រាជធានីភ្នំពេញ ៖ នៅថ្ងៃអាទិត្យ ទី៣០ វិច្ឆិកា ស្អែកនេះ កីឡាករវ័យក្មេងពីររូប គឺសេង ហៀង និងសួង សុវណ្ណថា ត្រូវដល់ថ្ងៃកំណត់ឡើងប្រកួតជាមួយជើងខ្លាំងរបស់ខ្លួននោះហើយ នៅលើសង្វៀនទូរទស្សន៍អាស៊ីអាគ្នេយ៍ ក្នុងព្រឹត្តិការណ៍ជើងឯកស្រាបៀរកម្ពុជា នៅពេលរសៀល ។
រាជធានីភ្នំពេញ ៖ នៅថ្ងៃអាទិត្យ ទី៣០ វិច្ឆិកា ស្អែកនេះ កីឡាករវ័យក្មេងពីររូប គឺសេង ហៀង និងសួង សុវណ្ណថា ត្រូវដល់ថ្ងៃកំណត់ឡើងប្រកួតជាមួយជើងខ្លាំងរបស់ខ្លួននោះហើយ នៅលើសង្វៀនទូរទស្សន៍អាស៊ីអាគ្នេយ៍ ក្នុងព្រឹត្តិការណ៍ជើងឯកស្រាបៀរកម្ពុជា នៅពេលរសៀល ។ ជាមួយនឹងការឡើងរេញនេះកីឡាករម្នាក់ៗកំពុងត្រូវបានគេឃ្លាំមើលយ៉ាងខ្លាំង ថាពិតជាយកឈ្នះលើដៃគូបានឬមិនបាន? កីឡាករ សេង ហៀង ដែលអ្នកណាក៏ដឹងថា ជាជើងខ្លាំងប្រចាំក្លិបសុភាមានជ័យ បានបាត់មុខពីសង្វៀនប្រដាល់យូរក្រែលមកហើយ ដោយសារតែលោកជាប់ឈ្មោះថា បានលក់ខ្លួនគ្រប់ពេលឡើងរេញ ហើយធ្វើឲ្យមន្ត្រីប្រចាំសហព័ន្ធដាក់វិន័យមិនឲ្យឡើងរេញអស់មួយរយៈ ក៏ដូចជាធ្វើឲ្យអតីតគ្រូបង្វឹករបស់លោកទទួលរងការអាម៉ាស់ ។
លោកបានដើរចេញពីក្លិបចាក់អង្រែកីឡា ចូលមកជ្រកក្នុងក្លិបថ្មី ក្នុងបំណងកសាងកេរ្តិ៍ឈ្មោះជាថ្មី បើទោះជាសភាពស្អុយរលួយដែលបានបន្សល់ទុកហាក់មិនធ្វើឲ្យអ្នកគាំទ្រច្រើនប៉ុន្មាននៅបន្តទុកចិត្តពីសមត្ថភាពរបស់លោក ។ កីឡាកររូបនេះ ត្រូវអ្នកទស្សនាគ្រប់គ្នាសរសើរថា វាយបានល្អ និងមានផ្លែដៃច្បាស់លាស់ ប៉ុន្តែលោកច្រើនតែសុខចិត្តធ្វើចាញ់ជាថ្នូរនឹងទឹកប្រាក់ទិញទឹកចិត្តបន្តិចបន្តួច ទើបធ្វើឲ្យក្រេឌីតរបស់លោកបាក់ស្រុតនៅក្នុងពិភពកីឡាប្រដាល់ ។ យ៉ាងណាក៏ដោយ គ្រប់លើកនៃការចោទប្រកាន់ទាំងនោះ កីឡាករ សេង ហៀង មិនដែលទទួលស្គាល់នោះទេ ដោយបានបង្វែរភាពចាញ់ថា បណ្ដាលមកពីហេតុផលមិនបានហ្វឹកហាត់ជាប់លាប់ច្រើនជាង ។ មន្ត្រីប្រចាំសហព័ន្ធបានព្រមានកីឡាកររូបនេះច្រើនលើកមកហើយ ដោយបានទាំងហៅទង្វើរបស់លោកថា ជាទង្វើច្រំដែល ដែលសុខចិត្តលក់កិត្តិយស និងមុខមាត់ក្នុងនាមជាជើងខ្លាំងលើសង្វៀនព្រោះតែប្រាក់នៅក្រៅសង្វៀនដែលត្រូវគេដឹងថា មិនមានតម្លៃខ្ពស់នោះផង ។
លោកត្រូវមន្ត្រីសហព័ន្ធ និងអ្នកផ្គូផ្គងធីបចោលមិនឲ្យប្រកួតអស់មួយរយៈ បន្ទាប់ពីបានព្រមានដោយមាត់ទទេច្រើនលើកហើយមិនកែទម្លាប់ពេលឡើងសង្វៀន ធ្វើឲ្យមានការចោទប្រកាន់ថា បានលក់ខ្លួនដដែលជាដដែល នៅមុនពេលបាត់មុខ ។ អញ្ចឹងហើយ ទើបការសម្រេចចិត្តវិលវិញ ក្រោមការសន្យាជាមួយសហព័ន្ធ និងអ្នករៀបចំការប្រដាល់នាពេលនេះកំពុងតែធ្វើឲ្យមានការឃ្លាំមើលយ៉ាងខ្លាំងថា កីឡាកររូបនេះនឹងបិទចោលប្រវត្តិសាស្ត្រច្រំដែល ឬនៅតែភ្លេចត្រចៀកទៀត ។ ប្រភពអ្នកផ្ដល់ឱកាសឲ្យសេង ហៀង ឡើងរេញជាថ្មីនិយាយថា សេង ហៀង បាននិយាយហើយថា មិនលក់ខ្លួនធ្វើចាញ់ទៀតទេ ដោយមានទាំងការអះអាងរបស់ប្រធានក្លិបសុភាមានជ័យ ដែលជាទីជម្រកថ្មីរបស់លោកធ្វើការធានាជូនផងដែរ ទើបមានការជឿជាក់ថា ករណីដដែលនោះពិតជាមិនកើតមានទៀតទេ ។
