ខេត្តកំពង់ឆ្នាំង ៖ ប្រជាពលករជាង៦ពាន់នាក់ បានសម្រុកមកទិញពាក្យដាក់ប្រឡងទៅធ្វើការនៅប្រទេសកូរ៉េ នៅក្នុងមណ្ឌលចែកពាក្យប្រឡងភាសាកូរ៉េរបស់មន្ទីរការងារ និងបណ្តុះបណ្តាលវិជ្ជាជីវៈខេត្ត ។ នេះគិតត្រឹមរយៈពេលមួយថ្ងៃកន្លះប៉ុណ្ណោះ (ថ្ងៃទី១៦ កញ្ញា) និងនៅរយៈពេល២ថ្ងៃកន្លះទៀតទើបបញ្ចប់ការទទួលពាក្យ ដែលនឹងអាចមានអ្នកដាក់ពាក្យប្រឡងកើនជាង១ម៉ឺននាក់ និងមិនគិតពីអ្នកដាក់ពាក្យរាប់ម៉ឺននាក់ទៀត នៅតាមមណ្ឌល៣នៃរាជធានី-ខេត្ត៣ផ្សេងទៀត ខណៈដែលការប្រឡងតម្រូវ ជ្រើសរើសយកពលករតែ៤ពាន់នាក់ប៉ុណ្ណោះសម្រាប់ទៅបម្រើការងារនៅប្រទេសកូរ៉េ ។
លោក សិរី វិបុល ប្រធានមណ្ឌលចែកចាយពាក្យប្រឡងភាសាកូរ៉េរបស់ក្រសួងការងារនៅក្នុងខេត្តកំពង់ឆ្នាំងបាននិយាយឱ្យអ្នកយកព័ត៌មានដឹងនៅព្រឹកថ្ងៃទី១៦ កញ្ញាថា ការចែកពាក្យប្រឡងភាសាកូរ៉េរបស់ក្រសួងការងារមាន៤មណ្ឌលគឺ៖
១-វិទ្យាស្ថានពហុបច្ចេកទេសកម្ពុជា(NPIC)នៅរាជធានីភ្នំពេញ ។
២-មជ្ឈមណ្ឌលបណ្តុះបណ្តាលវិជ្ជាជីវៈខេត្តកំពង់ចាម ។
៣-មជ្ឈមណ្ឌលបណ្តុះបណ្តាលវិជ្ជាជីវៈខេត្តកំពង់ឆ្នាំង និង
៤-វិទ្យាស្ថានពហុបច្ចេកទេសភូមិភាគតេជោ សែន ខេត្តតាកែវ ។
មណ្ឌលចែកចាយពាក្យប្រឡងទាំង៤ បានធ្វើការលក់ពាក្យប្រឡងជូនពលករទាំង២ភេទរយៈពេល៤ថ្ងៃ ដោយគិតពីថ្ងៃទី១៥ដល់ថ្ងៃទី១៨ ខែកញ្ញា ឆ្នាំ២០១៤ ចំណែកកាលបរិច្ឆេទនៃការប្រឡងត្រូវធ្វើឡើងនៅថ្ងៃទី២៥និង២៦ ខែតុលា ឆ្នាំ២០១៤ខាងមុខនេះ ។ ប៉ុន្តែមណ្ឌលប្រឡងក្រសួងការងារមិនទាន់បានកំណត់នៅឡើយ ចំណែកកាលបរិច្ឆេទការប្រកាសលទ្ធផលប្រឡង គឺនៅថ្ងៃទី១២ ខែវិច្ឆិកា ឆ្នាំ២០១៤ ។
ដើម្បីដាក់ពាក្យប្រឡងបានបេក្ខជនម្នាក់ៗត្រូវមានអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែនច្បាប់ដើម ហើយត្រូវកើតនៅចន្លោះថ្ងៃទី២៧ ខែតុលា ឆ្នាំ១៩៧៤ ដល់ថ្ងៃទី២៦ ខែតុលា ឆ្នាំ១៩៩៦ (គឺមានអាយុពី១៨ឆ្នាំដល់៣៩ឆ្នាំ) មានកាយសម្បទាគ្រប់គ្រាន់ និងមានសុខភាពល្អ ។ ចំពោះតម្លៃសុំសិទ្ធិប្រឡង ពលករម្នាក់ៗត្រូវបង់ប្រាក់ចំនួន២៤ដុល្លារ ដែលថវិកានេះក្រសួងការងារត្រូវប្រគល់ជូនទៅអង្គភាពអភិវឌ្ឍន៍ ធនធានមនុស្ស(HFD-Korea)នៃក្រសួងមុខរបរ និងការងារនៃសាធារណរដ្ឋកូរ៉េ ដើម្បីយកទៅរៀបចំកិច្ចការប្រឡង ។ អ្នកដាក់ពាក្យប្រឡងមិនមានប្រវត្តិប្រព្រឹត្តបទល្មើស មិនធ្លាប់ជាប់ពន្ធនាគារ ឬទទួលទោសកម្រិតធ្ងន់ មិនជាប់ឈ្មោះក្នុងបញ្ជីនិរទេស ឬបណ្តេញចេញពីសាធារណរដ្ឋកូរ៉េ មិនមានការហាមឃាត់ក្នុងការចាកចេញពីព្រះរាជាណាចក្រកម្ពុជា ។
លោក សេរី វិបុល បានថ្លែងឱ្យដឹងទៀតថាគិតពីថ្ងៃទី១៥ និងមួយព្រឹកថ្ងៃទី១៦ ខែកញ្ញាមណ្ឌលរបស់លោកបានចែកចាយពាក្យប្រឡងជូនពលករប្រុសស្រីបានចំនួនជាង៦ពាន់នាក់ហើយ ។ ការប្រឡងតម្រូវឱ្យជ្រើសរើសយក ពលករចំនួន៤ពាន់នាក់ប៉ុណ្ណោះ សម្រាប់ទូទាំងប្រទេសដែលត្រូវទៅធ្វើការនៅប្រទេសកូរ៉េ ក្នុងនោះមានវិស័យចំនួន៣ គឺ វិស័យកសិកម្ម ២.៥០០នាក់ វិស័យឧស្សាហកម្ម១.០០០នាក់ និងវិស័យសំណង់៥០០នាក់ ។ ពលករដែលបានមកដាក់ពាក្យខាងលើនេះភាគច្រើនមកពី ខេត្តបន្ទាយមានជ័យ បាត់ដំបង ពោធិ៍សាត់ និងខេត្តកំពង់ឆ្នាំង ។
លោកប្រធានមណ្ឌល បានអំពាវនាវផងដែរដល់ប្រជាពលករទាំងអស់ ដែលមានបំណងប្រឡងសមត្ថភាពភាសាកូរ៉េ ដើម្បីបានសិទ្ធិទៅធ្វើការងារនៅប្រទេសកូរ៉េ សូមអញ្ជើញមកទិញពាក្យសុំប្រឡង និងបំពេញពាក្យតាមលក្ខខណ្ឌដូចបានកំណត់ខាងលើឱ្យបានមុនថ្ងៃទី១៨ ខែកញ្ញា ឆ្នាំ២០១៤ បើហួសថ្ងៃកំណត់នេះប្រជាពលករទាំងអស់មិនអាចសុំដាក់ពាក្យប្រឡងភាសាកូរ៉េទៀតបានឡើយនៅក្នុងឆ្នាំនេះ ៕
ចែករំលែកព័តមាននេះ