រាជធានីភ្នំពេញ ៖ បើទោះជាការប្រកួតលើកទី២ ជាមួយកីឡាករ Antoine Pinto កាលពីយប់ថ្ងៃសៅរ៍ ទី២២ វិច្ឆិកា កីឡាករវ័យក្មេងបារាំងបានក្លាយជាអ្នកឈ្នះ ក៏កីឡាកររូបនេះ ត្រូវគេឃើញលុតជង្គង់សំពះបាតជើងសេន ប៊ុនថេន ភ្លាមៗក្រោយពេលចប់ការប្រកួត។ ទង្វើនេះគឺបណ្ដាលមកពី Antoine Pinto ទម្រាំឈ្នះក៏ឈ្នះទាំងលំបាកក្រោមកណ្ដាប់ដៃរបស់ សេន ប៊ុនថេន លើកនេះដែរ ។
កីឡាករ សេន ប៊ុនថេន មិនទទួលបានជោគជ័យដូចការគ្រោងទុកនោះទេ ក្នុងការប្រកួតនៅលើសង្វៀន Thai Fight-Asia Europe នៅក្នុងប្រទេសថៃ ដែលបានធ្វើឡើងយ៉ាងកក្រើកនៅក្នុងខេត្តខុនកែន កាលពីម្សិលម្ង៉ៃ នោះ។ ក្នុងទឹកទី១ និងទឹកទី២ កីឡាករ Antoine Pinto ធ្វើបានល្អហួសពីការស្មាន ដោយសារតែលោកទាំងរហ័ស ទាំងច្បាស់ស្នៀត និងមានដៃជើងវែងៗ អំណោយផលក្នុងការវាយលុក ។ មិនត្រឹមតែកែងម៉ាត់លើម៉ាត់ក្រោម ឬលើកជើងធាក់ចំកណ្ដាលមុខនោះទេ គឺកីឡាករ Antoine Pinto វាយសង្គ្រុបបានល្អទាំងអស់ ទៅលើកីឡាករ សេន ប៊ុនថេន ។ ទោះបីយ៉ាងណា នៅទឹកទី៣ កីឡាករកម្ពុជា សេន ប៊ុនថេន ធ្វើបានល្អយ៉ាងខ្លាំងក្នុងការវាយសង្គ្រុបទៅលើ Antoine Pinto ដោយបានស្ទុះអុកកែង និងវាយបំបុកចំកណ្ដាលមុខរបស់គូបដិបក្ខជាច្រើនលើក។ នៅក្នុងស្នៀតមួយដែលកីឡាករកម្ពុជា វាយដោយម៉ាត់ពេញទំហឹង គឺអ្នកទស្សនាសុទ្ធតែប្រហោងពោះដូចគ្នា ដោយសារតែមួយក្បាច់របស់លោកនាពេលនោះ ប្រសិនបើ Antoine Pinto គេចមិនទាន់ គឺពិតជាសន្លប់លើរេញជាក់ជាមិនខាន ដោយសារតែមួយស្នៀតដែល សេន ប៊ុនថេន វាត់ចេញនាពេលនោះ គឺពោរពេញដោយកម្លាំង និងថាមពល ។ សំណាងគេចផុតមួយស្នៀតនោះ កីឡាករបារាំង ក៏ប៊ិះនឹងត្រូវពេញទំហឹងដោយកែងដ៏មុតស្រួចផងដែរ ក្នុងពេលកៀកនឹងចប់ទឹកចុងក្រោយ ។ អញ្ចឹងហើយទើបកីឡាករ Antoine Pinto បានទទួលការសរសើរយ៉ាងខ្លាំងថាពូកែគេចបានរហ័ស ពេញមួយការប្រកួតក្នុងទឹកចុងក្រោយ។ កីឡាករ Pinto ត្រូវការតែលទ្ធផលមិនសន្លប់ គឺពិតជាឈ្នះនៅវគ្គចុងក្រោយ ដ្បិត២ទឹកមុនដំបូង លោកជាអ្នកវាយត្រូវចំគោលដៅបានល្អទៅលើកីឡាករ សេន ប៊ុនថេន ។ ទំនងជាមកពីហេតុផលនេះ ទើបគ្រាន់តែស្នូរជួងបញ្ចប់ទឹកទី៣ភ្លាមកីឡាករ Antoine Pinto បានលុតជង្គង់ថ្វាយបង្គំកីឡាករ សេន ប៊ុនថេន តែម្ដង ដែលមានន័យថា លោកជាសិស្សប្អូនបង្ហាញការគោរពចំពោះសិស្សច្បង និងមានន័យមួយផ្នែកទៀតថា ពិតជាសំណាងខ្លាំងណាស់ដែលអាចឆ្លងផុតកណ្ដាប់ដៃរបស់ប៊ុនថេន ដោយមិនមានគ្រោះថ្នាក់ ។ Pinto ត្រូវគណៈកម្មការប្រកាសថាឈ្នះពិន្ទុកីឡាករ សេន ប៊ុនថេន ដែលលទ្ធផលនេះ គឺពិតជាមានន័យខ្លាំងណាស់សម្រាប់កីឡាកររូបនេះ ។ ទីមួយមានន័យថា Antoine Pinto អាចការពារមិនឲ្យ សេន ប៊ុនថេន សងសឹកបាន និងទី២មានន័យថា