រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់កំពូលអ្នកប្រយុទ្ធគុនខ្មែរវគ្គ៣ ដែលទើបបញ្ចប់វគ្គជម្រុះវិលជុំមុននឹងឈានចូលដល់វគ្គពាក់កណ្តាលផ្តាច់ព្រ័ត្រ ការប្រកួតត្រូវបានសម្រាកមួយសប្តាហ៍សិន ហើយគណៈកម្មការបានរៀបចំការប្រកួតជាលក្ខណៈមិត្តភាពជំនួសវិញដែលមានទាំងអស់៥គូ ។ គូដែលគេចាប់អារម្មណ៍ជាងគេគឺ យស់ សំអាល់ មកពីក្លិបឃ្លាំងមឿងកីឡាដែលជាម្ចាស់ខ្សែក្រវាត់របស់កំពូលអ្នកប្រយុទ្ធគុនខ្មែរវគ្គ១ជួបប្រកួតជាមួយ ជឹម ចិត្រា មកពីក្លិបខេត្តកំពង់ឆ្នាំង ដែលជាម្ចាស់ខ្សែក្រវាត់របស់កំពូលអ្នកប្រយុទ្ធគុនខ្មែរវគ្គ២ នៅលើសង្វៀន CTN នាថ្ងៃអាទិត្យ ទី២ វិច្ឆិកា ។
យស់ សំអាល់ កម្លាំងខ្លាំង និងមានភាពស្ទាត់ជំនាញបំផុតក្នុងការប្រើក្បាច់ចាប់ក្រៀកបោក ឯចិត្តក៏សឿងណាស់ដែរ ។ កីឡាកររូបនេះមិនចូលចិត្តបណ្តោយឱ្យគូប្រកួតវាយមកលើគេមុននោះទេ មិនតែប៉ុណ្ណោះគេក៏មិនងាយចាញ់សម្លុតគូប្រកួតផ្តាសដែរ ទោះបីអ្នកនោះខ្លាំងជាងខ្លួនក៏ដោយ ។ រីឯ ជឹម ចិត្រា សម្រាប់ការមកប៉ះជាមួយ យស់ សំអាល់ លើកនេះមិនដឹងថា យ៉ាងណានោះទេ ។ ប៉ុន្តែដោយសារតែគេជាម្ចាស់ខ្សែក្រវាត់មួយរូបដែរនោះ បើនរណាចង់កាច់បំបាក់គេគឺមិនមែនជារឿងងាយស្រួលប៉ុន្មានឡើយ ។ សូម្បីតែលោក ឡោ វុទ្ធី ដែលជាគ្រូបង្វឹករួមនៅក្នុងជំរំកំពូលអ្នកប្រយុទ្ធនោះ ក៏មិនហា៊នអះអាងទុកមុនថា អ្នកណាខ្លាំងជាងអ្នកណាដែរ ដោយសារកីឡាករទាំង២មានសមត្ថភាពប្រដំប្រសងគ្នា ។ យស់ សំអាល់ ពូកែខាងចូលចាប់ក្រៀកបោកផ្តួល ឯជឹម ចិត្រា ពូកែវាយទាត់ធាក់ពីចម្ងាយដោយសារគេអំណោយផលខាងកម្ពស់ ។
ចំណែក៤គូផ្សេងទៀតនោះមាន រិន សារដ្ឋ មកពីក្លិបខេត្តព្រៃវែង ប្រកួតជាមួយ អន ជិនហេង មកពីសមាគមកីឡាប្រដាល់ក្រសួងការពារជាតិក្នុងប្រភេទទម្ងន់៦៥គីឡូក្រាម ។ ភិន សុទី មកពីក្លិបខេត្តក្រចេះ ប្រកួតជាមួយ យ៉ុន សំអាត មកពីក្លិបខេត្តបាត់ដំបង ក្នុងប្រភេទទម្ងន់៦៥គីឡូក្រាម ។ ច្រិច កុសល មកពីក្លិបក្រុងប៉ោយប៉ែត ប្រកួតជាមួយ កុយ ឆារា៉ន់ មកពីក្លិបអេភូថងកីឡា ក្នុងប្រភេទទម្ងន់៦៣គីឡូក្រាម និងចាន់ សំអាត មកពីក្លិបកងពលធំអន្តរាគមន៍លេខ៣ព្រះវិហារ ប្រកួតជាមួយ រីគី ណារ័ត្ន មកពីក្លិបខ្លារខិនមានឫទ្ធិ ៕
ចែករំលែកព័តមាននេះ