ទីបំផុត កីឡាករប្រដាល់ហ្វ៊ីលីពីន ម៉ានី ប៉ាក់គីអាវ បន្តធ្វើជាម្ចាស់ខ្សែក្រវាត់ស្ថាប័ន WBO តទៅមុខទៀត ខណៈបានធ្វើឱ្យគូប្រកួត គឺកីឡាករគ្រីស អាល់ជៀរី ត្រូវអាជ្ញាកណ្តាលរាប់ដល់៦លើក យកឈ្នះដោយពិន្ទុជាឯកច្ឆន្ទ នៅក្នុងការប្រកួតនៅសង្វៀន Cotai Arena ក្រុងម៉ាកាវ ប្រទេសចិន កាលពីថ្ងៃអាទិត្យ ទី២៣វិច្ឆិកា ។
ជាលទ្ធផលសរុបនៃការប្រកួតពេញ១២ទឹក ប៉ាក់គីអាវ យកឈ្នះអាល់ជៀរីក្នុងលទ្ធផល ១១៩ទល់១០៣, ១១៩ទល់១០៣ និង១២០ទល់១០២ ។
គួរកត់សម្គាល់ថា នៅក្នុងការប្រកួតលើកនេះ ប៉ាក់គីអាវ ហាក់ធ្វើបានល្អច្រើនជាង៣លើកកន្លងទៅ ដោយគេបានគ្របសង្កត់លើគូប្រកួតស្ទើរគ្រប់ទឹក ។ ល្បឿនវាយចេញយ៉ាងរហ័សគួបផ្សំនឹងបច្ចេកទេសផ្លាស់ទីដ៏ល្អផងនោះ ប៉ាក់គីអាវបានក្លាយជាអ្នកធ្វើព្យុះភ្លៀងលើអាល់ជៀរីស្ទើរពេញ១២ទឹក ។ ចាប់ផ្តើមក្នុងទឹកទី១ភ្លាម ប៉ាក់គីអាវ បានស្ទុះចូលវាយដោយឥតសំចៃកម្លាំងខណៈអាល់ជៀរី ហាក់បង្ហាញភាពញញើតញញើមក្នុងការវាយតបត ហើយជាលទ្ធផល ផ្ទៃមុខផ្នែកខាងឆ្វេងរបស់គេហើមប៉ោងបន្តិច ។
ទោះជាយ៉ាងណា ការប្តូរកណ្តាប់ដៃគ្នាចាប់កើតមានខ្លះៗក្នុងទឹកទី២ ប៉ុន្តែប៉ាក់គីអាវមានប្រៀបជាង ខណៈអាល់ជៀរី រអិលជើងដួលដំណាលគ្នានឹងការរងកណ្តាប់ដៃប៉ាក់គីអាវ ។ រូបគេត្រូវអាជ្ញាកណ្តាលរាប់ជាលើកទី១ ។
ចូលដល់ទឹកទី៣ ប៉ាក់គីអាវ នៅតែបន្តគ្រប់គ្រងការប្រកួតជាដដែលជាមួយនឹងកណ្តាប់ដៃវាយចេញធ្ងន់ៗ ខណៈដែលអាល់ជៀរី គ្មានអ្វីតបតក្រៅពីឃុំការពារមុខ និងលួចវាយឆ្មក់ម្តងកាល ។ ចំណុចដែលគួរឱ្យចាប់អារម្មណ៍មួយទៀត គឺកើតមានក្នុងទឹកទី៦ ខណៈកណ្តាប់ដៃដ៏ធ្ងន់របស់ប៉ាក់គីអាវ បានធ្វើឱ្យអាល់ជៀរី ដួលអុកគូទលើកា្តររេញ និងត្រូវអាជ្ញាកណ្តាលរាប់ដល់ទៅ២លើក ។ សម្រាប់អាល់ជៀរី ទោះជារងការវាយសន្ធាប់ក្តី ប៉ុន្តែទឹកចិត្តរបស់គេហាក់មិនថមថយនោះទេ ។ អ្វីដែលគួរឱ្យសោកស្តាយ រូបគេត្រូវអាជ្ញាកណ្តាលរាប់២លើកបន្ថែមទៀតក្រោយរងកណ្តាប់ដៃប៉ាក់គីអាវ ក្នុងទឹកទី៩ ។ គេសង្កេតឃើញថា ការប្រកួតលើកនេះ អាល់ជៀរី ហាក់គ្មានបច្ចេកទេសណាមួយដើម្បីឆ្លើយតបនឹងល្បឿនគេច និងវាយយ៉ាងរហ័សរបស់ប៉ាក់គីអាវ ឡើយ។ កម្លាំងរបស់គេហាក់ធ្លាក់ចុះច្រើនក្រោយការដួលអុកគូទក្នុងទឹកទី៩ ដល់ទៅ២លើក ជាពិសេសក្រោយការដួលលើកទី២ ក្នុងទឹកនេះ ។
ការប្រកួតបន្តក្នុងទឹកទី១០ អាល់ជៀរី នៅតែគ្មានសំណាងដ្បិតត្រូវប៉ាក់គីអាវ វាយឱ្យអាជ្ញាកណ្តាលរាប់ម្តងទៀត ។ នេះជាការរាប់លើកទី៦ និងជាលើកចុងក្រោយ ។ ចំណែក២ទឹកចុងក្រោយ ប៉ាក់គីអាវ នៅតែនាំមុខជាដដែល ហើយជាលទ្ធផលគេដណ្តើមបានជ័យជម្នះជាលើកទី៥៧ ក្នុងអាជីព ។ ចំពោះអ្នកទិញការប្រកួតតាមប្រព័ន្ធអេឡិចត្រូនិកវិញមានតម្លៃ៦៥ដុល្លារ បានខកចិត្តយ៉ាងខ្លាំងនៅពេលអាល់ជៀរី គ្មានអ្វីតបតប៉ាក់គីអាវ ក្រៅពីព្យាយាមរត់គេច ។
លោកហ្វ្រេដឌី រ៉ូច ជាគ្រូបង្ហាត់ប៉ាក់គីអាវ ថ្លែងថា ៖ «ខ្ញុំអស់សង្ឃឹមយ៉ាងខ្លាំងចំពោះកីឡាករអាល់ជៀរី ។ អ្វីដែលគេអាចធ្វើបានក្នុងការប្រកួតលើកនេះ គឺការរត់គេច ។ គេមិនបានធ្វើខ្លួនជាកូនប្រុសឡើយ» ៕
ចែករំលែកព័តមាននេះ