ប្រធានាធិបតីគុយបាលោករ៉ាអ៊ុលកាស្ត្រូ កាលពីថ្ងៃទី២៨ មករាទាមទារឱ្យសហរដ្ឋអាមេរិកបញ្ចប់ការហ៊ុមព័ទ្ធប្រឆាំងគុយបាដើម្បីធ្វើឱ្យមានប្រក្រតីភាពឡើងវិញនៃទំនាក់ទំនងរវាងប្រទេសទាំង២
ប្រធានាធិបតីគុយបាលោករ៉ាអ៊ុលកាស្ត្រូ កាលពីថ្ងៃទី២៨ មករាទាមទារឱ្យសហរដ្ឋអាមេរិកបញ្ចប់ការហ៊ុមព័ទ្ធប្រឆាំងគុយបាដើម្បីធ្វើឱ្យមានប្រក្រតីភាពឡើងវិញនៃទំនាក់ទំនងរវាងប្រទេសទាំង២ តែទទួលស្គាល់ថាផ្លូវទៅដល់គោលដៅនឹងនៅវែងឆ្ងាយហើយលំបាក ។
ក្នុងសុន្ទរកថាមួយថ្លែងនាកិច្ចប្រជុំកំពូលរបស់សហគមន៍ បណ្តារដ្ឋអាមេរិក-ឡាទីន និងការ៉ាអុីបនៅប្រទេសកូស្តារ៉ាកា លោករ៉ាអ៊ុលថ្លែងថា ការបង្កើតទំនាក់ទំនងការទូតគឺជាការចាប់ផ្តើមដំណើរការមួយឆ្ពោះទៅរកការធ្វើឱ្យមានប្រក្រតីភាពឡើងវិញនៃទំនាក់ទំនងទ្វេភាគី ក៏ប៉ុន្តែរឿងបែបនេះនឹងមិនអាចទៅរួចឡើយ បើដរាបណានៅមានការហ៊ុមព័ទ្ធ ។
យោងតាមលោករ៉ាអ៊ុលកាស្ត្រូថា ការធ្វើឱ្យមានប្រក្រតីភាពឡើងវិញនេះ នឹងពុំអាចមានឡើយ បើដរាបណាពុំមានការប្រគល់ដែនដីកាន់កាប់ខុសច្បាប់ ដោយមូលដ្ឋាននាវាចរណ៍ហ្គង់តាណាម៉ូ ឱ្យគុយបាវិញ រួចនឹងពុំមានការប៉ះប៉ូវសមស្របសម្រាប់ប្រជាជនយើងចំពោះការបាត់បង់មនុស្សនិងសេដ្ឋកិច្ចដែលយើងទទួលរងទេនោះ ។ លោកបន្តថា ប្រសិនបើបញ្ហាទាំងនោះពុំត្រូវបានដោះស្រាយ ការខិតចូលជិតគ្នាខាងការទូតរវាងគុយបានិងសហរដ្ឋអាមេរិកក៏នឹងគ្មានន័យអីដែរ ព្រោះបញ្ហាសំខាន់នៅពុំទាន់ដោះស្រាយ។ ការហ៊ុមព័ទ្ធសេដ្ឋកិច្ច ពាណិជ្ជកម្ម និងហិរញ្ញវត្ថុដែលបង្កការខូចខាតទាំងមនុស្សនិងសេដ្ឋកិច្ច ហើយដែលជាការរំលោភបំពានច្បាប់អន្តរជាតិត្រូវតែបញ្ចប់ ។
លោករ៉ាអ៊ុលកាស្ត្រូ ទើបថ្លែងជាលើកដំបូងចាប់តាំងពីមានការចរចាជាប្រវត្តិសាស្ត្ររវាងប្រទេសទាំង២ កាលពីសប្តាហ៍មុននៅទីក្រុងឡាហាវ៉ានជុំវិញបញ្ហាអន្តោប្រវេសន៍និងការបើកស្ថានទូតឡើងវិញ ៕
ចែករំលែកព័តមាននេះ