រាជធានីភ្នំពេញ ៖ សាលាខណ្ឌច្បារអំពៅ នាព្រឹកថ្ងៃទី១០ ខែតុលា ឆ្នាំ២០១៤នេះ បានបើកវេទិកាផ្សព្វផ្សាយ និងពិគ្រោះយោបល់លើកទី២ អាណត្តិទី២ ជាមួយប្រជាពលរដ្ឋក្នុងសង្កាត់ចំនួន៣ ក្នុងនោះមានសង្កាត់ច្បារអំពៅទី១ សង្កាត់ច្បារអំពៅទី២ សង្កាត់និរោធិ៍ ដោយមានការអញ្ជើញចូលរួមពីលោក អ៊ាង ស៊ីផាន អភិបាលនៃគណៈអភិបាលខណ្ឌច្បារអំពៅ លោក អ៊ុំ ម៉ារ៉េត ប្រធានក្រុមប្រឹក្សាខណ្ឌ ព្រមទាំងមន្ត្រី ការិយាល័យចំណុះជំនាញ មន្ត្រីសាលខណ្ឌ និងសមាជិកចូលរួម ប្រមាណ១០០នាក់ ។
ក្នុងវេទិកាសាធារណៈខាងលើនេះដែរ ប្រជាជនទាំងបីសង្កាត់ បានលើកឡើងអំពីបញ្ហាប្រឈម មួយចំនួនធំ ដែលពាក់ព័ន្ធទៅនឹងបញ្ហាសន្តិសុខ សុវត្ថិភាពផ្ទាល់ខ្លួន បញ្ហាអភិវឌ្ឍន៍មូលដ្ឋាន បញ្ហាស្ថាបនាផ្លូវប្រព័ន្ឋលូ សៀវភៅស្នាក់នៅ ល្បែងកន្ទុយលេខ និងបញ្ហាមួយចំនួនទៀត ដោយចោទជាចំនួរសួរផ្ទាល់មាត់ទៅកាន់គណៈអភិបាលខណ្ឌ ដែលសំនួរផ្ទាល់មាត់មាន១២សំនួរ និង ៥៤សំនួរផ្សេងទៀតជាការសសេរលិខិត ( សំបុត្រ ) ។
ពាក់ព័ន្ឋនឹងការលើកឡើង របស់ប្រជាជនខាងលើនេះដែរ លោក អ៊ាង ស៊ីផាន អភិបាលខណ្ឌច្បារអំពៅ បានអញ្ជើញជាអធិបតីឡើងលើវេទិការ ថ្លែងអំពីបញ្ហាប្រឈមរបស់ប្រជាជនដែលបានចោទសួរ និងដាក់សំណើរសុំឱ្យមន្ត្រីមូលដ្ឋានជួយដោះស្រាយ ។ ហើយលោកក៏បានដាស់តឿន និង ជំរុញដល់ចៅសង្កាត់ និងអាជ្ញាធរពាក់ព័ន្ធ និងមន្ត្រីពាក់ព័ន្ធទាំងអស់ត្រូវ បង្កើនការយកចិត្តទុកដាក់ អំពីសុខទុក្ខរបស់បងប្អូនប្រជាពលរដ្ឋ ពេលដែលពួកគាត់ជួបទុក្ខលំបាក ជាពិសេសដូចជាបញ្ហាមួយចំនួនដែលបងប្អូនបានលើកឡើងខាងលើ ។
ចែករំលែកព័តមាននេះ