រាជធានីភ្នំពេញ ៖ ក្រោយពីគណៈកម្មការរៀបចំការប្រកួតសម្រេចផ្តល់ជ័យជម្នះទៅឱ្យកីឡាករឌុន សំអាង បានលើកពាន Grand Prix នៅវគ្គផ្តាច់ព្រ័ត្ររបស់ស្ថាប័ន ONE FC ក្នុងព្រឹត្តិការណ៍ Rice of The Kingdom កាលពីរាត្រីថ្ងៃទី១២ កញ្ញា នៅសាលមហោស្រពកោះពេជ្ររួចមក បានលេចចេញនូវមតិរិះគន់យ៉ាងចាស់ដៃថា ការកាត់សេចក្តីមិនមានភាពយុត្តិធម៌ ហើយថាកីឡាករឌុន សំអាង មិនសមនឹងទទួលបានពាននោះទេ ។
ពាក់ព័ន្ធនឹងការលើកឡើងបែបនេះ លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានចេញមុខមកបកស្រាយ និងពន្យល់ថា គោលការណ៍ច្បាប់របស់ MMA មើលទៅត្រឹមត្រូវទៅតាមក្បួនក្នុងស្ថាប័ន ONE FC ដែលគេមិនចង់ឱ្យការវាយគ្នាក្នុងទ្រុងនោះបញ្ចេញសកម្មភាពហិង្សា ឬក៏សាហាវព្រៃផ្សៃពេកនោះទេ ។
លោកបន្តថា គ្រប់កីឡាករដែលចេះក្បាច់គុនចម្រុះច្រើន គឺអាចចូលរួមប្រកួតបាន ប៉ុន្តែចំពោះមូលដ្ឋានសំខាន់ជាងគេនោះមានតែ២ប៉ុណ្ណោះ គឺវ៉ៃជំហរខ្ពស់ និងច្បាប់ រីឯជំហរទាបវិញ មានន័យថា ពេលកីឡាករម្នាក់ដួល តាមច្បាប់ MMA មិនអនុញ្ញាតឱ្យកីឡាករភាគីម្ខាងទៀតយកជើង (បាត ឬកែងជើង) ធាក់លើមុខគូប្រកួតនោះទេ បើទាត់បាន ប៉ុន្តែការចាប់គូប្រកួតខ្លួនបុកគ្រឹះ ក៏មិនបានដែរ ។
នៅក្នុងបទបញ្ជាការប្រកួតរបស់ ONE FC ស្រដៀងគ្នានឹងបទបញ្ជាការប្រកួតរបស់ UFC ដែរ គឺច្បាប់ប្រកួតសំខាន់បំផុតហាមវាយកន្លែងណាដែលអាចធ្វើឱ្យពិការ ឬគ្រោះថ្នាក់ខ្លាំង។ គេហាមពេលកីឡាករណាម្នាក់ប្រើបច្ចេកទេសចាប់ឃ្លេគូប្រកួតរបស់ខ្លួនជាប់ហើយនោះ អាជ្ញាកណ្តាលនឹងបញ្ឈប់ការប្រកួតភ្លាម មិនបណ្តាលឱ្យមានគ្រោះថ្នាក់នោះទេ ខុសប្លែកតែនៅកម្ពុជាប៉ុណ្ណោះ ដូចជាកីឡាប្រដាល់ក្តី គឺគណៈកម្មការបណ្តោយឱ្យសន្លប់សិន ឬក៏រាប់ថា កីឡាករអាចបន្តទៀតបានឬអត់ ទើបចាប់ចេញ ឬបញ្ឈប់ការប្រកួតតែម្តង ។ ប៉ុន្តែចំពោះច្បាប់របស់ ONE FC គឺមានលក្ខណៈពិសេសដោយគេមើលទៅលើការប្រកួតរបស់កីឡាករនីមួយៗ បើខុសលក្ខណៈបច្ចេកទេសណាមួយ គេនឹងផ្អាកការប្រកួត ។ ជាក់ស្តែងក្នុងការប្រកួតកាលពីរាត្រីថ្ងៃនោះ កីឡាករខ្មែរសញ្ជាតិអូស្ត្រាលី Suasday Chau ត្រូវបានកីឡាករបារាំង Amaud Lepont យកជើងធាក់ដោយចេតនាលើផ្ទៃមុខ ប៉ុន្តែអាជ្ញាកណ្តាលបានទុករយៈពេលឱ្យ Suasday ៥នាទីដើម្បីសម្រេចចិត្តត្រូវប្រកួតបន្ត ឬក៏អត់ បើ Suasday ថា វាយអត់កើតមានន័យថា Amaud ចាញ់ហើយ ប៉ុន្តែដោយសារ Suasday មានចិត្តជាអ្នកកីឡាអាជីព គេក៏បន្តការប្រកួតរហូតប្រកួតចាញ់ កីឡាករបារាំង Amaud Lepont វិញតែម្តង។
