធំឃាត់ខ្លួនក្រោយពីធ្វើសកម្មភាពអុកឡុកក្នុងពិធីឡើងគេហដ្ឋានថ្មីរបស់អ្នកភូមិបង្កចលាចលក្នុងពិធីដោយយកខ្សែក្រវាត់វាយបែកក្បាលសមាជិកក្រុម
ខេត្តកណ្តាល ៖ ភ្ញៀវទំនើងម្នាក់ត្រូវបាននគរបាលស្រុកកោះធំឃាត់ខ្លួនក្រោយពីធ្វើសកម្មភាពអុកឡុកក្នុងពិធីឡើងគេហដ្ឋានថ្មីរបស់អ្នកភូមិបង្កចលាចលក្នុងពិធីដោយយកខ្សែក្រវាត់វាយបែកក្បាលសមាជិកក្រុមតន្ត្រីឱ្យរងរបួសធ្ងន់ម្នាក់ ព្រោះតែខឹងក្រុមតន្ត្រីមិនលេងបទញាក់ឲ្យរាំកាលពីវេលាម៉ោង៩ និង៣០នាទីយប់ ថ្ងៃទី២០ មីនា ស្ថិតក្នុងភូមិព្រែកតាមេម ឃុំព្រែកស្តី ស្រុកកោះធំ ។
លោកវរសេនីយ៍ត្រី មុយ ចាន់ពេជ្រ អធិការនគរបាលស្រុកកោះធំបានឲ្យដឹងថា ជនទំនើងដែលត្រូវបានឃាត់ខ្លួនឈ្មោះ ថៅ ប៊ុនណា ភេទប្រុស អាយុ២៣ឆ្នាំ មុខរបរជាកសិករ មានទីលំនៅក្នុងភូមិព្រែកតាមេម ឃុំព្រែកស្តី ស្រុកកោះធំ ។ ចំណែកជនរងគ្រោះជាសមាជិកវង់តន្ត្រីសម័យមានឈ្មោះ ស្រ៊ា ដែន ភេទប្រុស អាយុ២៣ឆ្នាំ មានទីលំនៅភូមិព្រែកតាមេម ឃុំព្រែកស្តី ស្រុកកោះធំ រងរបួសបែកក្បាលចំនួន២កន្លែងដេរ១០ ថ្នេរ និងកំពុងដេកសម្រាកព្យាបាលរបួសនៅមន្ទីរពេទ្យប្រតិប ស្រុកកោះធំ ។
លោកអធិការបានបន្តថា មុនពេលកើតហេតុនៅផ្ទះរបស់ឈ្មោះប៉េង ថូ ភេទប្រុស អាយុ៤៥ឆ្នាំ មានរៀបចំពីធីឡើងគេហដ្ឋានថ្មី ដោយបានជួលក្រុមតន្ត្រីសម័យទៅច្រៀងកំដរភ្ញៀវក្នុងកម្មវិធី ។ ពីធីឡើងផ្ទះថ្មីនេះដែរក៏មានវត្តមានជនដៃដល់ចូលរួមជាភ្ញៀវកិត្តិយសផងដែរ ។ បន្ទាប់ពីភ្ញៀវពិសាភោជនីអាហារ និងផឹកស្រាស្រវឹងស្រឿងៗ រួចមកក៏មានភ្ញៀវជាច្រើនឡើងរាំលេងកំសាន្តរួមជាមួយជនដៃដល់ផងដែរ ពេលកំពុងរាំ លេងកំសាន្តនោះមានភ្ញៀវជាក្រុមក្មេងស្ទាវរកឈ្លោះប្រកែកគ្នា ដោយសាររាំបទញាក់ជាន់ជើងគ្នាទៅវិញទៅមក ។
លោកអធិការបានបញ្ជាក់ទៀតថា ឃើញសភាពការណ៍មិនសូវស្រួលម្ចាស់កម្មវិធី ក៏បានប្រាប់ទៅកាន់ក្រុមតន្ត្រីសម័យកុំឲ្យលេងភ្លេងច្រៀងបទញាក់បន្តទៀត ព្រោះខ្លាចមានរឿងបង្កចលាចលក្នុងកម្មវិធី ។ នៅគ្រាដែលក្រុមតន្ត្រីសម័យច្រៀងបទរាំវង់បាន២បទជនដៃដល់ក៏បានសំណូមពរឲ្យច្រៀងបទញាក់ តែដោយសារមានការហាមឃាត់ពីម្ចាស់កម្មវិធី ក្រុមតន្ត្រីសម័យមិនបានច្រៀងតាមសំណូមពរនោះទេ ទើបធ្វើឲ្យជនដៃដល់កើតក្តីក្តៅក្រហាយទាញយកខ្សែក្រវាត់ពីចង្កេះវាយប្រហារទៅលើសមាជិកក្រុមតន្ត្រីសម័យម្នាក់ឈ្មោះស្រ៊ា ដែន បណ្តាលឲ្យរងរបួសបែកក្បាលឈាមហូរស្រោចខ្លួន ព្រោះតែខឹងមិនលេងបទញាក់តាមការសុំរបស់ខ្លួន។
ជនសង្ស័យត្រូវបាននគរបាលស្រុកកោះធំចាប់ខ្លួនភ្លាមៗ និងកសាងសំណុំរឿងបញ្ជូនខ្លួនទៅកាន់សាលាដំបូងខេត្តកណ្តាលចាត់ការបន្តតាមច្បាប់ ៕
ចែករំលែកព័តមាននេះ