រាជធានីភ្នំពេញ ៖ តំណាងរាស្រ្តមណ្ឌលកំពង់ស្ពឺមកពីគណបក្សសង្គ្រោះជាតិ លោក ប៉ែន សុវណ្ណ បានមានប្រសាសន៍ថា ស្ថានទូតអាមេរិកប្រចំាកម្ពុជាបានយល់ព្រមអនុញ្ញាតឲ្យលោកអាចចេញចូលទៅកាន់ទឹកដីសហរដ្ឋអាមេរិកវិញហើយ ។
ការលើកឡើងរបស់អតីតនាយករដ្ឋមន្រ្តីកម្ពុជារូបនេះ បានធ្វើឡើងបន្ទាប់សហរដ្ឋអាមេរិកបានដាក់បញ្ចូលឈ្មោះលោកក្នុងបញ្ជីខ្មៅពាក់ព័ន្ឋនឹងការជួញដូរមនុស្សនិងត្រូវបានប្រព័ន្ឋផ្សព្វផ្សាយនានាចេញផ្សាយកាលពីថ្ងៃទី១២ មករាម្សិលមិញនេះ ។
បើតាមលោក ប៉ែន សុវណ្ណ កាលពីពេលថ្មីៗនេះ លោកពិតជាបាននំាមនុស្សម្នាក់ឈ្មោះ ទុយ វណ្ណា អាយុ៤០ឆ្នាំទៅព្យាបាលជំងឺរលាកតម្រងនោមនៅសហរដ្ឋអាមេរិកមែន ប៉ុន្តែឈ្មោះ ទុយ វណ្ណានេះ មិនបានរត់គេចដើម្បីបានរស់នៅក្នុងទឹកដីសហរដ្ឋអាមេរិកនោះទេ ហើយក៍បានវិលត្រឡប់មកកម្ពុជាវិញកាលពីពីរថ្ងៃមុន ។
ថ្លែងតាមទូរស័ព្ទប្រាប់កោះសន្តិភាពនៅរសៀលថ្ងៃទី១៣ មករា ២០១៥ លោកតំណាងរាស្រ្តមកពីបក្សប្រឆាំងបានពន្យល់ទៀតថា ការយល់ព្រមរបស់ស្ថានទូតអាមេរិកនាពេលនេះ គឺបន្ទាប់ពីលោកបាននំាឈ្មោះ ទុយ វណ្ណា និងយកទៅជាមួយនូវសំបុត្រពេទ្យ និងលិខិតឆ្លងដែនទៅកាន់ស្ថានទូតអាមេរិកកាលពីថ្ងៃទី១២ មករាម្សិលមិញ និងខាងស្ថានទូតបានពិនិត្យត្រឹមត្រូវអស់ហើយមិនមានបញ្ហានោះទេ ។
យ៉ាងណាក៍ដោយនៅរសៀលថ្ងៃអង្គារនេះ មន្រ្តីស្ថានទូតអាមេរិកសុំមិនធ្វើអត្ថាធិប្បាយនោះទេ ៕
ចែករំលែកព័តមាននេះ