សារព័ត៌មាននានា រាយការណ៍កាលពីថ្ងៃទី២៣ តុលា ថា ការប្រយុទ្ធគ្នារវាងកងទ័ពរដ្ឋាភិបាលអ៊ុយក្រែន និងពួកបះបោរបំបែកខ្លួននិយមនៅតែបន្តក្នុងភាគខាងកើតអ៊ុយក្រែន ទោះបីមានរបបស្ងប់ស្ងាត់ ដែលភាគីទាំង២យល់ព្រមបង្កើតឡើងក្តី ។
ទាំងកងទ័ពរដ្ឋាភិបាល ទាំងកងកម្លាំងឧទ្ទាម បានចោទប្រកាន់ដាក់គ្នាទៅវិញទៅមកថាធ្វើការវាយប្រហារ និងរំលោភបំពានលើបទឈប់បាញ់គ្នា ។
លោក អានឌ្រី អីុលីសេនកូ អ្នកនាំពាក្យរបស់កងទ័ពអ៊ុយក្រែនគូសបញ្ជាក់ថា ពួកឧទ្ទាមបានវាយប្រហារ៣០លើកប្រឆាំងកងទ័ពអ៊ុយក្រែន រយៈពេល២៤ម៉ោងចុងក្រោយនេះ ។ ទាហានអ៊ុយក្រែនម្នាក់បានស្លាប់ ហើយ២នាក់ទៀត ត្រូវរបួសចាប់ពីថ្ងៃទី២២ តុលា មក ។ លោកចោទប្រកាន់ពួកឧទ្ទាមថា រៀបចំការបង្កហេតុមួយចំនួនប្រឆាំងជនស៊ីវិលនៅតំបន់ភាគខាងកើតប្រទេស ខណៈការបោះឆ្នោតសភាជិតមកដល់ នៅថ្ងៃទី២៦ តុលា ។
អ្នកនាំពាក្យរូបនេះបន្តថា ពួកឧទ្ទាមគ្រោងបាញ់ផ្លោងដាក់បណ្តាតំបន់មានមនុស្សរស់នៅ និងបណ្តាទីតាំងជនស៊ីវិល ក្នុងគោលបំណងទម្លាក់កំហុសលើកងទ័ពអ៊ុយក្រែន ។ ចំណែកពួកឧទ្ទាមវិញនិយាយថា ពួកគេគោរពបទឈប់បាញ់គ្នា ហើយចោទប្រកាន់កងទ័ពរដ្ឋាភិបាលថាបង្កើនការវាយប្រហារ ។
ទីភ្នាក់ងារព័ត៌មាន Novorossia គ្រប់គ្រងដោយពួកឧទ្ទាម គូសបញ្ជាក់ថា យ៉ាងហោចណាស់មានការរំលោភបំពានបទឈប់បាញ់៧លើករបស់កងទ័ពអ៊ុយក្រែន រយៈពេល២៤ម៉ោងចុងក្រោយនេះ ។ ជនស៊ីវិល៣នាក់បានត្រូវរបួសដោយសារការប្រើកាំភ្លើងធំបាញ់ផ្លោងដាក់ក្រុងដូណេតស្ក៍ ។
កាលពីថ្ងៃទី២១ តុលា បណ្តាភាគីក្នុងជម្លោះនៅអ៊ុយក្រែន បានព្រមព្រៀងគ្នាបង្កើតរបស់ហៅថា «របបស្ងប់ស្ងាត់» ក្នុងបណ្តាតំបន់ច្បាំងគ្នា ដើម្បីចៀសវាងកុំឱ្យមានជនរងគ្រោះថែមទៀត ៕
ចែករំលែកព័តមាននេះ