រាជធានីភ្នំពេញ ៖ សាលាការ៉ាតេដូកម្ពុជា បានអញ្ជើញលោក SHI BUYA TAKASHI អនុប្រធានសហព័ន្ធកីឡាការ៉ាតេដូជបុ៉ន និងជាគ្រូធំដែលមានកម្រិតខ្សែក្រវាត់ខ្មៅ៩ដាន់នៅប្រទេសជបុ៉ន មកបង្ហាត់បង្ហាញដល់កីឡាករ-កីឡាការិនីក្នុងប្រទេសកម្ពុជា ដែលកំពុងត្រៀមខ្លួនចូលរួមប្រកួតព្រឹត្តិការណ៍អន្តរជាតិនានា ។
ពេលមកដល់ប្រទេសកម្ពុជាកាលពីល្ងាចថ្ងៃទី១៧ ធ្នូ នៅអាកាសយានដ្ឋានអន្តរជាតិភ្នំពេញ លោក SHI BUYA TAKASHI បានមានប្រសាសន៍ថា នេះជាលើកទី៨ ដែលរូបលោកបានមកប្រទេសកម្ពុជា ដើម្បីបង្ហាត់បង្រៀនដល់កីឡាករ-កីឡារិនីក្មេងៗឱ្យពួកគេកាន់តែយល់ច្បាស់អំពីក្បាច់គុនការ៉ាតេដូ ។ លោកបន្តថា ដោយឃើញជនកម្ពុជាទាំងក្មេងទាំងចាស់មានការពេញនិយម និងចូលចិត្តវិស័យកីឡាការ៉ាតេដូនេះ ដោយអ្នកខ្លះហាត់រៀនដើម្បីសុខភាព និងអ្នកខ្លះដើម្បីការពារខ្លួន ទើបលោកមកបង្រៀនដល់ទីនេះដើម្បីឱ្យការហាត់រៀនរបស់ពួកគេមានកម្រិតទទួលបានការទទួលស្គាល់ផងដែរ។ ជាពិសេស កីឡាអូឡាំពិកហ្គេមកាន់តែខិតជិតមកដល់ផង លោកក៏សម្រេចចិត្តមកបង្ហាត់ដល់អត្តពលិកក្នុងប្រទេសកម្ពុជា ឱ្យពួកគេកាន់តែមានសមត្ថភាពដើម្បីចេញទៅប្រកួតលើឆាកអន្តរជាតិទទួលបាននូវលទ្ធផលល្អ ។
គួរបញ្ជាក់ផងដែរថា វិស័យកីឡាការ៉ាតេដូក្នុងប្រទេសកម្ពុជា កំពុងក្លាយជាកីឡាដ៏មានប្រជាប្រិយភាពមួយបែបដែលប្រជាជនខ្មែរមិនថា មន្ត្រីរាជការ សិស្សសាលា តែងតែមកហាត់ក្បាច់គុននេះ ដោយពួកគាត់គិតពីសុខភាពជាចម្បង ។ ជាក់ស្តែង មិនថាតែក្នុងក្លិបទេ គឺមានគ្រប់ទីកន្លែង គ្រប់តំបន់នៃប្រទេសកម្ពុជា ក៏មានអ្នកហាត់រៀនក្បាច់គុននេះយ៉ាងច្រើនកុះករដែរ ។ ជាការពិតកាលពីពេលថ្មីៗកន្លងទៅនេះ មន្ត្រីជាន់ខ្ពស់ក្នុងជួររាជរដ្ឋាភិបាលដែលមានលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម លោករដ្ឋមន្ត្រីក្រសួងអប់រំ យុវជន និងកីឡា ហង់ ជួនណារុ៉ន និងមន្ត្រីមួយចំនួនទៀតត្រូវបានបំពាក់ខ្សែក្រវាត់ខ្មៅចំនួន៥ដាន់ និង២ដាន់ផងដែរ ។
លោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ប្រធានសាលាការ៉ាតេដូកម្ពុជា ធ្លាប់បានបញ្ជាក់ថា វិស័យកីឡា គឺមានសារសំខាន់ណាស់សម្រាប់ធនធានមនុស្សដោយមិនមែនត្រឹមតែជាតិបុ៉ណ្ណោះទេ ជាពិសេសគឺបានចូលទៅក្នុងក្របខ័ណ្ឌអន្តរជាតិថែមទៀត ។ តទៅមុខទៀត វិស័យនេះនឹងក្លាយជាផ្នែកមួយក្នុងការផ្លាស់ប្តូរវប្បធម៌រវាងជាតិមួយទៅជាតិមួយ និងលើកស្ទួយកិត្យានុភាពរបស់ប្រទេសជាតិផងដែរ ៕
ចែករំលែកព័តមាននេះ