រាជធានីភ្នំពេញ ៖ មជ្ឈមណ្ឌលជាតិហ្វឹកហ្វឺនកីឡានៃអគ្គនាយកដ្ឋានកីឡា កាលពីព្រឹកថ្ងៃទី២១ តុលា សហការជាមួយអង្គការ WADA SEARADO និង JADA បានរៀបចំសិក្ខាសាលាស្តីពីការយល់ដឹងការប្រឆាំងការប្រើប្រាស់សារធាតុដូប៉ា ក្នុងវិស័យកីឡាដល់អ្នកពាក់ព័ន្ធយ៉ាងសំខាន់ក្នុងការដឹកនាំគ្រប់គ្រង និងបង្ហាត់ក្រុមជម្រើសជាតិ ជាពិសេសកីឡាករ-កីឡាការិនីដែលជាអ្នកចូលរួមប្រកួតក្នុងព្រឹត្តិការណ៍កីឡាអន្តរជាតិ ។
អញ្ជើញជាអធិបតីក្នុងពិធីនេះមានលោកស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា លោក Gobi Nathan Nair នាយកប្រតិបត្តិអង្គការ WADA SEARADO ដោយមានការចូលរួមពីលោក Yaya Yamamoto ប្រធានជាន់ខ្ពស់អង្គការ JADA អនុរដ្ឋលេខាធិការ អគ្គនាយកកីឡា ប្រធាន-អនុប្រធាននាយកដ្ឋាន ប្រធាន-អនុប្រធានសហព័ន្ធ គ្រូបង្វឹក គ្រូជំនួយ និងកីឡាករ-កីឡាការិនីជាច្រើនរយនាក់ ។ លោកបុ៉ន សុខ ប្រធានមជ្ឈមណ្ឌលជាតិហ្វឹកហ្វឺនកីឡា បានឱ្យដឹងថា សិក្ខាសាលានេះមានរយៈពេល៣ថ្ងៃដែលមានសិក្ខាកាមសរុបចំនួន៣៧២នាក់ ចែកចេញជា២ក្រុម គឺចាប់ពីថ្ងៃទី២១-២២ ខែតុលា ឆ្នាំ២០១៤ សម្រាប់មន្ត្រីគ្រប់គ្រង មន្ត្រីជំនាញសហព័ន្ធកីឡាទាំង២១ អនុរក្ស-គ្រូបង្វឹក គ្រូជំនួយសរុប១០១នាក់ ។ រីឯថ្ងៃទី២៣ តុលា ២០១៤ គឺសម្រាប់ក្រុមកីឡាករ-កីឡាការិនីជម្រើសជាតិសរុប២៧១នាក់ ។
លោកបុ៉ន សុខ បានឱ្យដឹងទៀតថា គោលបំណងនៃសិក្ខាសាលានេះ គឺចង់ឱ្យសិក្ខាកាមទាំងអស់ចូលរួមចំណែកអប់រំពង្រឹងការការពារសុខភាព និងសុវត្ថិភាព ការប្រកួតកីឡាឱ្យកាន់តែប្រសើរឡើងដើម្បីទប់ស្កាត់ប្រយុទ្ធប្រឆាំងការប្រើប្រាស់សារធាតុដូប៉ាក្នុងវិស័យកីឡា និងឈានដល់ការលុបបំបាត់ការប្រើប្រាស់សារធាតុដូប៉ាឱ្យបានជាទូទៅ សំដៅលើកស្ទួយកិត្តិយសជាតិលើឆាកអន្តរជាតិ ។ សូមបញ្ជាក់ផងដែរថា គ្រូឧទ្ទេសនាមដែលបានឡើងធ្វើបទបង្ហាញមាន លោក Gobi Nathan Nair នាយកប្រតិបត្តិអង្គការ WADA SEARADO លោក Yaya Yamamoto ប្រធានជាន់ខ្ពស់អង្គការ JADA លោកសាស្ត្រាចារ្យវេជ្ជបណ្ឌិត ស្តើង ជា មន្ត្រីវេជ្ជសាស្ត្រនៃគណៈកម្មាធិការជាតិអូឡាំពិកកម្ពុជា, លោកស្រីវេជ្ជបណ្ឌិត