រាជធានីភ្នំពេញ ៖ អ្នកប្រដាល់មកពីក្លិបរស្មីភូមិគាបខេត្តបន្ទាយមានជ័យ ឃីម ឌីម៉ា ក្រោយពីបានផ្តួល នេន វណ្ណា មកពីក្លិបកងពលធំអន្តរាគមន៍លេខ៣ ព្រះវិហារឱ្យសន្លប់ធំក្នុងទឹកទី២ នៅលើសង្វៀនស៊ីធីអិន កាលពីថ្ងៃព្រហស្បតិ៍ ទី១៨ កញ្ញា គេមានសង្ឃឹមមិនក្រោម៩០ភាគរយនោះទេ ក្នុងការដណ្តើមយកតំណែងជាម្ចាស់ខ្សែក្រវាត់ស្រាបៀរភ្នំពេញ ក្នុងប្រភេទទម្ងន់៦៣គីឡូក្រាមលើកនេះ ។
ឃីម ឌីម៉ា ប្រកួតបាន៦លើក មិនទាន់ស្គាល់ចាញ់ម្តងណាឡើយ នៅសល់តែមួយប្រកួតទៀតជួប ម៉ាប់ ឆៃយ៉ា មកពីក្លិបខ្លារខិនមានឫទ្ធិ គឺមិនពិបាកយកឈ្នះឡើយ ។ នៅក្នុងបទសម្ភាសមួយកាលពីពេលថ្មីៗនេះ ឃីម ឌីម៉ា បានប្រាប់ថា ចំពោះតំណែងមួយនេះ គឺមិនពិបាកដណ្តើមយកឡើយ ព្រោះក្នុងចំណោមអ្នកប្រដាល់ទាំងអស់មិនមានអ្នកណាម្នាក់ដែលធ្វើឱ្យលោកព្រួយបារម្ភទេ ។ ម្យ៉ាងវិញទៀត រហូតមកទល់នឹងពេលនេះ លោកកំពុងតែឈរនៅក្នុងតំណែងជួរមុខគេរួចទៅហើយ ជាពិសេសការឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ លោកនៅតែជឿជាក់លើសមត្ថភាពខ្លួនឯងថា នឹងឈ្នះទៀតមិនខាន ។ ឃីម ឌីម៉ា បានប្រាប់ទៀតថា ចាប់តាំងពីបានឈានជើងឡើងសង្វៀនប្រកួតនៅក្នុងឆ្នាំ២០០៧ លោកធ្លាប់គ្រងតំណែងម្ចាស់ខ្សែក្រវាត់ស្រាស៊ុពភើវីស្គី ក្នុងប្រភេទទម្ងន់៦៣,៥គីឡូក្រាមតែ១លើកគត់ ដោយបានយកឈ្នះកីឡាករជបុ៉ននៅលើសង្វៀនទូរទស្សន៍រាជធានីភ្នំពេញបុ៉ស្តិ៍លេខ៣ កាលពីឆ្នាំ២០១១ ។
និស្សិតច្បាប់ឆ្នាំទី៤ រូបនេះបានបង្ហើបឱ្យដឹងទៀតថា សព្វថ្ងៃលោកមានបងប្អូនប្រុសស្រីចំនួន៤នាក់ ក្នុងនោះលោកមានប្អូនប្រុសម្នាក់ឈ្មោះ ឃីម បូរ៉ា ក៏ជាអ្នកប្រដាល់ដូចរូបលោកដែរ ។ ការចាប់អាជីពប្រដាប់នេះដោយសារឪពុករបស់លោក គឺជាអតីតកីឡាករប្រដាល់មួយរូបដែលធ្លាប់ឡើងសង្វៀនប្រកួតនៅតាមជាយដែនកម្ពុជា-ថៃ បុ៉ន្តែមិនសូវល្បីឈ្មោះទេ ។ លោក ក្រៅពីចាប់យកអាជីពជាកីឡាករប្រដាល់ គឺជាមន្ត្រីកងរាជអាវុធហត្ថមួយរូបផងដែរ ។ តាមការកត់សម្គាល់ ឃីម ឌីម៉ា គឺជាមនុស្សម្នាក់ដែលមិនចេះប្រកាន់ខ្លួនឡើយ ហើយក៏ជាអ្នកដែលតស៊ូរៀនសូត្របានខ្ពង់ខ្ពស់គួរឱ្យកោតសរសើរផងដែរ ។
ប្រាក់កម្រៃដែលបានមកពីការប្រកួត គឺបានត្រឹមតែយកមកផ្គត់ផ្គង់ការរៀនសូត្របុ៉ណ្ណោះ ខណៈជីវភាពក្រុមគ្រួសារលោកមានភាពខ្សត់ខ្សោយខ្លាំងណាស់ ទើបលោកខិតខំប្រឹងប្រែងទាំងការរៀនសូត្រ ទាំងការចាប់អាជីពជាអ្នកប្រដាល់ ដោយសង្ឃឹមថា នៅថ្ងៃអនាគតជីវភាពក្រុមគ្រួសារលោកនឹងបានធូរធារជាងនេះមិនខាន ៕
ចែករំលែកព័តមាននេះ