ឈឺស្មាគឺជាបញ្ហាដែលយើងតែងតែជួបញឹកញាប់ជាងគេ បើសិនជាមិនបានធ្វើការព្យាបាលឱ្យទាន់ពេលវេលាទេ អាការនេះអាចវិវឌ្ឍទៅរកជំងឺឈឺសន្លាក់ ដែលអាចធ្វើឱ្យខូចទ្រង់ទ្រាយរបស់ស្មា ឈានទៅរកពិការភាពអស់មួយជីវិត ។
ជួបជាមួយលោកសាស្ត្រាចារ្យវេជ្ជបណ្ឌិត ស៊ិក ធីរៈ ឯកទេសជំងឺសន្លាក់និងវះកាត់ឆ្អឹងបាក់បែក នៃគី្លនិកឯកទេសឆ្អឹងសំណង់១២ បានប្រាប់កោះសន្តិភាពឱ្យដឹងថា បញ្ហាឈឺស្មាអាចស្តែងចេញនូវរោគសញ្ញាមួយចំនួនដូចជា៖
-ដំបូងឈឺតិចៗតែយូរទៅក៏ឈឺខ្លាំងទ្បើងៗ
-នៅពេលធ្វើចលនាផ្សេងៗក៏មានអាការឈឺចុកចាប់ដែរ
-ជួនកាលដេកលក់ហើយស្រាប់តែភ្ញាក់ទ្បើងវិញ ព្រោះតែមានការឈឺចាប់នៅត្រង់ស្មាខ្លាំង ។
ចំពោះមូលហេតុដែលបណ្តាលឱ្យឈឺស្មានេះអាចបណ្តាលមកពីកត្តាជាច្រើនដូចជា៖
-រលាកថងទឹកសន្លាក់ក្នុងស្រទាប់ឆ្អឹង
-រលាកស្រោមសន្លាក់
-ការប៉ះទង្គិចជាមួយស្មា ដូចជាពេលដួលយកចៃច្រត់ ឬអ្នកដែលចូលចិត្តធ្វើការប្រើកម្លាំងដៃខ្លាំង ឬក៏ធ្លាប់ជួបនូវគ្រោះថ្នាក់អ្វីមួយដែលធ្វើឱ្យប៉ះទង្គិចស្មាជាដើម ។
លោកវេជ្ជបណ្ឌិត ស៊ិក ធីរៈ បានបន្តទៀតថា បើសិនជាលោកអ្នកភ្លាត់ស្មាហើយមិនបានព្យាបាលត្រឹមត្រូវតាមវេជ្ជសាស្ត្រទេ យូរៗទៅវិវឌ្ឍទៅរកការស្វិតដៃ ។ ស្ថិតក្នុងស្ថានភាពបែបនេះ អ្នកនៅតែមិនព្រមធ្វើការព្យាបាលទៀត នឹងអាចទ្បើងក្តាំងនៅជុំវិញស្រោមសន្លាក់ស្មាទីបំផុតអ្នកជំងឺមិនអាចលើកដៃបានដូចបំណងទេ ព្រោះតែមានការឈឺចាប់ខ្លាំង ដូច្នេះក៏មិនខុសពីជីវិតជនពិការដែរ ។
គួរចងចាំថា នៅពេលអ្នកមានបញ្ហាឈឺស្មា រហូតដល់កាន់របស់អ្វីលែងកើតមានរោគសញ្ញាក្តៅខ្លួនទ្បើងក្រហមខ្លាំងនៅនឹងស្មា ឬមានហើមគួរតែប្រញាប់មកជួបពិភាក្សាជាមួយគ្រូពេទ្យ ព្រោះអាការបែបនេះ កំពុងតែវិវឌ្ឍទៅរកស្ថានភាពធ្ងន់ធ្ងរហើយ ៕
ចែករំលែកព័តមាននេះ