រាជធានីភ្នំពេញ ៖ បុរសម្នាក់ត្រូវមនុស្សមួយក្រុមព្រួតគ្នាដេញវាយបណ្តាលឱ្យរងរបួសធ្ងន់ កាលពីវេលាម៉ោង ៨និង៣០នាទី យប់ ថ្ងៃទី ១៩ កញ្ញា ២០១៤ នៅចំណុចក្បែរក្លោងទ្វារចូលវត្តពោធិ៍តាញ្ញាណ តាមបណ្តោយផ្លូវលេខ៣៧១ ស្ថិតក្នុងសង្កាត់បឹងទំពុន ខណ្ឌមានជ័យ ។
ប្រភពព័ត៌មានបានឱ្យដឹងថា នៅមុនពេលកើតហេតុបុរសរងគ្រោះនិងបក្សពួក៥នាក់ ទៀតជិះម៉ូតូបីគ្រឿង មកឈប់នៅពីមុខរោងកាត់ដែកនៅក្បែរក្លោងទ្វារវត្តពោធិ៍តាញ្ញាណ រួចបានដើរចូលទៅក្នុងរោងមួយ សន្ទុះក្រោយមកគេឃើញបក្សពួករបស់បុរសរងគ្រោះនាំគ្នារត់ចេញពីរោងនោះ អស់ ហើយបន្ទាប់មកក៏ឃើញបុរសរងគ្រោះត្រូវក្រុមមនុស្សជិត២០នាក់ ដែលធ្វើជាជាងដែកនៅទីតាំងខាងលើនេះនាំគ្នាព្រួតគ្នាដេញវាយបុរសរងគ្រោះតែម្នាក់ឯង ដោយក្រុមមនុស្សទាំងអស់នោះនៅក្នុងដៃគឺប្រដាប់ទៅដោយ ដំបង ដែក និងដាវសាំម៉ូរ៉ៃ ។ បុរសរងគ្រោះបានរត់គេចពីការតាមដេញវាយរបស់ក្រុមមនុស្សមួយក្រុម តែចៃដន្យពេលដែរបុរសរងគ្រោះកំពុងតែរត់ស្រាប់តែជំពប់ជើងដួល ធ្វើឱ្យមនុស្សមួយក្រុមនោះតាមបុរសរងគ្រោះទាន់ ហើយក៍ព្រួតគ្នាវាយបុរសរងគ្រោះបាក់ធ្មេញ បែកក្បាល និងជាំពេញខ្លួន រងរបួសធ្ងន់ដែលបង្កឱ្យមានការភ្ញាក់ផ្អើល ហើយមនុស្សមួយក្រុមនោះក៏បានរត់គេចខ្លួនអស់តែម្តង ។
ទាក់ទងទៅនឹងអំពើហិង្សា របស់មនុស្សមួយក្រុមលើកគ្នាដេញវាយបុរសរងគ្រោះតែម្នាក់ឯងនេះគេមិនទាន់ដឹងថា តើបណ្តាលមកពីមូលហេតុអ្វីនៅឡើយទេ ក៏ប៉ុន្តែមហាជនបានសន្និដ្ឋានថាអាចបណ្តាលមកពីជម្លោះគ្នារឿងអ្វីមួយ ។
ចែករំលែកព័តមាននេះ