នៅរសៀលថ្ងៃអាទិត្យនេះ លោកត្រូវគេឲ្យប្រកួតជាមួយកីឡាករ ពេជ្រ ប៊ុនធឿន មកពីក្លិបពន្លឺសាមគ្គីខេត្តបាត់ដំបង ដោយការប៉ះប្រកួតនេះ ប្រសិនបើជើងខ្លាំងសេង ហៀង មិនទទួលសម្ពាធក្នុងការធ្វើចាញ់ គឺពិតជាឈ្នះដោយមិនបាច់ប្រឹងនោះទេ ដោយសារតែក្រេឌីតពីអតីតកាលរបស់កីឡាករ ពេជ្រ ប៊ុនធឿន ស្រាលជាងកីឡាករសេង ហៀង ឆ្ងាយណាស់ ។ ក្នុងនោះសូម្បីតែល្បិចនិងបច្ចេកទេសក្នុងការវាយលុក ក៏ ពេជ្រ ប៊ុនធឿន ត្រូវគេមើលឃើញថា មិនមែនជាដៃគូរបស់ សេង ហៀង នោះដែរ ប្រសិនបើសេង ហៀង ពិតជាវាយដោយប្រើសមត្ថភាព ។ ក្រុមអ្នកវិភាគនិយាយថា ការវិលត្រលប់របស់កីឡាកររូបនេះមិនអាចបណ្ដោយឲ្យប្រវត្តិសាស្ត្រចាស់គំរឹលញាំញីទៀតទេ គឺពិតជាព្យាយាមបញ្ចេញសមត្ថភាព និងធ្វើឲ្យមានការភ្ញាក់ផ្អើលក្នុងជំនួបប៉ះ ពេជ្រ ប៊ុនធឿន ដែលកន្លងមក មិនធ្លាប់ប៉ះគ្នា ។ ប្រសិនបើលោកចៀសផុតពីការរិះគន់ នោះមានន័យថា កេរ្តិ៍ឈ្មោះ និងប្រជាប្រិយភាពពិតជាមិនពិបាកប្រទាញយកការចាប់អារម្មណ៍នោះទេ សម្រាប់ការប្រកួតលើកក្រោយៗដែលនឹងមានការផ្គូផ្គងបន្ត ។
មួយគូទៀត កីឡាករ សួង សុវណ្ណថា មកពីក្លិបដែលទើបធ្លាក់ចេញពីការប្រកួតដណ្ដើមខ្សែក្រវាត់របស់ស្រាបៀរកម្ពុជាថ្មីៗ ក៏ត្រូវប៉ះប្រកួតជាមួយកីឡាករ សល់ អាម៉ា មកពីក្លិបកុសលកីឡា ដែលជាជើងខ្លាំងម្នាក់ផងដែរ។ ការប្រកួតរវាងគូនេះនឹងប៉ះគ្នាជាគូដែលត្រូវបានអ្នកស្នេហាវិស័យប្រដាល់ភាគច្រើនចាប់អារម្មណ៍។ ទោះបីយ៉ាងណា ការប៉ះប្រកួតរបស់ពួកគេ ហាក់ទទួលបានការចង់ដឹងពីអ្នកទស្សនាតិចជាងការប្រកួតរបស់ សេង ហៀង និងពេជ្រ ប៊ុនធឿន ដោយសារតែ សេង ហៀង ជាកីឡាករល្បីឈ្មោះ និងធ្លាប់ផ្ទុះរឿងអាស្រូវលក់ខ្លួនធ្វើឲ្យមានកេរ្តិ៍ឈ្មោះក្នុងស្រទាប់មហាជនរួចទៅហើយ ។ កីឡាករ សួង សុវណ្ណថា ដ្បិតថាបាត់ឱកាសដណ្ដើមយកខ្សែក្រវាត់ ប៉ុន្តែកម្រិតប្រកួតរបស់លោក ក៏មិនអន់ប៉ុន្មានដែរ ទាំងផ្លែដៃ និងបច្ចេកទេសប្រកួត ។
អញ្ចឹងហើយទើបការប៉ះកណ្ដាប់ដៃជាមួយ សល់ អាម៉ា ក្នុងថ្ងៃអាទិត្យនេះ គឺពិតជាធ្វើឲ្យអ្នកចង់តាមដានមានការចាប់អារម្មណ៍ ។ ចាំមើលតើសួង សុវណ្ណថា អាចយកឈ្នះ សល់ អាម៉ា បានទេ ក្នុងពេលដែល សល់ អាម៉ា ត្រូវគេស្គាល់ថា ខ្លាំង និងឡើងសន្ទុះគួរឲ្យកត់សម្គាល់ប្រចាំក្លិបកុសលកីឡានោះ ? ការប្រកួតរវាងគូទាំងពីរ ពិតជារំលេចព្រឹត្តិការណ៍ប្រដាល់របស់ទូរទស្សន៍អាស៊ីអាគ្នេយ៍ ឲ្យមានការចង់ដឹងច្រើន សម្រាប់រសៀលថ្ងៃអាទិត្យស្អែកនេះ ៕
ចែករំលែកព័តមាននេះ