មិនខុសគ្នាពីកីឡាករកម្ពុជា ដែលត្រូវប្រកួតគ្នាក្នុងវគ្គផ្តាច់ព្រ័ត្រនោះដែរ គឺកីឡាករចាន់ រតនា លើកជើងបង្វិលមកពុះលើកីឡាករឌុន សំអាង ចំកន្លែងណាយកកន្លែងហ្នឹង តៃចៃដន្យត្រូវចំមុខធ្វើឱ្យខុសច្បាប់ MMA ប៉ុន្តែអាជ្ញាកណ្តាល និងគ្រូពេទ្យបានទុកពេលឱ្យ ឌុន សំអាង ៥នាទីដូចគ្នា ដើម្បីបន្តការប្រកួត តែដោយសារ ឌុន សំអាង មិនប្រកួតបន្ត គណៈកម្មការ ក៏សម្រេចកាត់ក្តីឱ្យគេឈ្នះក្លាយជាម្ចាស់ជើងឯកពាន Grand Prix ទោះបី ចាន់ រតនា មានប្រៀបជាងក៏ដោយ ។
លោកវ៉ាត់ ចំរើន បានសម្តែងការសោកស្តាយ និងមិនពេញចិត្តចំពោះការរៀបចំ និងចាក់ផ្សាយរបស់ទូរទស្សន៍ក្នុងស្រុកមួយចំនួនដែលបានធ្វើឱ្យមហាជនមានការយល់ច្រឡំ ដោយរៀបចំឱ្យតែបានៗ មិនមានក្បួនច្បាប់ត្រឹមត្រូវ ដែលជាហេតុធ្វើឱ្យកីឡាករខ្វះសមត្ថភាពដើម្បីចូលរួមក្នុងព្រឹត្តិការណ៍ធំៗ ។ លោកបានលើកឡើងថា ប្រដាល់ដាក់ទ្រុងនៅតាមទូរទស្សន៍ក្នុងស្រុកយើងសព្វថ្ងៃនេះ មិនបានយកច្បាប់ MMA មកអនុវត្តនោះទេ គឺគ្រាន់តែយកលំនាំតាមប៉ុណ្ណោះ ធ្វើឱ្យកីឡាករដែលធ្លាប់វ៉ៃតាមច្បាប់មិនត្រឹមត្រូវនោះយល់ច្រឡំ និងអត់បានដឹងពីគោលការណ៍របស់ច្បាប់ MMA។ លោកក៏បានកោតសរសើរចំពោះស្ថាប័ន ONE FC ដែលជាអង្គភាពកីឡាក្បាច់គុនចម្រុះ MMA ដែលបានរៀបចំព្រឹត្តិការណ៍ដ៏កក្រើក និងទទួលបានការគាំទ្រយ៉ាងច្រើនពីសំណាក់មហាជនក្នុងប្រទេសកម្ពុជានោះ ទើបគេដឹងថា ប្រដាល់ដាក់ទ្រុង MMA នៅតាមទូរទស្សន៍ក្នុងប្រទេសកម្ពុជាមិនទាន់ត្រឹមត្រូវ ។
គួរបញ្ជាក់ផងដែរថា ការប្រកួតក្បាច់គុនចម្រុះដែលជាការរៀបចំលើកដំបូងក្នុងទឹកដីកម្ពុជារបស់ស្ថាប័ន ONE FC ដែលបានចាប់ផ្តើមកាលពីរាត្រីថ្ងៃទី១២ កញ្ញា នៅកោះពេជ្រនោះមានកីឡាករទាំងជាតិ និងអន្តរជាតិ ព្រមទាំងកីឡាការិនីមួយគូផងនោះ បានធ្វើឱ្យកក្រើកសង្វៀនក្រោមការចូលរួមទស្សនាពីទស្សនិកជនរាប់ពាន់នាក់ ។
អ្វីដែលធ្វើឱ្យទស្សនិកជនស្នេហាវិស័យកីឡាចង់តាមដានទស្សនាជាងគេនោះ គឺការប្រកួតរវាងគូកម្ពុជាដែលត្រូវដណ្តើមពានរង្វាន់ ONE FC Cambodian Featherweight Championship Grand Prix រវាងកីឡាករឌុន សំអាង និងចាន់ រតនា ។ ប៉ុន្តែការប្រកួតក្នុងទឹកទី១ ដំណើរការទើបតែបានប៉ុន្មាននាទីប៉ុណ្ណោះ បែរជាបាត់បង់នូវសោភ័ណភាពប្រកួតបន្ទាប់ពីអាជ្ញាកណ្តាលផ្អាកការប្រកួតរយៈពេល៥នាទី ហើយកីឡាករឌុន សំអាង មិនអាចប្រកួតបន្ត ទើបគណៈកម្មការប្រកួតបានកាត់សេចក្តីឱ្យ ឌុន សំអាង ជាអ្នកឈ្នះបានលើកពាននោះតែម្តង ។
ស្របពេលនោះមតិភាគច្រើនបានរិះគន់យ៉ាងខ្លាំងៗថា ឌុន សំអាង មិនសមនឹងទទួលបានពានរង្វាន់តំណាងឱ្យកម្ពុជា ទៅហ្វឹកហាត់នៅក្លិបដ៏ល្បីឈ្មោះរបស់ប្រទេសថៃនោះទេ ព្រោះគេគ្មានចិត្តជាកីឡាករ ដោយធ្វើពុតជាប្រកួតមិនកើតដើម្បីចង់បានពាន ដោយមិនបានបង្ហាញពីភាពប៉ិនប្រសប់ និងសមត្ថភាពគ្រប់គ្រាន់ប្រកួតបន្តដើម្បីលើកមុខមាត់ឱ្យប្រទេសជាតិទាំងមូលបានឡើយ ៕
ចែករំលែកព័តមាននេះ