ហួត ចាន់ធានី អនុប្រធានមន្ទីរពេទ្យកុមារជាតិ និងលោកអិុត ឡេង ប្រធានការិយាល័យទីភ្នាក់ងារប្រឆាំងការប្រើប្រាស់សារធាតុដូប៉ាក្នុងវិស័យកីឡានៃមជ្ឈមណ្ឌលជាតិហ្វឹកហ្វឺនកីឡា ។ បទបង្ហាញធ្វើឡើងក្រោមប្រធានបទ ការបង្កើតទីភ្នាក់ងារប្រឆាំងការប្រើប្រាស់សារធាតុដូប៉ាក្នុងវិស័យកីឡានៅកម្ពុជា, ទស្សនៈទូទៅ និងការអភិវឌ្ឍក្នុងតំបន់ចំពោះការប្រឆាំងដូប៉ា, គ្រោះថ្នាក់នៃការប្រើប្រាស់សារធាតុដូប៉ា, ការផ្តល់ព័ត៌មានឱ្យមានប្រសិទ្ធភាព និងច្បាប់ប្រឆាំងដូប៉ា, ការលើកលែងប្រើប្រាស់ចំពោះការព្យាបាល, ការពិនិត្យសារធាតុដូប៉ា, ការណែនាំអំពីការអប់រំ និងការផ្តល់ព័ត៌មាន WADA Webpage and NADO Webpage និងកម្មវិធីបែងចែកព័ត៌មាន និងការអប់រំរបស់ជបុ៉ន ។
លោកស៊ាន បូរ៉ាត បានមានប្រសាសន៍ថា សកម្មភាពកន្លងមក ក៏ដូចជាក្នុងពេលបច្ចុប្បន្ន ក្រសួងអប់រំ យុវជន និងកីឡា តែងតែគិតគូរ និងយកចិត្តទុកដាក់ជាប្រចាំចំពោះកម្មវិធីបណ្តុះបណ្តាលតាមរយៈការបើកសិក្ខាសាលាថ្នាក់ជាតិ ថ្នាក់ក្រោមជាតិ និងការបើកវគ្គបំប៉នសមត្ថភាពជំនាញជាច្រើនទៀត ។ ជាពិសេសគឺការបញ្ជូនមន្ត្រីជំនាញកីឡាឱ្យទៅចូលរួមវគ្គបណ្តុះបណ្តាលជាលក្ខណៈអន្តរជាតិនៅតាមបណ្តាប្រទេសមួយចំនួនដែលមានសក្តានុពល និងមានប្រសិទ្ធផលកីឡាខ្ពស់ដើម្បីឱ្យពួកគេទទួលបាននូវចំណេះដឹងថ្មីៗ និងបទពិសោធល្អៗបន្ថែមទៀតក្នុងទិសដៅជំរុញវិស័យកីឡាជាតិរបស់យើងឱ្យកាន់តែមានការរីកចម្រើន ។ លទ្ធផលវិជ្ជមាននេះឆ្លុះបញ្ចាំងឱ្យឃើញពីការយកចិត្តទុកដាក់ និងប្តេជ្ញាខ្ពស់របស់រាជរដ្ឋាភិបាលកម្ពុជា ក្នុងការធ្វើឱ្យវិស័យកីឡាកាន់តែមានលទ្ធផលល្អប្រសើរនាថ្ងៃអនាគត ។
លោកសង្ឃឹមថា ចំណេះដឹង និងបទពិសោធដែលទទួលបានពីអង្គសិក្ខាសាលានេះ គឺពិតជាបានរួមចំណែកក្នុងការតម្រង់ទិស និងជាត្រីវិស័យដ៏សំខាន់សម្រាប់ការដឹកនាំគ្រប់គ្រង និងការចូលរួមប្រកួតលើឆាកអន្តរជាតិ ដោយទទួលបាននូវលទ្ធផលវិជ្ជមានជាមូលដ្ឋានគ្រឹះដ៏រឹងមាំក្នុងការចូលរួមលើកស្ទួយនូវកិត្តិយស សេចក្តីថ្លៃថ្នូរ និងកិត្យានុភាពជាតិលើឆាកជាតិ និងអន្តរជាតិយ៉ាងពិតប្រាកដ ៕
ចែករំលែកព័តមាននេះ