រាជធានីភ្នំពេញ ៖ នារីម្នាក់ចេញពីកម្មវិធីខួបកំណើតបងប្អូនជិះម៉ូតូត្រឡប់ទៅផ្ទះវិញបានជួបនឹងគ្រោះថ្នាក់ចរាចរណ៍ ដោយបើកម៉ូតូទៅបុកខឿនសួនច្បារកណ្តាលទ្រូងផ្លូវដោយខ្លួនឯង
រាជធានីភ្នំពេញ ៖ នារីម្នាក់ចេញពីកម្មវិធីខួបកំណើតបងប្អូនជិះម៉ូតូត្រឡប់ទៅផ្ទះវិញបានជួបនឹងគ្រោះថ្នាក់ចរាចរណ៍ ដោយបើកម៉ូតូទៅបុកខឿនសួនច្បារកណ្តាលទ្រូងផ្លូវដោយខ្លួនឯង បណ្តាលឱ្យនារីរូបនោះធ្លាក់ពីលើម៉ូតូបោកក្បាលទៅនឹងខឿនសួនច្បារធ្លាយខួរស្លាប់នៅនឹងកន្លែងកើតហេតុយ៉ាងអាណោចអាធ័ម ។ ហេតុការណ៍នេះ កើតឡើងកាលពីវេលាម៉ោង១១និង១០នាទីយប់ ថ្ងៃទី២៧ មករា ២០១៥ នៅចំណុចផ្លូវភ្លោះទល់មុខឃ្លាំងស្រា តាមបណ្តោយផ្លូវជាតិលេខ៥ ស្ថិតក្នុងភូមិស្ពានខ្ពស់ សង្កាត់ច្រាំងចំរេះ ។
នារីរងគ្រោះមានឈ្មោះប៉ាត់ សាមឈុន អាយុ២៤ឆ្នាំ រស់នៅក្នុងផ្ទះលេខ១៦៩២ ក្រុម៩ ភូមិខ១ សង្កាត់ច្រាំងចំរេះ២ ខណ្ឌឬស្សីកែវ ។
ប្រភពព័ត៌មានពីម្តាយនារីរងគ្រោះបានប្រាប់អ្នកយកព័ត៌មានឱ្យដឹងថា នៅមុនពេលកើតហេតុកូនស្រីរបស់គាត់បានសុំទៅចូលរួមខួបកំណើតបងប្អូននៅម្តុំអូរឡាំពិក ប៉ុន្តែគាត់មិនឱ្យទៅទេ តែកូនរបស់គាត់នៅតែទៅដដែល ។ ហើយពេលដែលទៅដល់កន្លែងខួបកំណើត គាត់បានទូរស័ព្ទសួរកូនស្រីរបស់គាត់ថា មកគេងនៅផ្ទះអត់ ហើយកូនស្រីគាត់ឆ្លើយថា អត់មកគេងនៅផ្ទះទេ គឺគេងនៅផ្ទះបងប្អូននៅម្តុំអូរឡាំពិក រួចគាត់ក៏និយាយថា បើគេងនៅទីនោះក៏គេងទៅ ។ មិនដឹងជាកូនស្រីរបស់គិតយ៉ាងម៉េចបានជាជិះម៉ូតូមកគេងនៅផ្ទះវិញ ដោយមិនបានប្រាប់គាត់បន្តិច ពេលដែលជួបគ្រោះថ្នាក់ចរចរណ៍ ទើបមានការភ្ញាក់ផ្អើលតែម្តង ។ នៅនឹងកន្លែងកើតហេតុមានបុរសពីរនាក់ បាននិយាយប្រាប់សមត្ថកិច្ចថា នៅមុនពេលកើតហេតុ ខណៈពួកគេជិះម៉ូតូចេញពីម្តុំស្ពានជ្រោយចង្វា ស្រាប់តែត្រូវបាននារីរងគ្រោះជិះម៉ូតូមកវ៉ាម៉ូតូរបស់ពួកគេ ដោយស្ថានភាពជិះរេពេញផ្លូវ ហើយពួកគេក៏ជិះម៉ូតូដេញតាម ពេលនោះនារីរងគ្រោះបានជិះម៉ូតូលឿនទៅៗ មកដល់ចំណុចកើតហេតុនារីរងគ្រោះក៏បានបើកម៉ូតូទៅបុកខឿនសួនច្បារកណ្តាលទ្រូងផ្លូវដោយខ្លួនឯង បណ្តាលឱ្យនារីរូបនោះ ធ្លាក់ពីលើម៉ូតូបោកក្បាលទៅនឹងខឿនសួនច្បារធ្លាយខួរស្លាប់នៅនឹងកន្លែងកើតហេតុយ៉ាងអាណោចអាធ័ម ។ គេមិនដឹងថា តើនារីរងគ្រោះស្រវឹង ឬយ៉ាងណាទេ តែមហាជនបាននាំគ្នានិយាយថា ប្រហែលជានារីរងគ្រោះភ័យដោយសារមានបុរសពីរនាក់ជិះម៉ូតូដេញតាម ទើបបើកម៉ូតូទៅជួបគ្រោះថ្នាក់ចរាចរណ៍យ៉ាងដូច្នេះ ។
ក្រោយពេលកើតហេតុសមត្ថកិច្ចបានចុះមកវាស់វែង និងបានទាក់ទងក្រុមគ្រួសារមកទទួលយកសពនារីរងគ្រោះយកទៅធ្វើបុណ្យតាមប្រពៃណី ។
ចែករំលែកព័តមាននេះ