ខេត្តបាត់ដំបង ៖ យ៉ាងហោចណាស់មនុស្ស៧នាក់បានរងរបួសធ្ងន់ និងស្រាល នៅក្នុងឧប្បតិហេតុគ្រោះថ្នាក់ចរាចរណ៏មួយរវាងរថយន្ត និងរថយន្ត ដែលបានបុកគ្នាកាលពីវេលាម៉ោង៦ល្ងាច ថ្ងៃទី២១ ខែកុម្ភៈ ឆ្នាំ២០១៥
ខេត្តបាត់ដំបង ៖ យ៉ាងហោចណាស់មនុស្ស៧នាក់បានរងរបួសធ្ងន់ និងស្រាល នៅក្នុងឧប្បតិហេតុគ្រោះថ្នាក់ចរាចរណ៏មួយរវាងរថយន្ត និងរថយន្ត ដែលបានបុកគ្នាកាលពីវេលាម៉ោង៦ល្ងាច ថ្ងៃទី២១ ខែកុម្ភៈ ឆ្នាំ២០១៥ នៅលើដងផ្លូវជាតិលេខ៥ ក្នុងភូមិកំពង់ព្រះ ឃុំកំពង់ព្រះ ស្រុកសង្កែ ។
មន្ត្រីនគរបាលចរាចរណ៏ស្រុកសង្កែបានឲ្យដឹងថា ករណីគ្រោះថ្នាក់ចរាចរណ៏ខាងលើនេះបង្កឡើងដោយរថយន្តម៉ាកកាមរី(បាឡែន) ពណ៏ទឹកប្រាក់ ពាក់ស្លាកលេខ បន្ទាយមានជ័យ 2A-5479 បើកបរដោយបុរសឈ្មោះកួយ ថាវីស អាយុ៣០ឆ្នាំ នៅក្រុងប៉ោយប៉ែត បានបើកបុកទាំងកំរោលទៅលើរថយន្តម៉ាកទួរីស ពាក់ស្លាកលេខ ភ្នំពេញ 2V-3800 បើកបរដោយបុរសឈ្មោះវិត ម៉ន អាយុ៣៥ឆ្នាំនៅស្រុកលើកដែក ខេត្តកណ្ដាល ខណៈដែលធ្វើដំណើរច្រាសទិសគ្នា ។ មន្ត្រីដដែលបញ្ជាក់ថា តាមការពិនិត្យស្លាកស្នាមនៅចំណុចកើតហេតុ គឺរថយន្តទាំង២គ្រឿងបានបុកគ្នាត្រង់ចំណុចផ្លូវកោង ដែលរថយន្តម៉ាកកាមរីបានបូងចង្កូតបត់លើផ្លូវកោងជ្រុលទៅបុករថយន្តម៉ាកទួរីស បណ្ដាលឲ្យមនុស្ស៣នាក់រងរបួសធ្ងន់(រាប់ទាំងអ្នកបើកបរទាំង២នាក់) និង៤នាក់ទៀតរបួសស្រាល ។
សាក្សីបាននិយាយថា រថយន្តម៉ាកកាមរីនោះបើកពីទិសខាងកើតឆ្ពោះទៅលិចក្នុងល្បឿនលឿនហូសហេតុ រីឯរថយន្តម៉ាកទួរីស១២កៅអីបើកមកពីទិសខាងលិចទៅកើត ។ សាក្សីបញ្ជាក់ថា ពេលដល់ចំណុចគ្រោះថ្នាក់ គេឃើញរថយន្តកាមរីបានបូងចង្កូតបត់ឆ្វេងលើផ្លូវកោង ស្រាប់តែជ្រុលទៅបុករថយន្តទួរីសពេញទំហឹងតែម្ដង បណ្ដាលឲ្យមនុស្សដែលជិះក្នុងរថយន្តទាំង២គ្រឿងនោះរបួសទាំងអស់គ្នា រីឯរថយន្តក៏ខូចខាតធ្ងន់ធ្ងរដូចគ្នាដែរ ។
សមត្ថកិច្ចជំនាញបានបញ្ជាក់អំពីឧប្បតិហេតុគ្រោះថ្នាក់នេះថា នៅលើគំនូសផ្លូវគេពិនិត្យឃើញស្លាកស្នាមកង់រថយន្តកាមរីបានឆ្លងបំពានគំនូសលឿងទៅបុករថយន្តទួរីស ដោយសារតែការបើកល្បឿនលើសកំណត់ ជាហេតុធ្វើឲ្យអ្នកបើកបរមិនអាចគ្រប់គ្រងបាននៅពេលដល់ផ្លូវកោងទើបបូងចង្កូតជ្រុលបង្កគ្រោះថ្នាក់បែបនេះ ។ នេះជាកំហុសដែលបណ្ដាលមកពីការបើកបរមិនគោរពច្បាប់ចរាចរណ៏៕
ចែករំលែកព័តមាននេះ