រាជធានីភ្នំពេញ ៖ ហេតុការណ៍ភ្ញាក់ផ្អើលមួយរវាងព្រះសង្ឃពីរអង្គគង់នៅវត្តសាមគ្គីរង្សី ដែលមានទីតាំងនៅក្នុងសង្កាត់ស្ទឹងមានជ័យ ខណ្ឌមានជ័យ បានឈ្លោះទាស់ទែងវាយតប់គ្នាឈានដល់ការកា.ប់ចាក់
រាជធានីភ្នំពេញ ៖ ហេតុការណ៍ភ្ញាក់ផ្អើលមួយរវាងព្រះសង្ឃពីរអង្គគង់នៅវត្តសាមគ្គីរង្សី ដែលមានទីតាំងនៅក្នុងសង្កាត់ស្ទឹងមានជ័យ ខណ្ឌមានជ័យ បានឈ្លោះទាស់ទែងវាយតប់គ្នាឈានដល់ការកាប់ចាក់ដោយប្រើកាបិតចិតផ្លែឈើជាអាវុធធ្វើឲ្យព្រះគ្រូសូត្រឆ្វេងមួយអង្គសុគត ។
ករណីព្រះសង្ឃវាយតប់គ្នានេះបង្កឡើងតាំងពីវេលាម៉ោងជាង៨ព្រឹក ថ្ងៃទី១២ មករា ២០១៥។
សមត្ថកិច្ចបានឱ្យដឹងថា សង្ឃដែលរងរបួសរហូតសុគតជាព្រះគ្រូសូត្រឆ្វេងមានព្រះនាម ថាច់ ខាន់ ព្រជន្ម៣៧ព្រះវស្សា និមន្តមកពីខេត្តឃ្លាំង កម្ពុជាក្រោម តាំងពីឆ្នាំ២០០៦មកម្ល៉េះ ។ ដោយឡែកព្រះសង្ឃដៃដល់ មានព្រះនាម ចាន់ សុភ័ក្ត្រ ហៅទឹង ព្រះជន្ម១៨វស្សា ។
យោងតាមសម្តីរបស់សង្ឃបង្កឈ្មោះ ចាន់ សុភ័ក្ត្រ ហៅទឹង បានឱ្យដឹងថា ខ្លួនទើបមកស្នាក់នៅក្នុងវត្តសាមគ្គីរង្សីបានជិតមួយឆ្នាំទេ ហើយព្រះគ្រូសូត្រឆ្វេង ឈ្មោះ ថាច់ ខាន បានចោទប្រកាន់ថា ខ្លួនបង្កើតបក្សពួកដើម្បីចង់បង្កទំនាស់ជាមួយលោក ។ ដូច្នេះព្រះគ្រូសូត្រឆ្វេង តែងតែហៅរូបខ្លួនចូលទៅក្នុងកុដិ រួចវាយទាត់ធាត់ស្ទើររាល់ថ្ងៃ ។
សង្ឃដៃដល់បន្តថា រហូតមកដល់ព្រឹកថ្ងៃទី១១ មករា ២០១៥ ព្រះគ្រូសូត្រឆ្វេង បានបបួលរូបគេវាយគ្នា ព្រមទាំងហៅខ្លួនឱ្យមកជួបនៅក្នុងកុដិថែមទៀតផង ។ ខណៈកំពុងជួបជជែកគ្នាក្នុងកុដិតែពីរនាក់ គ្រូសូត្រឆ្វេង ឈ្មោះ ថាច់ ខាន បានវាយ និងទាត់ធាក់លើរូបគេរហូតទ្រាំនឹងការឈឺចាប់មិនបាន ក៏បានយកកូនកាំបិតចុងស្រួចដែលដាក់ជាប់ខ្លួនចាក់ទៅលើគ្រូសូត្រឆ្វេងចំកញ្ចឹង.កខាងស្តាំបណ្តាលឱ្យដួលសន្លប់ស្តូកស្តឹងក្នុងថ្លុកឈាម ។
គួរបញ្ជាក់ថា ក្រោយមានការភ្ញាក់ផ្អើលនេះ ព្រះសង្ឃដែលគង់នៅក្នុងវត្តសាមគ្គី រង្សី បាននាំគ្នាដឹកយកគ្រូសូត្រឆ្វេងដែលរងរបួសដោយសារទំនាស់ទៅសង្គ្រោះនៅមន្ទីរពេទ្យ ប៉ុន្តែអកុសលពេលបញ្ជូនដល់មន្ទីរពេទ្យព្រះអង្គក៏សុគតតែម្តងទៅ។
សមត្ថកិច្ចមូលដ្ឋានបានបញ្ជាក់ថា ព្រះសង្ឃដៃដល់ក្រោយបង្ករបួសទៅលើព្រះគ្រូសូត្រឆ្វេងរហូតសុគតនោះ ក៏ព្យាយមរត់គេចដែរ ប៉ុន្តែត្រូបានកម្លាំងសមត្ថកិច្ចឃាត់ខ្លួនបានភ្លាមៗ រួចហើយបញ្ជូនទៅផ្សឹកនៅសាលាខណ្ឌមានជ័យទើបប្រគល់ឱ្យសមត្ថកិច្ចសាកសួរ និងធ្វើទៅតាមជំនាញ រង់ចាំកសាងសំណុំរឿងបញ្ជូនទៅសាលាដំបូងរាជធានីភ្នំពេញផ្តន្ទាទោសតាមនីតិវិធីច្បាប់ ៕
ចែករំលែកព័តមាននេះ