ប្រទេសរុស្ស៊ីប្រកាសកាលពីថ្ងៃទី២៩ តុលា ថា ខ្លួនត្រូវបារាំងស្នើឱ្យទៅទទួលនាវាផ្ទុកឧទ្ធម្ភាគចក្រធុន Mistral មួយគ្រឿងដំបូង នាថ្ងៃទី១៤ វិច្ឆិកា តែព័ត៌មាននេះពុំត្រូវបានក្រុងប៉ារីសអះអាងបញ្ជាក់ឡើយ ដោយថា ពុំទាន់មានសេចក្តីសម្រេចណាមួយត្រូវបានធ្វើនៅឡើយ ។
តាមបណ្តាញសង្គម Twitter ឧបនាយករដ្ឋមន្ត្រីរុស្ស៊ី លោក ឌីមីទ្រី រ៉ូហ្គោហ្សុីន បានផ្សាយសារលិខិតមួយដែលថាជាសារលិខិតរបស់អនុប្រធានក្រុមហ៊ុនគ្រឿងសព្វាវុធជើងទឹកបារាំង DCNS លោក Pierre Legrus ផ្ញើជូនក្រុមហ៊ុនរដ្ឋរុស្ស៊ី Rosoboronexport ។ ក្នុងសារលិខិតចុះថ្ងៃទី៨ តុលា លោក Pierre Legrus សរសេរថា ខ្ញុំមានកិត្តិយសអញ្ជើញរូបលោកទៅចូលរួមក្នុងពិធីប្រគល់ដែលនឹងប្រព្រឹត្តទៅនាថ្ងៃទី១៤ វិច្ឆិកា នៅ Saint Nazaire ។
ទោះបីយ៉ាងណា DCNS អះអាងក្នុងសេចក្តីថ្លែងការណ៍មួយថា ពុំទាន់មានកាលបរិច្ឆេទផ្តល់ណាមួយអាចអះអាងនៅឡើយ សម្រាប់ពេលនេះ ដោយក្រុមហ៊ុនរង់ចាំការអនុញ្ញាតរបស់រដ្ឋាភិបាលបារាំងសម្រាប់ការផ្ទេរនាវានោះ ។ចំណែកក្រសួងការពារប្រទេសបារាំងវិញ បើតាមមន្ត្រីម្នាក់នៃក្រសួងនោះថា ពុំទាន់មានការសម្រេចចិត្តណាមួយត្រូវបានធ្វើទាក់ទិននឹងការផ្តល់នាវា Mistral នៅឡើយ ដោយការសម្រេចចិត្តត្រូវធ្វើអំឡុងខែវិច្ឆិកា ដោយប្រធានាធិបតីបារាំង ៕
ចែករំលែកព័តមាននេះ