ខេត្តឧត្តរមានជ័យ ៖ ស្ត្រីក្មេងចាស់៤នាក់ត្រូវបានកងរាជអាវុធហត្ថស្រុកត្រពាំងប្រាសាទ ឃាត់ខ្លួនដោយជាប់ចោទពីបទជួញដូរ និងចែកចាយគ្រឿងញៀ.ន ។ ការឃាត់ខ្លួននេះ ធ្វើឡើងកាលពីល្ងាចថ្ងៃទី១៦ ធ្នូ ក្នុងភូមិសែនសុខ ឃុំទំនប់ដាច់
ខេត្តឧត្តរមានជ័យ ៖ ស្ត្រីក្មេងចាស់៤នាក់ត្រូវបានកងរាជអាវុធហត្ថស្រុកត្រពាំងប្រាសាទ ឃាត់ខ្លួនដោយជាប់ចោទពីបទជួញដូរ និងចែកចាយគ្រឿងញៀន ។ ការឃាត់ខ្លួននេះ ធ្វើឡើងកាលពីល្ងាចថ្ងៃទី១៦ ធ្នូ ក្នុងភូមិសែនសុខ ឃុំទំនប់ដាច់ ស្រុកត្រពាំងប្រាសាទ ។ លោកវរសេនីយ៍ត្រី លី ដារឹទ្ធ មេបញ្ជាការកងរាជអាវុធហត្ថស្រុកត្រពាំងប្រាសាទ បានឱ្យដឹងថា មុននឹងឈានដល់ការបង្ក្រាបករណីជួញដូរគ្រឿងញៀន និងឃាត់ខ្លួនស្ត្រីទាំង៤នាក់នេះ សមត្ថកិច្ចបានចំណាយពេលសុើបអង្កេតរហូតដល់២ខែ ។
លោកមេបញ្ជាការបន្តទៀតថា ថ្នាំញៀនទាំងនេះ ពួកគេទើបតែយកចូលប្រហែលមួយអាទិត្យប៉ុណ្ណោះ ដោយទទួលបានព័ត៌មាននេះ លោកក៏ដាក់កម្លាំងសម្ងាត់់ចាំឃ្លាំមើលគ្រប់សកម្មភាព ក្រោយពីដឹងថាជនសង្ស័យកំពុងធ្វើសកម្មភាពចែកចាយ លោកក៏សុំយោបល់ទៅមេបញ្ជាការកងរាជអាវុធហត្ថខេត្ត លោកឧត្តមសេនីយ៍ត្រី ពុទ្ធ សារ៉ាន់ និងសុំយោបល់លោក កូយ កាន់យ៉ា ព្រះរាជអជ្ញាអមសាលាដំបូងខេត្ត សហការជាមួយការិយាល័យគ្រឿងញៀននៃកងរាជអាវុធហត្ថខេត្ត រួមជាមួយអាជ្ញាធរដែនដី បានចុះទៅដល់ទីលំនៅជនសង្ស័យ ហើយបានឃាត់ខ្លួន និងឆែកឆេរផ្ទះចំនួន២កន្លែង ដោយរកឃើញថ្នាំញៀនប្រភេទម៉ាទឹកកកចំនួន១២៥កញ្ចប់ ដាវសាមូរ៉ៃ២ ពូថៅ១ កាំភ្លើងកែច្នៃ១ដើម គ្រាប់បែកដៃ១គ្រាប់ និងឧបករណ៍ជក់ថ្នាំមួយចំនួនទៀត យកមករក្សាទុកនៅទីបញ្ជាការកងរាជអាវុធហត្ថស្រុក ។
ស្ត្រីទាំង៤នាក់មាន ១-ឈ្មោះ ឡេង នួន អាយុ៣៥ឆ្នាំ ២-ឈ្មោះ ថោង មុំ អាយុ៣៥ឆ្នាំ ៣-ឈ្មោះ ផាត់ គន្ធា អាយុ២០ឆ្នាំ និង៤-ឈ្មោះ ប៊ុន រីម អាយុ៣៤ឆ្នាំ ពួកគេរស់នៅភូមិឃុំជាមួយគ្នា ។ ក្រោយពីសួរនាំរួច ត្រូវបានបញ្ជូនខ្លួន និងវត្ថុតាងទៅកាន់ទីបញ្ជាការកងរាជអាវុធហត្ថខេត្ត ដើម្បីចាត់ការបន្តទៅតាមច្បាប់ ។ ក្នុងពេលកំពុងអនុវត្តច្បាប់នោះ សមត្ថកិច្ចកងរាជអាវុធហត្ថស្រុក ក៏បានបញ្ជូនខ្លួនជន២នាក់ផ្សេងទៀតទៅជាមួយផងដែរ ព្រោះជាប់ពាក់ព័ន្ធនឹងការគំរាមកំហែងទារប្រាក់ពីស្ត្រីទាំង៤នាក់នេះ ជាថ្នូរនឹងការបិទសំណុំរឿងជួញដូរ ចែកចាយថ្នាំញៀន រហូតអ្នកខ្លះគ្មានលុយឱ្យ ក៏យកប្លង់ផ្ទះទៅបញ្ចាំធនាគារ យកលុយឱ្យពួកគេទៀតផង ផ្ទុយទៅវិញ នៅតែត្រូវចាប់ខ្លួនដដែល ។ គេមិនទាន់ដឹងថា វាសនារបស់ជនទាំង២នាក់នោះយ៉ាងណាទេ បុ៉ន្តែស្ត្រីទាំង៤នាក់និយាយថា បើពួកគាត់មានបញ្ហា ជននោះក៏មិនរួចខ្លួនដែរ ។ អ្នកភូមិបានសម្តែងការសាទរចំពោះការបញ្ចេញសាច់ដុំរបស់កងរាជអាវុធហត្ថ ដែលបានបំបែកសម្បុកគ្រឿងញៀននេះ ធ្វើឱ្យពួកគាត់អស់ការបារម្ភពីរឿងកូនចៅ ។
ទោះជាបែបណា ភាពអាណោចអាធ័មសម្រាប់ស្ត្រីជាប់ចោទ៣នាក់ក្នុងចំណោមពួកគេទាំង៤នាក់ សុទ្ធតែមានកូនតូចកំពុងនៅបៅដោះ ដោយបានកណ្តៀតកូនទាំងដៃជាប់ខ្នោះ ។ ទិដ្ឋភាពនេះបង្ហាញថា ទោះបីអ្នកម្តាយមានមុខរបររកស៊ីខុសច្បាប់ ក៏ព្រោះតែដើម្បីចិញ្ចឹមជីវិតកូនតូចៗក្នុងគ្រួសាររបស់ខ្លួនដែរ ហើយបើត្រូវបានច្បាប់កាត់ទោសឱ្យជាប់ពន្ធនាគារនោះ វាសនាក្មេងតូចៗទាំង៣នាក់ ដែលទើបតែមានអាយុ១ខួប ទៅ២ខួបទាំងនោះ នឹងត្រូវជាប់គុកជាមួយម្តាយរបស់គេ ពិតជាគួរឱ្យអាសូរជាពន់ពេក សម្រាប់អ្នកដែលបានឃើញហេតុការណ៍ផ្ទាល់ភ្នែក ៕
ចែករំលែកព័តមាននេះ