រាជធានីភ្នំពេញ ៖ នៅវេលាព្រឹកស្អែក មិនមានការប្រកួតប្រដាល់អន្តរជាតិក្នុងព្រឹត្តិការណ៍ Ganzburge Top Fighters នៅស្ថានីយទូរទស្សន៍អាស៊ីអាគ្នេយ៍ (SEA TV) ដូចការគ្រោងទុកនោះទេ ដោយសារការផ្លាស់ប្ដូរនេះ ទើបតែបានបញ្ជាក់ជាបន្ទាន់កាលពីម្សិលមិញប៉ុណ្ណោះ ។ នេះក៏ដោយសារតែ
រាជធានីភ្នំពេញ ៖ នៅវេលាព្រឹកស្អែក មិនមានការប្រកួតប្រដាល់អន្តរជាតិក្នុងព្រឹត្តិការណ៍ Ganzburge Top Fighters នៅស្ថានីយទូរទស្សន៍អាស៊ីអាគ្នេយ៍ (SEA TV) ដូចការគ្រោងទុកនោះទេ ដោយសារការផ្លាស់ប្ដូរនេះ ទើបតែបានបញ្ជាក់ជាបន្ទាន់កាលពីម្សិលមិញប៉ុណ្ណោះ ។ នេះក៏ដោយសារតែមានការទាមទារភ្លាមៗដោយមិនមានគម្រោងទុកមុនពីម្ចាស់ឧបត្ថម្ភកម្មវិធី ។
លោកញាន សុធី មន្ត្រីអ្នករៀបចំការប្រកួតបានមានប្រសាសន៍ថា ការប្រកួតដែលគ្រោងតម្រូវឱ្យកីឡាករកម្ពុជា៣រូប និងថៃ៣រូបប៉ះគ្នានៅព្រឹកថ្ងៃទី៣០ វិច្ឆិកាស្អែកនោះ មិនអាចធ្វើឡើងបានទេ ដោយសារតែភាគីជាអ្នកពាក់ព័ន្ធស្នើសុំលើកពេល ។ ហេតុផលនោះ គឺបណ្ដាលមកពីម្ចាស់ឧបត្ថម្ភកម្មវិធីស្នើឱ្យលើកការប្រកួតអន្តរជាតិទៅដាក់នៅថ្ងៃអាទិត្យទី៧ ធ្នូវិញ ដើម្បីឱ្យព្រឹត្តិការណ៍ដដែលនេះ ទៅកក្រើកនៅថ្ងៃនោះវិញ ។ ការផ្លាស់ប្ដូរមិនមានការជូនដំណឹងពីចម្ងាយឡើយ ដោយសារតែមានការសម្រេចយ៉ាងតក់ក្រហល់ពីសំណាក់អ្នកឧបត្ថម្ភកម្មវិធីជាដៃគូ ។ លោកនិយាយថា នៅថ្ងៃទី៧ ធ្នូអាទិត្យក្រោយ យើងមានកម្មវិធីពិសេស ទើបម្ចាស់ឧបត្ថម្ភកម្មវិធីគាត់សុំប្ដូរឱ្យការប្រកួតអន្តរជាតិទៅធ្វើនៅថ្ងៃនោះវិញ ហើយការសម្រេចនេះ ទើបតែឯកភាពគ្នាប៉ុណ្ណោះនៅចុងសប្ដាហ៍នេះ!។ យោងតាមភាពជាក់ស្ដែង ការប្រកួតអន្តរជាតិ នឹងត្រូវធ្វើឡើងឆ្លាស់គ្នាជាមួយនឹងការប្រកួតក្នុងស្រុក ដោយនៅថ្ងៃទី៣០ វិច្ឆិកាស្អែក នឹងត្រូវធ្វើការប្រកួតរវាងកីឡាករបរទេស និងកីឡាករក្នុងស្រុក ។ ការផ្លាស់ប្ដូរនេះ ត្រូវគេអះអាងថា ក្រុមហ៊ុនមានកម្មវិធីចែករង្វាន់ដល់អតិថិជន ទើបរំកិលការប្រកួតអន្តរជាតិទៅសប្ដាហ៍ក្រោយវិញ ។ ជំនួសឱ្យការប្រែប្រួលនេះ នឹងមានការប្រកួតរបស់កីឡាករជើងខ្លាំងក្នុងស្រុកវិញ ។ លោកនិយាយថា ក្រោយការសម្រេចចិត្តលើកពេលយ៉ាងតក់ក្រហល់ ទូរទស្សន៍អាស៊ីអាគ្នេយ៍បានរៀបរយកីឡាករកម្ពុជាផ្សេងទៀតឱ្យមកបង្ហាញខ្លួនជាជំនួស ។ កីឡាករដែលត្រូវប្រកួតជំនួសនោះរួមមាន ជើងខ្លាំង ឈិត ង៉ុយ មកពីសមាគមកីឡាប្រដាល់ក្រសួងការពារជាតិ ប៉ះជាមួយកីឡាករហ៊ុល តារា មកពីក្លិបសាលវ័ន្តកីឡា និងកីឡាករម៉ន គឹមសុង មកពីក្លិបការិយាល័យទី៥ កងទ័ពជើងគោក ប៉ះជាមួយកីឡាករវង្ស គង់រាជ ដែលការប្រកួតលើកនេះ លោកបានប្រើឈ្មោះពិតថា ផន ផល្លា មកពីក្លិបតាព្រហ្មមានជ័យបង្ក្រាបគ្រឿងញៀន។ កីឡាករទាំង៤រូបនេះ ដ្បិតថាមិនទទួលបានការចាប់អារម្មណ៍ដូចវត្តមានការប្រដាល់អន្តរជាតិ ប៉ុន្តែមានការអះអាងថា ការប្រកួតនឹងល្អមើលមិនចាញ់គ្នា ។ លោកញាន សុធី និយាយថា កីឡាករដែលត្រូវប្រកួតស្អែក ត្រូវលើកទៅប្រកួតអន្តរជាតិនៅសប្ដាហ៍ក្រោយទាំងអស់ ហើយយើងក៏សុំទោសអ្នកគាំទ្រផងដែរ ដែលមានបញ្ហាប្រែប្រួលបែបនេះ ។
បើគ្មានការប្រែប្រួល កីឡាករកម្ពុជា៣រូប រួមមាន ឯម ខ្លឹមខ្មៅ មកពីក្លិបឫទ្ធិពោធិសែនជ័យ នឹងត្រូវជួបប្រកួតជាមួយកីឡាករថៃក្នុងប្រភេទទម្ងន់៦៨គីឡូក្រាម ។ កីឡាករឈិន ក្វាន់ង៉ុយ មកពីក្លិបមកុដរាជសីហ៍ នឹងជួបកីឡាករថៃក្នុងប្រភេទទម្ងន់៦៣,៥គីឡូក្រាម និងកីឡាករម៉ន វិរៈ មកពីក្លិបព្រែកឯងកីឡា ត្រូវជួបប្រកួតជាមួយកីឡាករថៃដូចគ្នាផងដែរ។ ការផ្លាស់ប្ដូរនេះ ភាគតិចណាស់បានទទួលដំណឹងផ្លាស់ប្ដូរ ពិសេសអ្នកបានជ្រួតជ្រាបដំណឹងតាមបណ្ដាសារព័ត៌មានដែលបានចុះផ្សាយពីព្រឹត្តិការណ៍នេះកាលពីដើមសប្ដាហ៍ ៕
ចែករំលែកព័តមាននេះ