រាជធានីភ្នំពេញ ៖ ក្លិបជើងឯកលីកកំពូលកម្ពុជាភ្នំពេញក្រោន កាលពីរសៀលថ្ងៃទី២៨ តុលា បានបង្ហាញនូវគេហទំព័រផ្ទាល់ខ្លួន ជាផ្លូវការគឺ www.PPCFC.com សម្រាប់ផ្តល់ភាពងាយស្រួលដល់អ្នកគាំទ្រតាមដានព័ត៌មានទាក់ទងជាមួយកីឡាករដែលខ្លួនពេញចិត្ត និងតាមដានពីអ្វីដែលកំពុងកើតមាននៅក្លិបជាដើម ។ មិនត្រឹមតែប៉ុណ្ណោះ ក្លិបក៏បានបង្ហាញសមាជិកថ្មីចំនួន៥រូបទៀត ក្នុងនោះមានគ្រូជំនួយជនជាតិបរទេស២រូប កីឡាករខ្មែរ និងបរទេស៣រូប ដើម្បីត្រៀមរក្សាតំណែងជើងឯករបស់ខ្លួននារដូវកាលក្រោយ និងធ្វើកិច្ចសន្យាបន្តជាមួយគ្រូបង្វឹកបច្ចុប្បន្ន ។
លោក Sam Schweingruber គ្រូបង្វឹកដែលបានជួយឱ្យក្រុមភ្នំពេញក្រោនគ្រប់គ្រងតំណែងជើងឯកក្របខ័ណ្ឌលីកកំពូល (MCL) ជាច្រើនលើកនោះ បានថ្លែងនៅក្នុងសន្និសីទសារព័ត៌មានថា លោកមានចិត្តសប្បាយរីករាយដែលក្លិបនៅតែផ្តល់ទំនុកចិត្តដល់រូបលោកដឹកនាំបន្ត ។ លោកប្តេជ្ញាធ្វើឱ្យក្រុមភ្នំពេញក្រោននៅតែទទួលបានលទ្ធផលល្អ និងជាទីចាប់អារម្មណ៍របស់អ្នកគាំទ្រ តាមរយៈការបន្តកិច្ចសន្យារយៈពេល២ឆ្នាំទៀតជាមួយក្លិប ។ ជាមួយគ្នានោះលោកបានបង្ហាញមុខគ្រូជំនួយរបស់លោក២រូប ដែលមកជួយក្លិបនៅរដូវកាលខាងមុខ គឺលោក Jonny Carter និងលោក Tom Legg ។
លោក Jonny Carter គឺជាជនជាតិវែល ធ្លាប់មានបទពិសោធន៍ក្នុងវិស័យបាល់ទាត់រយៈពេល១៥ឆ្នាំមកហើយនៅប្រទេសអង់គ្លេស, សហរដ្ឋអាមេរិក, សិង្ហបុរី និងហុងកុងជាដើម ។ មិនត្រឹមតែប៉ុណ្ណោះបុរសវ័យ៣៥ឆ្នាំរូបនេះ ថែមទាំងកាន់អាជ្ញាប័ណ្ណគ្រូបង្វឹកកម្រិត A(A License) ទៀតផង ។ រីឯលោក Tom Legg ជាជនជាតិអង់គ្លេស ដែលមកធ្វើការឱ្យភ្នំពេញក្រោន ក្នុងតួនាទីជាប្រធានបច្ចេកទេស និងរៀបចំថ្នាលយុវជននោះក៏មិនធម្មតាដែរ ព្រោះលោកធ្លាប់មានបទពិសោធក្នុងវិស័យបាល់ទាត់នៅប្រទេសមហាអំណាចជាច្រើនដូចជា អាមេរិក, ឥណ្ឌា, អង់គ្លេស, កេនយ៉ា និង Sierre Leone ជាដើម។ លោកក៏មានជំនាញពិសេសគឺវិភាគបាល់ទាត់ ថែមទាំងកាន់អាជ្ញាប័ណ្ណជាគ្រូបង្វឹកកម្រិត B ទទួលស្គាល់ដោយ FIFA ផងដែរ ។
ទន្ទឹមគ្នានោះដែរ ក្លិបភ្នំពេញក្រោនក៏បានបង្ហាញកីឡាករបរទេស៣រូបទៀត គឺកីឡាករ Bosma ជនជាតិហូឡង់ អាយុ២៤ឆ្នាំ មានជំនាញទាត់បាល់ហ្វ្រីឃីកគួរឱ្យកោតសរសើរ, កីឡាករកូនកាត់ខ្មែរ-បារាំង វ៉ា សុខថន អាយុ២៧ឆ្នាំ ជាខ្សែបម្រើ និងកីឡាករ សារី ម៉ាត់រ៉ូទីន ជនជាតិខ្មែរ អាយុ១៨ឆ្នាំ ជាខ្សែបម្រើ ទើបផ្លាស់ចេញពីក្រុមអាស៊ីអឺរ៉ុប ។ លោក Sam បានថ្លែងថា ការបង្កើនសមាជិកថ្មីទាំង៥រូបគឺដោយសារយើងចង់រក្សាតំណែងជើងឯក ជាពិសេសគឺការប្រកួតជើងឯកថ្នាក់តំបន់តែម្តង ។ ដូច្នេះបើបូកសរុបកម្លាំងដ៏មានសក្តានុពលនៃសមាជិកចាស់ៗ យើងសង្ឃឹមថា រដូវកាលក្រោយយើងនឹងឈ្នះពាន MCL ទៀតមិនខាន បើយើងរៀបចំបានល្អនោះ ៕
ចែករំលែកព័តមាននេះ