សភាឃើតឌីស្ថានអុីរ៉ាក់ កាលពីថ្ងៃទី២២ តុលា បានអនុញ្ញាតឱ្យបញ្ជូនពួកយុទ្ធជនឃើតអុីរ៉ាក់ទៅជួយកងកម្លាំងឃើតស៊ីរី ដែលកំពុងជាប់ដៃតតាំងជាមួយពួកជីហាដក្រុមរដ្ឋអ៊ិស្លាមនៅទីក្រុងកូបានេ ដែលការប្រយុទ្ធគ្នាយ៉ាងសាហាវនានាកើតមានបន្តទៀតនាយប់ថ្ងៃនោះ ។
ប្រធានាធិបតីតួកគី លោករីសេប តៃយីបអ័រដូហ្គាន បានរិះគន់យ៉ាងខ្លាំងដល់ក្រុងវ៉ាស៊ីនតោនដែលទម្លាក់អាវុធលើទីក្រុងកូបានេ នៅជាប់ព្រំដែនតួកគីដោយលោកថា នេះជាការសម្រេចចិត្តអាក្រក់មួយ ។ការផ្តល់ភ្លើងខៀវរបស់សភាឃើតឌីស្ថាន អុីរ៉ាក់បញ្ជូនកម្លាំងទៅជួយការពារក្រុងកូបានេ ធ្វើឡើង២ថ្ងៃបន្ទាប់ពីការសម្រេចចិត្តរបស់តួកគីយល់ព្រមឱ្យពួកយុទ្ធជនឃើតអុីរ៉ាក់ឆ្លងកាត់ព្រំដែនខ្លួន រួមទាំងការឆ្លងកាត់របស់ពួកឃើតតួកគី ឬជនជាតិឯទៀតៗផង ។
ពួកយុទ្ធជនឃើតអុីរ៉ាក់ដើរតួនាទីសំខាន់នៅប្រទេសនេះក្នុងការតស៊ូប្រឆាំងពួកជីហាដនៃក្រុមរដ្ឋអ៊ិស្លាម ខណៈពួកនេះធ្វើការវាយលុកធំមួយនៅភាគខាងជើងប្រទេសប្រឈមមុខនឹងការបាក់ទ័ពរបស់កងទាហានអុីរ៉ាក់ ។ពួកឃើតដែលការពារក្រុងកូបានេទាមទារចាប់តាំងពីច្រើនសប្តាហ៍មកហើយឱ្យមានការជួយទ្រទ្រង់ពីខាងក្រៅ ដើម្បីប្រឈមមុខនឹងការរុលទៅមុខរបស់ពួកជីហាដដែលមានចំនួនច្រើនជាង និងអាវុធសម្បូរបែបជាង ។
ការទម្លាក់អាវុធ និងគ្រាប់រំសេវដំបូងកាលពីថ្ងៃទី២០ តុលា ដោយកងទ័ពអាមេរិកឱ្យពួកយុទ្ធជនឃើតនៅក្រុងកូបានេ ត្រូវបានតួកគីរិះគន់យ៉ាងខ្លាំង ។ ប្រធានាធិបតីតួកគីពោលថា ការទម្លាក់អាវុធនេះជាការសម្រេចចិត្តអាក្រក់ដោយពន្យល់ថា អាវុធទាំងនេះដែលធ្លាក់ទៅក្នុងដៃពួកឃើតស៊ីរី ដូចធ្លាក់ក្នុងដៃពួកឃើតតួកគីនៃក្រុមគណបក្សពលករឃើត PKK ដែលក្រុងអង់ការ៉ា ចាត់ទុកជាអង្គការភេរវកម្មមួយ។ លោកអ័រដូហ្គានថា ខ្ញុំពុំយល់សោះហេតុអីក្រុងកូបានេមានសារសំខាន់ខាងយុទ្ធសាស្ត្រ ខ្លាំងម្ល៉េះចំពោះអាមេរិក ព្រោះនៅទីនោះពុំមានជនស៊ីវិលទៀតឡើយ ។តួកគីខិតខំទប់ការគាបសង្កត់របស់អាមេរិកដែលផ្តល់សារសំខាន់ដល់ក្រុងកូបានេ ដោយសារទីក្រុងនោះ ចំពោះភ្នែកពិភពលោក គឺជានិមិត្តរូបនៃការតស៊ូប្រឆាំងពួករដ្ឋអ៊ិស្លាម ៕
ចែករំលែកព័តមាននេះ