រាជធានីភ្នំពេញ ៖ ទើបតែប៉ះគ្នាដឹងឈ្នះចាញ់ កាលពីពេលថ្មីៗសោះ នៅរសៀលថ្ងៃអាទិត្យ ទី២១ កញ្ញានេះ កីឡាករ ឆាំ រ៉ែម និងជ័យ វណ្ណៈ ប៉ះគ្នាទៀតហើយ បន្ទាប់ពីជាប់លេខ២ និងលេខ៣ ក្នុងពូលB ឈានមកដល់វគ្គថ្មី ។ នេះជាជំនួបសន្សំពិន្ទុក្នុងវគ្គ២ ដើម្បីស្វែងរកអ្នកខ្លាំងទៅដណ្ដើមយកខ្សែក្រវាត់របស់ស្រាបៀរកម្ពុជា ។
ជំនួបដែលត្រូវធ្វើឡើងនៅសង្វៀនទូរទស្សន៍អាស៊ីអាគ្នេយ៍ (SEA TV)នេះ ពិតជាកាន់តែក្ដៅគគុក ដោយសារតែកីឡាករដែលត្រូវប៉ះគ្នាក្នុងជុំនេះឆ្លងកាត់ពីការជម្រុះក្នុងវគ្គ១ ដែលមានន័យថា អ្នកខ្សោយជាងទៅផ្ទះ ហើយអ្នកខ្លាំងបន្តប៉ះគ្នា ។ ក្នុងវគ្គនេះ តម្រូវឲ្យ៣នាក់ក្នុងពូលA និង៣នាក់ ក្នុងពូលB វិលជុំប្រកួតគ្នាស្វែងរកអ្នកមានពិន្ទុខ្ពស់២នាក់ចុងក្រោយ ឡើងប្រកួតគ្នាយកលេខ១ធ្វើជាម្ចាស់ខ្សែក្រវាត់ និងប្រាក់លាន ។ អ៊ីចឹងហើយ ទើបការប្រកួតមានភាពស្វិតស្វាញ ដោយសារតែកីឡាករម្នាក់ៗមិនចង់ចាញ់គ្នា ហើយបើជ្រុលជាចាញ់ក៏ធ្វើឲ្យអ្នកទស្សនាអស់ចិត្ត ។ ការប្រកួតបើកឆាកកាលពីថ្ងៃអាទិត្យមុនឃីម បូរ៉ា និងទិត្យ សុវណ្ណគីរី ជាអ្នករកបាន៣ពិន្ទុម្នាក់មុន ។ រីឯនៅសប្ដាហ៍នេះវិញ កីឡាករ៤រូប ក្នុងចំណោម៦រូប នឹងប៉ះគ្នាទៀតហើយ ។ កីឡាករឆាំ រ៉ែម មកពីក្លិបព្រះខ័នរាជ ត្រូវប្រកួតជាមួយកីឡាករ ជ័យ វណ្ណៈ មកពីក្លិបឃ្លាំងមឿងកីឡាខេត្តពោធិ៍សាត់ និងកីឡាករ ម៉ន សាម៉េត មកពីក្លិបព្រែកឯងកីឡា ដែលទើបតែចាញ់ថ្មីៗ ត្រូវប្រកួតជាមួយកីឡាករ សួង សុវណ្ណថា មកពីសមាគមកីឡាប្រដាល់ក្រសួងការពារជាតិ ។ គូទាំងពីរប៉ះគ្នាក្នុងជំនួបសងសឹកទាំងអស់ បន្ទាប់ពីធ្លាប់សាកគ្នាក្នុងវគ្គ១ រួចហើយ ។