លោកនឹងបានបន្តទៅប្រកួតក្នុងវគ្គចុងក្រោយដើម្បីបញ្ចប់ព្រឹត្តិការណ៍ប្រដាល់ Thai Fight 2014 ដែលជាឱកាសដណ្ដើមយកទាំងជើងឯក និងទទួលបានទាំងទឹកប្រាក់ច្រើនម៉ឺនដុល្លារ ។ ការប្រកួតកាលពីខែសីហា គ្រាន់តែជាឆាកប្រយុទ្ធមិត្តភាពរវាងកីឡាករកម្ពុជាក្នុងតំបន់អាស៊ី និងកីឡាករមកពីទ្វីបអឺរ៉ុបគឺ Antoine Pinto ប៉ុណ្ណោះ ដោយអ្នកឈ្នះ និងចាញ់ គឺមិនសូវសំខាន់ប៉ុន្មានទេ ។ ប៉ុន្តែសម្រាប់ការប្រកួតកាលពីម្សិលម្ង៉ៃវិញ អ្នកឈ្នះគឺមានឱកាសព្រមគ្នាតែម្ដង ក្នុងការដណ្ដើមយកជើងឯកប្រចាំ ឆ្នាំផង និងប្រាក់ម៉ឺនដុល្លារផង ។
យោងតាមការប្រកាសរបស់គណៈកម្មការប្រដាល់ថៃ ដែលបកប្រែដោយអ្នកអត្ថាធិប្បាយប្រចាំនៅប៉ុស្ដិ៍លេខ៥ ក្នុងពេលបន្តផ្ទាល់បានបញ្ជាក់ថា កីឡាករដែលឈ្នះការប្រកួតសម្រាប់ព្រឹត្តិការណ៍នៅយប់ថ្ងៃ២២ វិច្ឆិកា នឹងត្រូវអនុញ្ញាតឲ្យប្រកួតជាមួយអ្នកឈ្នះនៅចុងខែធ្នូ ម្ដងទៀត ដើម្បីបញ្ចប់ព្រឹត្តិការណ៍ Thai Fight 2014 មុននឹងឈានធ្វើការជ្រើសរើសអ្នកខ្លាំងសម្រាប់ឆ្នាំ២០១៥ខាងមុខទៀត ។ ពិធីករកម្ពុជាដែលជាអ្នកអត្ថាធិប្បាយបានបកប្រែសេចក្ដីប្រកាសពីព្រឹត្តិការណ៍នេះថា កីឡាករដែលឈ្នះពីការប្រកួត មិនត្រឹមតែអាចទៅប្រកួតជាមួយអ្នកឈ្នះសម្រាប់ខែក្រោយ ដណ្ដើមយកតំណែងជើងឯកក្នុងប្រភេទទម្ងន់រៀងខ្លួនប៉ុណ្ណោះទេ ប៉ុន្តែក៏មានន័យថា ពួកគេបានឈានដល់វគ្គប្រកួតដែលមានតម្លៃខ្លួនប្រមាណជា៣ម៉ឺនដុល្លារ ដោយសូម្បីតែចាញ់ការប្រកួតនៅវគ្គចុងក្រោយនោះផងដែរ ។ អញ្ចឹងហើយ ទើបមហាជនខ្មែរមានការសោកស្ដាយយ៉ាងខ្លាំង ដែល សេន ប៊ុនថេន ក្រៅពីមិនអាចសងសឹក Antoine Pinto ក៏ត្រូវបាត់ទាំងឱកាសឈានទៅវគ្គផ្ដាច់ព្រ័ត្រ និងបាត់ឱកាសឡើងប្រកួតយកប្រាក់កម្រៃដល់៣ម៉ឺនដុល្លារពីព្រឹត្តិការណ៍ដ៏ធំនេះ ។ យ៉ាងណាក៏ដោយ សេន ប៊ុនថេន ក៏ទទួលបានការថ្វាយបង្គំលុតជង្គង់ពីសំណាក់ Antoine Pinto ក្រោយការប្រកួតចប់ភ្លាមៗ ដោយសារតែលោកប៊ិះនឹងធ្វើឲ្យ Pinto សន្លប់លើរេញនៅទឹកចុងក្រោយនោះផងដែរ ។ ការប្រកួតលើកនេះ សេន ប៊ុនថេន បានពាក់ក្រមាធ្វើជាឈ្នួតក្បាលដូចខែមុន ហើយលោកក៏ធ្វើឲ្យអ្នកគាំទ្រខ្មែរអស់ចិត្ត ព្រោះតែប៊ិះធ្វើឲ្យ Pintoឆ្លងទៅកាន់វគ្គចុងក្រោយមិនបាន ។ ព្រឹត្តិការណ៍នេះត្រូវគេឃើញប្រមូលផ្ដុំដោយអ្នកទស្សនាកកកុញនៅជុំវិញសង្វៀនស្ថិតនៅខេត្តខុនកែន រហូតដល់រាប់ម៉ឺននាក់ ខណៈដែលតាមកញ្ចក់ទូរទស្សន៍ប៉ុស្ដិ៍លេខ៥កម្ពុជា ប៉ុស្ដិ៍ថៃ និងបណ្ដាប្រទេសមួយចំនួននៅតំបន់អឺរ៉ុប និងអាស៊ី ក៏មានផ្សាយផ្ទាល់ ដែលជួយធ្វើឲ្យពិភពលោកស្គាល់តំណាងរបស់កម្ពុជា គឺសេន ប៊ុនថេន បើទោះជាលទ្ធផលលើកនេះ បានត្រឹមចាញ់ពិន្ទុម្ដងទៀតក្តី ៕
ចែករំលែកព័តមាននេះ