ជ័យ វណ្ណៈ ការពិតគឺជាជើងខ្លាំងម្នាក់ក្នុងប្រភេទទម្ងន់៥៧គីឡូក្រាម ប៉ុន្តែក្នុងវគ្គ១ លោកបែរជាភ្លាត់ឲ្យកីឡាករ ឆាំ រ៉ែម វាយឲ្យចុះចាញ់ក្នុងទឹកទី២ ។ ក្នុងនាមជាអ្នកមានបទពិសោធន៍ច្រើនជាង លោកបានតែកម្ពស់ប៉ុណ្ណោះពេលប៉ះ ឆាំ រ៉ែម ។ និយាយរួមសូម្បីតែស្នៀតជង្គង់ ទាត់ និងកណ្តាប់ដៃ គឺប្រើមិនបានល្អទាំងអស់ ក្នុងពេលប្រកួតគ្នានោះ ។ គ្រប់ពេលចូលកៀក គ្មានឱកាសណាមួយដែលបុរសជង្គង់វែង ជ័យ វណ្ណៈ អាចធ្វើបានល្អឡើយ ដោយមានតែត្រូវពេញៗជំហររបស់ឆាំ រ៉ែម ថែមទៀតផង ។ យ៉ាងណាក៏ដោយ ក្នុងជំនួបលើកនេះ អាចមិនទទួលលទ្ធផលដូចមុនក៏ថាបាន ដោយសារក្នុងវគ្គ១ ជ័យ វណ្ណៈ បានដឹងរួចជាស្រេចថា ចាញ់ក៏បានឡើងដែលទំនងមិនប្រឹងប្រកួតខ្លាំងនាំឲ្យឈឺសាច់ ។ ម្យ៉ាងក្នុងការប្រកួតវិលជុំកន្លងមក ជ័យ វណ្ណៈ មិនមានប្រវត្តិឲ្យជើងខ្លាំងណាម្នាក់ផ្ដួលឲ្យសន្លប់នោះទេ គឺមានតែឈ្នះ ទើបការបរាជ័យក្រោមដៃឆាំ រ៉ែម ក្នុងពេលនោះ អាចជាការបន្ធូរដៃ ឬសន្សំកម្លាំងទុក ។ ថ្វីដ្បិតថា អ្នកទស្សនាភាគច្រើនប៉ាន់ស្មានថា ឆាំ រ៉ែម នឹងឈ្នះនៅថ្ងៃអាទិត្យនេះ ប៉ុន្តែអ្នកយល់ថា ជ័យ វណ្ណៈ ឈ្នះដាច់ក៏មានច្រើនដែរ ដោយសំអាងលើហេតុផល២ ទី១ការប្រកួតក្នុងវគ្គនេះ ម្នាក់ៗត្រូវការឈ្នះដាច់ខាត និងទី២ ជ័យ វណ្ណៈជាសិស្សច្បង ដែលមានសមត្ថភាពមិនងាយឲ្យ ឆាំ រ៉ែម ផ្ដួលបានជាថ្មីទៀតឡើយ ។ ការប្រកួតនៅថ្ងៃអាទិត្យនេះ សំខាន់ណាស់សម្រាប់ ជ័យ វណ្ណៈ ព្រោះដើម្បីសងសឹក និងដើម្បីយក៣ពិន្ទុ ឆ្ពោះទៅដណ្ដើមខ្សែក្រវាត់ ។
សម្រាប់ការប្រកួតរវាងកីឡាករម៉ន សាម៉េត និងកីឡាករសួង សុវណ្ណថា ក៏ជាការសងសឹកផងដែរ ។ ក្នុងវគ្គ១ អ្នកទាំងពីរប៉ះគ្នាម្ដងហើយ ដោយ ម៉ន សាម៉េត ជាអ្នកឈ្នះ ប៉ុន្តែមិនអាចយល់ថា ការប្រកួតលើកនេះ ម៉ន សាម៉េត ឈ្នះទៀតបានទេ ក្នុងពេលដែលអាទិត្យមុន ម៉ន សាម៉េត ទើបតែត្រូវឃីម បូរ៉ា វាយឲ្យអស់ខ្យល់លើរេញ ហើយ សួង សុវណ្ណថា ក៏ធ្លាប់ឈ្នះ ម៉ន សាម៉េត ២លើកក្នុងជំនួបទាំង១០លើករបស់ខ្លួនបែបនេះ ៕
ចែករំលែកព័តមាននេះ